ޗާޕްކޮށްގެން އިތުރުވި ފައިސާގެ ތެރެއިން 2.1 ބިލިއަން އުނިކޮށްފި

ފައިސާ ޗާޕްކޮށްގެން އިތުރުވި ފައިސާގެ ތެރެއިން 2.1 ބިލިއަން ނަގައިފައިވާ ކަމަށް އެމްއެމްއޭ އިން ބުނެފިއެވެ.

މަނިޓަރީ ސިޔާސަތު ތަންފީޒުކުރުމަށް އެ ބޭންކުން އަޅަމުންދާ ފިޔަވަޅުތަކާއި ގުޅިގެން ނެރުނު ނޫސްބަޔާނެއްގައި އެމްއެމްއޭއިން ބުނިީ ނިމިދިޔަ ސަރުކާރުން ފައިސާ ޗާޕުކޮށް، އެ ފައިސާ ތިން ފަހަރެއްްގެ މަތިން ދިގު މުއްދަތުގެ ބޮންޑުތަކަކަށް ބަދަލުކޮށްފައިވާކަމަށެވެ.

މީގެ ސަބަބުން ރުފިޔާ ލިކުއިޑިޓީ ނުވަތަ ބޭންކިން ނިޒާމުގައި ދައުރުވަމުން ދިޔަ ދިވެހި ރުފިޔާގެ މިންވަރު ވަރަށް ބޮޑަށް އިތުރުވެފައިވާ ކަމަށް އެމްއެމްއޭގެ ބަޔާނުގައި ބުނެފައިވެއެވެ.

ނިމިދިޔަ ސަރުކާރުން ފައިސާ ޗާޕުކުރުމާއި އިޤްތިޞާދުގައި ދައުރުވާ ދިވެހި ރުފިޔާގެ މިންވަރު %178 އިތުރުވެފައިކަމަށް އެމްއެމްއޭއިން ވަނީ ބުނެފައެވެ.

މިމައްސަލަ ހައްލުކުރުމަށް، އެމްއެމްއޭއިން ވަނީ އޯޕަން މާކެޓް އޮޕަރޭޝަން ނުވަތަ ޗާޕުކޮށްފައިވާ ފައިސާ އިޤްތިޞާދުން ނެގުމުގެ މަސައްކަތް މިދިޔަ ޖުލައި މަހުގެ 23 ވަނަ ދުވަހު ފަށާފައެވެ.

އިޤްތިޞާދުގައި ދައުރުވަމުންދިޔަ ޗާޕުކުރި ފައިސާގެ ތެރެއިން 2.1 ބިލިއަން ރުފިޔާ ނަގާފައިވާކަމަށް އެމްއެމްއޭއިން ވަނީ ބުނެފައެވެ.

ދިވެހި ރުފިޔާ މިހާރުވެސް ބޭންކިންގ ނިޒާމުގައި އިތުރުވަމުން ދާއިރު، މިދިޔަ ޖޫން މަހުގެ ނިޔަލަށް ބޭންކުތަކުގައި ދިވެހި ރުފިޔާގެ ޑިޕޮސިޓްސް ވަނީ އަހަރުން އަހަރަށް އަޅާ ބަލާއިރު %18 އިތުރުވެފައިވާ ކަމަށް އެމްއެމްއޭ އިން ވަނީ ބުނެފައެވެ.

ދިވެހި ރުފިޔާގެ ޑިޕޮސިޓްތައް އިތުރުވިނަމަވެސް، ބޭރުފައިސާ ޖަމާކުރާ މިންވަރު 2022 ވަނަ އަހަރުން ފެށިގެން އިތުރުވާ މިންވަރު ދަށްވެފައިވާކަން އެމްއެމްއޭ އިން ފާހަގަކުރެއެވެ.

ބޭންކުތަކަށް ސަރުކާރުން ވިއްކާ ޓީބިލްތަކާއި ބޮންޑުތަކުގައި އިންވެސްޓްކުރުމާއި ގުޅިގެން ރުފިޔާއިން ދޫކުރާ ލޯނު އިތުރުވި ކަމަށް ބަޔާނުގައި ބުނެފައިވެއެވެ.

މި އަހަރުގެ ޖޫން މަހު ބޭންކިންގ ނިޒާމުގެ ތެރޭގައި ދައުރުވާ ދިވެހި ރުފިޔާގެ މިންވަރު އެވްރެޖްކޮށް ހުރީ 7 ބިލިއަން ރުފިޔާކަމަށް އެމްއެމްއޭގެ ތަފާސް ހިސާބުތައް ދައްކައެވެ. މިއީ، އަހަރުން އަހަރަށް ބަލާއިރު %2 އިތުރު އަދަދެއް ކަމަށް އެމްއެމްއޭއިން ވަނީ ބުނެފައެވެ.

ބޭންކުތަކުން ދޫކުރާ ލޯނުގެ ތެރެއިން ދިވެހި ރުފިޔާގެ ލޯނު ވަރަށް ބޮޑުތަނުން އިތުރުވެފައި ވީނަމަވެސް، ބޭރު ފައިސާއިން ލޯނު ދޫކުރާ މިންވަރު ވަނީ ދަށްވެފައެވެ. މިކަންކަމުގެ ސަބަބުން އިޤްތިޞާދުގައި ދިވެހި ރުފިޔާ އިތުރުވެ ބޭރުފައިސާ މަދުވުމުން، ދިވެހި ރުފިޔާގެ އަގަށް އޭގެ ނޭދެވޭ އަސަރު ދަނީ ކުރަމުންކަމަށް އެމްއެމްއޭއިން ވަނީ ބުނެފައެވެ.

ރާއްޖެއަކީ ހުޅުވާލެވިފައިވާ އިޤްތިޞާދެއްގެ ތެރެއިން ޒަމާނުއްސުރެ އިމްޕޯޓަށް ބަރޯސާވާ ޤައުމަކަށްވާއިރު، ރާއްޖޭގެ ބާޒާރުގެ އަގުތައް ބިނާ ވަނީ ބައިނަލްއަޤްވާމީ ބާޒާރުގައި މުދަލާއި ޚިދުމަތުގެ އަގުތަކަށް އަންނަ ކުއްލި ބަދަލުތަކާއި ރާއްޖޭގައި ބޭރު ފައިސާ މާރުކުރާ އަގުތަކަށްކަމަށް އެމްއެމްއޭގެ ބަޔާނުގައި ބުނެފައިވެއެވެ.