ވޯލްޑް ކަޕް 2022: ބްރެޒިލް މުބާރާތާއި އަލްވަދާއު ކިޔާ، އާރޖެންޓީނާ ސެމީ ފައިނަލަށް

ޤަތަރުގައި ކުރިއަށްދާ ފީފާ ވޯލްކަޕް 2022ގެ ކުއަރޓަރ ފައިނަލުގެ މެޗުތައް ހުކުރު ދުވަހަުގެ ރޭ ވަނީ ފަށާފައެވެ. އެގޮތުން ފުރަތަމަ މެޗުގައި ކްރޮއޭޝިއާ އާއި ބްރެޒިލް ބައްދަލުކުރި މެޗު ކުޅުނީ ރާއްޖެގަޑިން 20:00 ގައެވެ.

ދިވެހިންގެ މެދުގައި އެންމެ މަގުބޫލު އެއް ޓީމުކަމުގައިވާ ބްރެޒިލް އާއި ކްރޮއޭޝިއާ މެޗުގެ 90 މިނެޓްގެ ކުޅުން ނިމުނުއިރުވެސް، ދެ ޓީމުން ކުރޭ ޓީމަކަށް ލަނޑެއް ނުޖެހުނެވެ.

ބްރެޒިލްގެ ފުރަތަމަ ގޯލް ޖަހާދިނީ އިތުރު ވަގުތުގެ

ފުރަތަމަ ހާފުގައި ސެލެބްރިޓީ ކުޅުންތެރިޔާ ނޭމާއެވެ. މިއީ ނޭމާ ބްރެޒިލްގެ ގައުމީ ޓީމުގައި ޖެހި 77 ވަނަ ލަނޑެވެ. މިއާއެކު ނޭމާ ވަނީ ޕެލޭގެ ޤައުމީ ލަނޑުގެ ރިކޯޑާއި އަރާ ހަމަކޮށްފައެވެ. ނޭމާ ވަނީ މި ވޯލްޑްކަޕުގައި 3 ގޯލު ކާމިޔާބުކޮށްފައެވެ.

މި ނަތީޖާ ހަމަހަމަކުރީ، އިތުރު ވަގުތުގެ ދެވަނަ ހާފުގެ ފަހު މިނެޓުކޮޅު ގުނަމުން ދަނިކޮށް ކްރޮއޭޝިއާގެ ބްރޫނޯ ޕެޓްކޮވިޗް ކާމިޔާބު ކުރި ލަނޑަކުންނެވެ.

ނަތީޖާ ނެރުމަށް ޕެނަލްޓީ ޖަހާ، ފަސް ފަހަރު މުބާރާތުގެ ޓައިޓުލް ނަގާފައިވާ ގަދަފަފަ ބްރެޒިލް ކަޓުވާލާ، ކްރޮއޭޝިއާ ވަނީ ސެމީ ފައިނަލަށް ދަތުރުކޮށްފައެވެ. މި ކާމިޔާބުގައި ކްރޮއޭޝިއާގެ ކީޕަރު ލިވަކޮވިޗުގެ މޮޅު ކުޅުން ފާހަގަކޮށްލެވެއެވެ.

މި ޖީލުގެ ފުޓްބޯޅައިގެ އެންމެ މަޝްހޫރު ކުޅުންތެރިންގެ ތެރޭގައި ހިމެނޭ ބްރެޒިލްގެ ނޭމާ މުބާރާތާއި އަލްވަދާއު ކިޔާފައިވާއިރު، ގިނަ ދިވެހިންތަކެއް މެދުކެނޑުމެއްނެތި ސަޕޯޓްކުރާ ބްރެޒިލް ކެނޓުމާއެކު، ކުޅިވަރަށް ޝައުޤުވެރިވާ ގިނަ ބަޔެއްގެ މޫނުމަތިން ފެންނަނީ މާޔޫސްކަމެވެ.

ކުއަރޓަރ ފައިނަލްގެ ދެވަނަ މެޗު ކުޅުނީ ރޭ މެންދަމު 00:00 ގައެވެ. މި މެޗުގައި ބައްދަލުކުރީ ނެދަރލޭންޑާއި އާރޖެންޓީނާ އެވެ.

