ބާޒާރުގައި މިރުސްލުނބޯގެ އަގު ދަށަށް

ކެއްކުމާއި ކައުންތައް ތައްޔާރުކުރުމުގައި އާންމުކޮށް ބޭނުންކުރާ ބާވަތްތަކުގެ ތެރެއިން މިރުހާއި ލުނބޯގެ އަގު ބާޒާރުގައި ތިރިވެއްޖެއެވެ.

ރަމަޟާންމަސް ފެށުނުއިރު ބާޒާރުން 100 ގްރާމް މިރުސް ގަންނަން ލިބެން ހުރީ 35 ރުފިޔާއާއި 40 ރުފިޔާއާ ދެމެދުގެ އަގެއްގައެވެ. އެކަމަކު މިހާރު ބާޒާރުން 100 ގްރާމް މިރުސް ގަންނަން ލިބެން ހުރީ 15 ރުފިޔާއާއި 25 ރުފިޔާއާ ދެމެދުގެ އަގެއްގައެވެ.

ރަމަޟާންމަސް ފެށުނުއިރު ބާޒާރުން ލުނބޯ ކިލޯއެއް ލިބެން ހުރީ 40 ރުފިޔާއާއި 50 ރުފިޔާއާ ދެމެދުގެ އަގެއްގައެވެ. ނަމަވެސް ލުނބޫ ކިލޯއެއްގެ އަގު މިހާރު ވަނީ 40 ރުފިޔާއާއި 45 ރުފިޔާއާ ދެމެދުގެ އަގަކަށް ތިރިވެފައެވެ.

މީގެ ކުރިން 140 ރުފިޔާއާއި 150 ރުފިޔާއާ ދެމެދުގެ އަގެއްގައި ގަންނަން ލިބުނު އަނބު ކިލޯއެއް މިހާރު ބާޒާރުން ލިބެން ހުރީ 90 ރުފިޔާއާއި 100 ރުފިޔާއާ ދެމެދުގެ އަގެއްގައެވެ.

ކުރިން 150 ރުފިޔާއަށް ލިބެން ހުރި ޖުމްހޫރީ މޭވާ ކިލޯއެއްގެ އަގު މިހާރު ވަނީ 110 ރުފިޔާއާއި 120 ރުފިޔާއާ ދެމެދުގެ އަގަކަށް ވެށްޓިފައެވެ.

ކެރެޓްގެ އަގަށް ބަދަލު އައިސްފައި ނުވާއިރު ކެރެޓް ކިލޯއެއް ކުރިން އަދި މިހާރުވެސް ހުރީ 40 ރުފިޔާއިން ފެށިގެން 45 ރުފިޔާއާ ދެމެދުގެ އަގެއްގައެވެ.

މީގެ އިތުރުން ފަތްޕިލާވެލީގެ ބާވަތްތަކުގެ އަގުތައް ރަމަޟާންމަހުގެ ފުރަތަމަ 10 ދުވަސް ނިމުނު އިރުވެސް ހުރީ ހަމަ އެއް އަގެއްގައި ހިފެހެއްޓިފައެވެ.

މިގޮތުން، ކުއްޅަފިލާފަތް ބޮނޑިއެއް ލިބެން ހުރީ 15 ރުފިޔާއާއި 20 ރުފިޔާ ދެމެދުގެ އަގެއްގައެވެ. ކޮޕީފަތް ބޮނޑިއެއްގެ އަގު 10 ރުފިޔާގައި ހުރިއިރު 100 ގްރާމް ލެޓިއުސް ގަންނަން ލިބެން ހުރީ 10 ރުފިޔާއާއި 15 ރުފިޔާއާ ދެމެދުގެ އަގެއްގައެވެ.

ބާޒާރުގެ އެހެނިހެން ބާވަތްތަކުގެ އަގުތައް:

ކާށި - 35-40 ރުފިޔާ

ހިނކަދި ފަތް ބޮޑިއެއް - 10 ރުފިޔާ

ބަށި ކިލޯއެއް - 70 ރުފިޔާ

ކިއުކަންބާ ކިލޯއެއް - 40 ރުފިޔާއާއި 60 ރުފިޔާ ދޭތެރޭގައި

ބަރަބޯ ކިލޯއެއް - 25 ރުފިޔާ

އާފަލު - 5 ރުފިޔާ 6 ރުފިޔާ ދޭތެރޭގައި

އޮރެންޖު - 5 ރުފިޔާ 8 ރުފިޔާ ދޭތެރޭގައި

މޭބިސްކަދުރު ކިލޯއެއް - 150 ރުފިޔާ

ދޮންކެޔޮ ކިލޯއެއް - 100 ރުފިޔާ

ބޮޑު ލުނބޯ ކިލޯއެއް - 80 ރުފިޔާ

ކުރުނބާ - 25-30 ރުފިޔާ

ޖުމްހޫރީ މޭވާ ކިލޯއެއް - 100 ރުފިޔާ

ފަޅޯ ކިލޯއެއް - 40 ރުފިޔާ

އަނބު ކިލޯއެއް - 120 ރުފިޔާ

ކަށިކޮޔޮ ގަނޑެއް - 500 ރުފިޔާ

ލޮނުމެދު ކިލޯއެއް - 85 ރުފިޔާ

އަލުވި ކިލޯއެއް - 25 ރުފިޔާ

ފިޔާ ކިލޯއެއް - 25 ރުފިޔާ

މިރަމަޟާންމަހު ބާޒާރުމަތީގެ ތަކެތި ތިޔާގިކަން ފާހަގަކޮށްލެވެއެވެ.

ވިޔަފާރިވެރިން ބުނި ގޮތުގައި ތަރުކާރީއާއި މޭވާ އަދި ކާބޯތަކެތީގެ އެހެން ބާވަތްތައް ލިބުމުގައި މާބޮޑު ދަތިކަމެއް މިހާރު ނެތެވެ.