ފޭސްބުކްގައި ދިވެއްސަކު، ހުރިހާ ނޫސްވެރިންނަށް އަމާޒުވާ ގޮތަށް މަރުގެ އިންޒާރު ދިން މައްސަލަ ދިވެހި ފުލުހުންގެ ޚިދުމަތުން ބަލަން ފަށައިފިއެވެ.
ފުލުހުންގެ ޚިދުމަތުން ބަލަމުން އަންނަނީ، އޮންލައިން ނޫހަކުން ޝާއިއުކުރި ޚަބަރަކަށް ކޮމެންޓްކުރި މީހަކު، "ނޫސްވެރިންވީ މަރަން" ކަމަށް ލިޔެ، ހުރިހާ ނޫސްވެރިންނަށް އަމާޒުވާ ގޮތަށް އިންޒާރުދިން މައްސަލައެވެ.
ފާތިމަތު މަދީހާގެ ނަމުގައި، ކާކުކަން ނޭނގޭ ގޮތަށް، ޕްރޮފައިލް ފޮޓޯއެއްވެސް ނެތް އައިޑީއަކުން ކުރި، ކޮމެންޓުގައިވަނީ، އެ ޚަބަރު ލިޔުނު ނޫސްވެރިޔާއަށްވެސް ފުރައްސާރަކޮށްފައެވެ. މިގޮތުން، ޚަބަރު ލިޔުނު ނޫސްވެރިޔާއަކީ "މޮޔަ ކުއްޖެއް" ކަމަށް ބުނެ، އޭނާގެ ކަރާމާތަށް އުނިކަން ލިބޭ ގޮތަށް ފާތިމަތު މަދީހާގެ ނަމުގައި ކޮމެންޓްކުރި މީހާ ލިޔެފައިވެއެވެ. އަދި މިމީހުން [ނޫސްވެރިން] ވީ މަރަން ކަމަށްވެސް އެ ކޮމެންޓުގައި ވަނީ ލިޔެފައެވެ.
ެައަސްލު ޓީވީއާ ވާހަކަދައްކަމުން، އެ ކޮމެންޓް ރައްދުވި ނޫސްވެރިޔާ ބުނީ، އެ މައްސަލަ މާފަންނު ޕޮލިސް ސްޓޭޝަނަށް ހުށަހަޅާފައިވާ ކަމަށެވެ. އަދި މިމައްސަލާގައި އޭނާގެ ބަޔާން ފުލުހުން ވަނީ ނަގާފައެވެ.
ދިވެހި ފުލުހުންގެ ޚިދުމަތުން ވަނީ މިމައްސަލާގައި ތަހުގީގެއް ހިންގަމުން އަންނަ ކަމަށް ބުނެފައެވެ.
ނޫސްވެރިންނަށް ފުރައްސާރަކުރުމާ ބިރުދެއްކުމާއި އިންޒާރު ދިނުމުގެ މައްސަލަތައް މިފަހުން ވަނީ އިތުރުވެފައެވެ. ދާދިފަހުން، ޓިކްޓޮކްގައި، އަންހެން ނޫސްވެރިޔަކަށް ފުރައްސާރަކޮށް ދޮގު އިލްޒާމުތަކެއް އެޅުވި ކަމަށް ބުނާ މައްސަލައެއްވެސް ފުލުހުން އަންނަނީ ބަލަމުންނެވެ. އަދި، އިތުރު ނޫސްވެރިޔަކަށް މަރުގެ އިންޒާރުދިން މައްސަލައެއްވެސް ފުލުހުން އަންނަނީ ތަހުގީގުކުރަމުންނެވެ.
ނޫސްވެރިކަމަކީ ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 28 ވަނަ މާއްދާއިން ހިމާޔަތާއި ރައްކާތެރިކަން ކަށަވަރުކޮށްދީފައިވާ ދުސްތޫރީ ހައްގެކެވެ.
އެ މާއްދާގައި ބުނެފައިވަނީ، ނޫސްވެރިކަން ކުރުމާއި، މުއާޞަލާތީ ވަސީލަތްތައް ބޭނުންކުރުމުގެ މިނިވަންކަން ކޮންމެ މީހަކަށްމެ ލިބިގެންވާ ކަމަށާއި މީގެތެރޭގައި ޚަބަރާއި، މަޢުލޫމާތާއި، ފެންނަ ގޮތްތަކާއި، ޚިޔާލުތައް ފާޅުކުރުމާއި، ޝާއިޢުކުރުމާއި، ފެތުރުމުގެ މިނިވަންކަން ހިމެނޭ ކަމަށެވެ. މިގޮތުން ޝާއިޢުކުރާ ނުވަތަ ފަތުރާ ނުވަތަ ފާޅުކުރާ މަޢުލޫމާތެއްގެ މަޞްދަރު ހާމަކުރުމަށް އެއްވެސް މީހަކަށް މަޖުބޫރުކޮށްގެނެއް ނުވާނެ ކަމަށް ވަރަށް ސާފުކޮށް ޤާނޫނުއަސާސީގެ އެ މާއްދާގައި ބުނެފައިވެއެވެ.
