ދިވެހި ފުލުހުންގެ ޚިދުމަތަށް 92 އަހަރު!

ދިވެހިރާއްޖޭގައި ފުލުހުންގެ ހިދުމަތް ރަސްމީގޮތުން ފެށިފައިވަނީ 1932 ވަނަ އަހަރެވެ. އެއީ ދިވެހިރާއްޖޭގައި ފުރަތަމަ ފަހަރަށް ޤާނޫނު އަސާސީ އެކުލަވާލައި، އެ ޤާނޫނު އަސާސީގައި ކަނޑައަޅާފައިވާ ފަދައިން އޭރު ހުންނެވި ރަދުން އައްސުލްޠާން މުޙައްމަދު ޝަމްސުއްދީންގެ ރަސްކަމުގައި 1933 ވަނަ އަހަރު މާރިޗު 29 ވަނަ ދުވަހުއެވެ.

ފުލުހުންގެ ޚިދުމަތް ސިފައިންގެ ހިދުމަތާއެކު އެއް މުއައްސަސާއެއްގެ ދަށުން ދެމުން އައިސް ސިފައިންނާއި ފުލުހުންގެ ހިދުމަތް ވަކި ހިދުމަތެއްގެ ގޮތުގައި ދޭން ސަރުކާރުން ހަމަޖެއްސީ 2004 ވަނަ އަހަރުގެ ސެޕްޓެމްބަރުމަހުގެ ފުރަތަމަ ދުވަހުއެވެ. އެންމެ ފުރަތަމަ ސިފައިންނާއި ފުލުހުންގެ ޚިދުމަތުގައި އަންހެނުން ހަރަކާތްތެރިވާން ފަށާފައިވަނީ 1989 މާޗު 1 ވަނަ ދުވަހުއެވެ. އެންމެ ފުރަތަމަ ސިފައިންގެ ޚިދުމަތަށް ނަގާފައިވަނީ 65 އަންހެނުންނެވެ.

ފުލުހުންގެ ހިދުމަތަށް މިއަހަރު 92 އަހަރު ފުރުނުއިރު ފުލުހުންގެ މުއައްސަސާ ހިންގުމަށް 2023 ވަނަ އަހަރު ވަނީ މުޅިން އައު ޤާނޫނެއް ތަސްދީގުކޮށް، ތަންފީޒުކުރަން ފަށާފައެވެ. މިއާއެކު ފުލުހުންގެ ދައުރު ފުޅާވެ، ފުލުހުންނަށް ލިބޭ ޤާނޫނީ ބާރުތަކާއި އިޚުތިޔާރީތައް ވަނީ އިތުރުވެފައެވެ. ފުލުހުން ދެމުން އަންނަ ޚިދުމަތުގެ ފެންވަރު ރަނގަޅުވެ، ޚިދުމަތަށް މިވަނީ އިތުބާރު ބޮޑުވެފައެވެ.

ރައީސް ޑރ. މުޙައްމަދު މުޢިއްޒުގެ ސަރުކާރުން ވެސް އަންނަނީ ދިވެހި ފުލުހުންގެ ޚިދުމަތް ހަރުދަނާކުރުމަށް ގިނަ މަަސައްކަތްތަކެއް ކުރަމުންނެވެ. މި ސަރުކާރުގެ ސިޔާސަތަކީ ހުރިހާ ރަށެއްގައިވެސް ފުލުހުންގެ ހިދުމަތް ގާއިމުކުރުމެވެ. މިދިޔަ އަހަރުގެ މިދުވަހުގެ ނިޔަލަށް ރާއްޖޭގައި ފުލުހުންގެ ހިދުމަތް ނެތް 46 ރަށް އޮތެވެ. އެ އަދަދު މަދުވުކުރުމަށް ސަރުކާރުން އަންނަނީ އުމްރާނީ ވަސީލަތްތައް ގާއިމުކުރަމުންނެވެ. އަދި ސަރުކާރުގެ އަމާޒަކީ 2027 ގެ ކުރިން މި ރަށްރަށުގައި ފުލުހުންގެ ހިދުމަތް ގާއިމު ކުރުމެވެ.

