ނައިބު ރައީސް އަންނަ ހަފްތާގައި އައްޑޫއަށް ވަޑައިގަންނަވަނީ

ނައިބު ރައީސް ފައިސަލް ނަސީމް އަންނަ ހަފްތާގައި އައްޑު އަށް ވަޑައިގަތުމަށް ހަމަޖެހިފައިވާކަމަށް ރައީސް އޮފީހުން ބުނެފި އެވެ.

އިއްޔެ ބޭއްވި ނޫސްވެރިންގެ ބައްދަލުވުމެއްގައި ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވީ ނައިބު ރައީސް ފައިސަލް ނަސީމް އައްޑޫސިޓީއަށާއި ފުވައްމުލަކުސިޓީ އަށް ކުރައްވާ ދަތުރުފުޅެއްގައި އަންނަ ބުރާސްފަތި ދުވަހު ފުރާވަޑައިގަންނަވާނެ ކަމަށެވެ.

މިދަތުރުފުޅުގައި އެދެ ސިޓީގެ ތައުލީމީ، ސިއްހީ އަދި ތަރައްގީގެ މަޝްރޫއުތައް ކުރިއަށްދާގޮތް ނައިބު ރައީސް ބައްލަވާލައްވާނެއެވެ. އަދި މި ދަތުރުފުޅުގެ ތެރެއިން ބައެއް މުއައްސަސާތަކުގެ ވެރިންނާ ބައްދަލުކުރައްވަންވެސް ވަނީ ނިންމަވާފައެވެ.

ނައިބު ރައީސް ފައިސަލް ނަސީމް އަންނަވަނީ ދޭތެރެ ދޭތެރެއިން ރާއްޖޭގެ އެކި ހިސާބުތަކަށް ދަތުރުކުރައްވާ މަޝްރޫއުތައް ކުރިއަށްދާގޮތް ބައްލަވާ ލައްވަމުނެވެ.