ނަފްސާނީ ދުޅަހެޔޮކަމާ ގުޅޭ އާޓް އެގްޒިބިޝަނެއް ފަށައިފި

ދުނިޔޭގެ ނަފްސާނީ ސިއްހަތުގެ ދުވަހާ ގުޅިގެން ކުރިއަށް ގެންދާ”ޝޭޑްސް އޮފް މައިންޑް” އާޓް އެގްޒިބިޝަން ފަށައިފި އެވެ.

މި އާޓް އެގްޒިބިޝަން ހުޅިވައިދެއްވާ، ރަސްމިއްޔާތު ޝަރަފުވެރިކޮށްދެއްވީ ރައީސުލްޖުމްހޫރިއްޔާގެ ނައިބު ހުސައިން މުހައްމަދު ލަތީފު އެވެ.

މިމަހު 17ގެ ނިޔަލަށް ނެޝަނަލް އާޓް ގެލެރީގައި މި އެގްޒިބިޝަން ކުރިއަށްގެންދިއުމަށް ހަމަޖެހިފައިވާއިރު ފަންނުވެރިންގެ މަސައްކަތްތައް ވިއްކައިގެން އާމްދަނީ އެފަރާތްތަކަށް ލިބިގެންދާނެ އެވެ. އެގްޒިބިޝަންގެ ތާރީހުތަކުގައި އާޓް ގެލެރީއަށް ހިލޭ ވަދެވޭނެ އެވެ.

ޒުވާނުންނަށް ޚާއްސަކޮށްފައިވާ މި އެގްޒިބިޝަންގައި ކުރެހުންތައް ހުށައެޅުމަށް ހުޅުވާލީ އުމުރުން 16އަހަރާއި 35އަހަރާ ދެމެދުގެ އުމުރުފުރައަށެވެ. 95 ފަރާތަކުން ޝައުގުވެރިކަން ފާޅުކޮށް، 51 ކުރެހުން މި އެގްޒިބިޝަންގައި ދައްކާލުމަށް ވަނީ ބަހައްޓާފައެވެ.

ނަފްސާނީ ސިއްހަތުގެ ދުވަހާ ގުޅިގެން މިނިސްޓްރީގެ ފަރާތުން އާޓް އެގްޒިބިޝަނެއް ހުޅުވާލުމުގެ މައިގަނޑު މަގްސަދަކީ، ފަންނުވެރިކަމުގެ ތެރެއިން ނަފްސާނީ ހޭލުންތެރިކަން އިތުރުކުރުމާއި، ނަފްސާނީ ދުޅަހެޔޮކަމުގެ މުހިއްމުކަން ގެނެސްދިނުމެވެ.