ގިނަ ބަޔަކު ހީކުރި ގޮތާއި ހިލާފަށް އާރޖެންޓީނާއިން ނެދަރލޭންޑްސް ބަލިކުރީ، މެޗުގެ ފުރިހަމަ ވަގުތުގައި ނަތީޖާ އެއްވަރުވެ، ޕެނަލްޓީ ޖަހައިގެންނެވެ.

މެޗުގެ ފުރަތަމަ ލަނޑު ޖެހީ އާރޖެންޓީނާގެ ނަހުއެލް މޮލީނާ އެވެ. އާރޖެންޓީނާގެ ޑިފެންޑަރު ނަހުއެލްގެ މި ގޯލަކީ ސެލެބްރިޓީ ތަރި ލިއޮނެލް މެސީ ތަނަވަސްކޮށްދިން ފުރުސަތެކެވެ.

އާރޖެންޓީނާގެ ދެވަނަ ލަނޑު ކާމިޔާބުކުރީ، އާރޖެންޓީނާގެ އަކޫނިޔާ އަށް ކުރިފައުލަކުން ލިބުނު ޕެނަލްޓީއެއްގައި ކެޕްޓަން އަދި ދުނިޔޭގެ އެންމެ މޮޅު ކުޅުންތެރިޔާ ކަމަށް ގިނަ ބަޔަކު ޤަބޫލުކިރާ މެސީ އެވެ. މި ލަނޑާއެކު، އާރޖެންޓީނާ އޮތީ ދެ ލަނޑުގެ ފަރަގެއްގައި ނެދަރލޭންސް އަށްވުރެ ކުރީގައެވެ.

އެހެން ނަމަވެސް، ބަދަލު ކުޅުންތެރިއެއްގެ ގޮތުގައި ދަނޑަށް އެރި ނެދަރލޭންޑްސްގެ ވައުޓް ވެގްހޯސްޓު ނެދަރލޭންޑްސް ފުރަތަމަ ލަނޑު ކާމިޔާބުކޮށްދިނީ މެޗުގެ 83 ވަނަ މިނެޓުގައެވެ.

ނަތީޖާ ހަމަހަމަ ކުރީ މެޗުގެ 90 މިނެޓްގެ ކުޅުން ހަމަވެ، ދިން އިތުރު 10 މިނެޓްގެ ވަގުތު ހަމަވެ ރެފްރީ ކަށިގަނޑު ފުމެން ތައްޔާރުވެފައި ވަނިކޮށް، ނެދަރލޭންޑްސްގެ ވައުޓް ވެގްހޯސްޓް އެވެ. މިއީ އޭނާ މި މެޗުގައި ޖަހާދިން ދެވަނަ ލަނޑެވެ.

ދަށުން އަރާ ނެދަރލޭންޑްސް އާރޖެންޓީނާއާ ހަމަހަމަ ކުރުމުން، އިތުރު ވަގުތުގެ ދެ ހާފުގައިވެސް ދެ ޓީމަށްވެސް ލަނޑެއް ޖެހިފައެއް ނުވެއެވެ.

ނަތީޖާަ ނެރުމަށް ޕެނަލްޓީ ޖަހާ، ޕެނަލްޓީ ޝޫޓްއައުޓުގައި އާޖެންޓީނާގެ ކީޕަރު މާޓިނޭޒްގެ މޮޅު ކުޅުމާއެކު، އާރޖެންޓީނާ ވަނީ ސެމީ ފައިނަލަށް ދަތުރުކޮށްފައެވެ.

އާރޖެންޓީނާގެ މޮޅާއެކު ގިނަ ދިވެހިން ތަކެއް ގެންދަނީ އުފާ ފާޅުކުރަމުންނެވެ.

ރޭ ކުޅުނު ދެ މެޗާއެކު، ނޭމާ ރޮއްވާލިއިރު، މެސީގެ ލޮލުން އައީ އުފާވެރިކަމުގެ ކަރުނައެވެ.

ވޯލްކަޕު ފައިނަލްގައި މިރޭވެސް ފޯރިގަދަ މެޗުތަކެއް ކުޅޭނެއެވެ. އެގޮތުން މިރޭ 20:00 ގައި ކުޅޭނީ މޮރޮކޯ އާއި ޕޯޓިގަލްއެވެ. އަދި މެންދަމު ބާރަޖަހާއިރު ކުޅޭނީ އިނގިރޭސިވިލާތާއި ފްރަންސޭސިވިލާތެވެ.