އެޗްއާރްސީއެމަށް މެންބަރަކު އައްޔަންކުރުމުގެ މައްސަލަ މަޖިލީހަށް ފޮނުވައިފި

ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރްސީއެމް) ގެ މެންބަރު ކަމަށް ބޭފުޅަކު އައްޔަންކުރުމަށްޓަކައި ރައްޔިތުންގެ މަޖިލީހުގެ ރުހުން ހޯދުމަށް މިއަދު މަޖިލީހަށް ހުށަހަޅައިފިއެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި ވަނީ މި މައްސަލައާ ގުޅިގެން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މަޖިލީހަށް ފޮނުއްވި ސިޓީފުޅު އިއްވަވާފައެވެ.

ރައީސުލްޖުމްހޫރިއްޔާގެ ސިޓީފުޅުގައި ބަޔާންކުރައްވާފައިވަނީ، އެޗްއާރްސީއެމްގެ މިހާރުގެ މެންބަރު ސަމާއު އަޙްމަދު ނަޖީބުގެ ދައުރު އަންނަ އޮކްޓޯބަރު މަހުގެ ތިންވަނަ ދުވަހަށް ހަމަވާތީ، އެ މަގާމަށް އާ މެންބަރަކު އައްޔަންކުރަން ބޭނުންފުޅުވާ ކަމަށެވެ. އަދި އެ ކޮމިޝަނުގެ މެންބަރުކަމަށް ކުރިމަތިލުމުގެ ފުރުސަތު އާންމުކޮށް ހުޅުވާލުމުން ކުރިމަތިލެއްވި ބޭފުޅުންގެ ތެރެއިން، މަގާމަށް އައްޔަންކުރުމަށް ފެންނަ ބޭފުޅަކަށް ރުހުން ދެއްވުމަށްޓަކައި ދިރާސާކުރައްވައި ގޮތެއް ނިންމަވައިދެއްވުމަށް ރައީސްގެ ސިޓީފުޅުގައި އެދިވަޑައިގެންފައިވެއެވެ.

މި މަގާމަށް އައްޔަންކުރުމަށްޓަކައި ރައީސުލްޖުމްހޫރިއްޔާ މަޖިލީހަށް ފޮނުއްވާފައިވަނީ ދެ ބޭފުޅެއްގެ ނަންފުޅެވެ. އޭގެ ތެރޭގައި ހިމެނެނީ ޝައްމޫން ޙަމީދާއި، ސަމާއު އަޙްމަދު ނަޖީބެވެ.

މަޖިލީހުގެ ތަޅުމުގައި މި ދެ ބޭފުޅުންގެ ނަންފުޅު އިއްވެވުމަށްފަހު، ރިޔާސަތުން ވަނީ މި ނަންތައް ދިރާސާކޮށް ގޮތެއް ނިންމުމަށްޓަކައި ރައްޔިތުންގެ މަޖިލީހުގެ ހިއުމަން ރައިޓްސް އެންޑް ޖެންޑާ ކޮމިޓީއަށް ފޮނުއްވާފައެވެ.