ފުލުހުން ރައްޔިތުންނަށް ފޯރުކޮށްދޭ ޚިދުމަތްތައް އިތުރަށް ހަރުދަނާކުރުމުގެ ގޮތުން ސިލްސިލާ ފޯރަމްތަކެއް ވެސް ވަނީ ބާއްވާފައެވެ. އެގޮތުން ފާހަގަކޮށްލެވޭ އެއް ފޯރަމް ބޭއްވީ މިދިޔަ އޮކްޓޫބަރު މަހުއެވެ. މާލެ ޕޮލިހުގެ އެކި ބަހާތައް ހިމެނޭ ގޮތަށް އެކި ރޭންކުތަކުގެ ފުލުހުން ބައިވެރިވި މި ފޯރަމަކީ ދިވެހި ފުލުހުންގެ ޚިދުމަތުގެ ގާނޫނުން ފުލުހުންނާ މަތިކޮށްފައިވާ މަސްއޫލިއްޔަތުތަކާއި ޒިންމާތަކުގެ ތެރެއިން، ފުލުހުންގެ މަސައްކަތްތައް ކުރުމަށް ހެދިފައިވާ އެކި އުސޫލުތަކުންނާއި ކުރިއަށްއޮތް ހަތަރު އަހަރަށް ތައްޔާރުކޮށްފައިވާ ސްޓްރެޓިޖިކް ޕްލޭން 2024 ގައި މާލެ ޕޮލިސް ކޮމާންޑާ މަތިކުރެވިފައިވާ ޒިންމާތަކާއި މަސްއޫލިއްޔަތުތަކަށް އަހުލުވެރިވެ އަދި އެ ޒިންމާތަކާއި މަސްއޫލިއްޔަތުތައް އެންމެ އެދެވޭ ގޮތުގައި އަދާކުރުމަށްޓަކައި ކުރަންޖެހޭ މަސައްކަތްތައް ދެނެގަނެ އެކި ބަހާތަކުގެ މެދުގައި މަޝްވަރާކޮށް ގައިޑްލައިންތަކެއް ތައްޔާރުކުރުމަށް ބޭއްވި ފޯރަމެކެވެ.

ފުލުހުންގެ ޚިދުމަތަކީ ރައްޔިތުން ބަލައިގަންނަ އަދި ގާނޫނީ އިމުގެ ތެރެއިން ކުރެވޭ މަސައްކަތްތަކަށް ހެދުމާއި އެކި ހާލަތްތަކާ ގުޅިގެން އަންނަ ބަދަލުތައް ދުވަހުން ދުވަހަށް އެނގޭނެ ގޮތަށް އެތެރޭގެ ކޮމިއުނިކޭޝަން ނިޒާމެއް ގާއިމުކުރުމަށް އެ ޚިދުމަތުން އަންނަނީ މަސައްކަތް ކުރަމުންނެވެ. އަދި މަސައްކަތްތަކުގައި ހުރި ގޮންޖެހުންތައް ކުޑަކުރުމަށް ކަންކަން ދެނެގަނެ، ކޮމާންޑުގެ ބަހާތަކުގައި ތިބި ފުލުހުން ކުރަންޖެހޭ މަސައްކަތްތަކަށް އިތުރަށް އަހުލުވެރިކޮށް ތާޒާކުރުވުމަށް އެކި ދާއިރާތައް ކަނޑައެޅުމުގެ އިތުރުން 2025 ވަނަ އަހަރުގެ އެކްޓިވިޓީ ކަލަންޑަރު އެކުލަވައިލުމުގެ މަސައްކަތް ކޮށްފައިވެއެވެ. ޓީމް ބިލްޑިންގ ހަރަކާތްތަކެއް ވެސް ފާއިތުމިވީ މުއްދަތުގައި ހިންގާފައިވެއެވެ.

ފުލުހުންގެ ޚިދުމަތެއް އޮތުމުގެ އެންމެ ބޮޑު ބޭނުމަކީ، ރައްޔިތުން ޙިމާޔަތް ކުރުމާއި ރައްޔިތުންނަށް ޚިދުމަތް ކުރުމެވެ. ދިވެހި ޤައުމާއި ރައްޔިތުންގެ ޚިދުމަތުގައި، ރެޔާއި ދުވާލު އެއްވެސް ވަރުބަލިކަމެއްނެތި، ވަރަށް މުހިންމު ޤައުމީ މަސައްކަތެއްގައި ފުލުހުން އަންނަނީ ގަދަ ހިތްވަރު ދައްކަމުންނެވެ. ރައްޔިތުންނަށް އަމާން ވެށްޓެއް ޤާއިމުކޮށްދީ، ޞުލްޙަ މަސަލަސްކަމުގައި ދިރިއުޅެވޭނެ ކަމުގެ ޔަޤީންކަމާއި އިތުބާރު ހޯދައިދިނުމަށްޓަކައި، މުޖުތަމަޢުގައި ހިންގާ ކުށުގެ އެންމެހައި ޢަމަލުތައް މަދުކުރުމަށް، ދިވެހި ފުލުހުން މިހާރަށްވުރެ މުހިންމު ދައުރެއް އަދާކުރާނެ ކަމާ މެދު ޝައްކެތް ނެތެވެ.

ދިވެހި ފުލުހުންގެ ޚިދުމަތަށް 92 އަހަރު ފުރުމުގެ މި އުފާވެރި މުނާސަބަތުގައި، ހުރިހާ ފުލުހުންނަށާއި ޚިދުމަތްތެރީންނަށް ޝުކުރާއި ތަޙުނިޔާ ކިޔަމެވެ.