ގޯލްޑަން ފުޓްސަލް ޗެލެންޖް 2025 ކާމިޔާބުކޮށް ކާށިދޫ ތާރީޚުގެ ތެރެއަށް

ގޯލްޑަން ފުޓްސަލް ޗެލެންޖް 2025 ގެ ފައިނަލުގައި މިރޭ ހދ. ނައިވާދޫއާ ދެކޮޅަށް ކުޅެ ކ. ކާށިދޫ މުބާރާތުގެ ޗެމްޕިއަންކަން ނަގައިފިއެވެ.

ހުޅުމާލެ ރެހެންދި ޓާފް ފުޓްސަލް ދަނޑުގައި ކުޅުނު މިމެޗު ކާށިދޫން ކާމިޔާބުކުރީ 4-1ގެ ނަތީޖާއަކުންނެވެ.

މެޗުގައި ފުރަތަމަ ލަނޑުޖަހާ ލީޑުވެސް ނެގީ ކާށިދޫއެވެ. ދެ ޓީމުންވެސް ރަނގަޅު ކުޅުމެއް ފެނިގެންދިޔަ މެޗު އިތުރަށް ފޯރިގަދަވަނީ މެޗުގެ ނަތީޖާ 1-1ގެ ހަމަހަމަ ނަތީޖާއަކަށް ބަދަލުކޮށްލުމުންނެވެ.

ނައިވާދޫން މެޗުގައި ފެނިގެންދިޔަ ހަމަ އެކަނި ލަނޑު ޖެހީ ފުރަތަމަ ހާފުގައި ކާށިދޫން ފުރަތަމަ ލަނޑުޖެހިތާ މާގިނައިރެއް ނުވެއެވެ.

އެކަމަކު އިތުރު ލަނޑެއް ޖަހަން އެ ޓީމަށް ފުރުސަތު ނުދީ ކާށިދޫން ވަނީ ވާދަވެރިކަން ބޮޑު މެޗު އަނެއްކާވެސް ކާށިދޫ ކޮޅަށް އަނބުރާލާފައެވެ. މެޗު ނިންމާލީ ތިން ލަނޑުގެ ފަރަގަކުންނެވެ.

މިމުބާރާތުގައި ތަފާތު މޮޅު ކުޅުމެއް ދެއްކި ކާށިދޫއިން ވަނީ މުބާރާތުގެ ގަދަބާރުންތަކެއް ކަޓުވާލައިފައެވެ.

މިގޮތުން އެ ޓީމުން ވަނީ ކ. އަތޮޅު ސެމީގައި ކ. ގާފަރު ބަލިކޮށް ރަށަށް ފޮނުވާލާފައެވެ.

އޭގެ ފަހުން މުބާރާތުގެ ގަދަ 16 ގައި ގޯލްޑަން ފުޓްސަލް ޗެލެންޖްގެ އެންމެ ކާމިޔާބު ޓީމު ތ. ތިމަރަފުށީގެ އުންމީދުތައް ފުނޑުފުނޑު ކޮށްލިއެވެ. ތިން ފަހަރުގެ ޗެމްޕިއަން ތިމަރަފުށި ކާށިދޫން ބަލިކުރިއިރު, ކުއާޓާ ފައިނަލުގައި މިދިޔަ އަހަރުގެ ސެމީ ފައިނަލުގައި ކުޅުނު ވިލިމާލެ ވަނީ ބަލިކޮށްފައެވެ.

އެންމެ ފަހުން ސެމީ ފައިނަލުގައި، 2023 ވަނަ އަހަރުގެ ރަނަރަޕް އަދި މި ފަަހަރުގެ ގދ. އަތޮޅާއި ޒޯން ހަތެއްގެ ޗެމްޕިއަން، ވާދޫގެ މައްޗަށް ކުރިހޯދައި އެ ޓީމުވެސް ކަޓުވާލިއެވެ.

މިއީ ނައިވާދޫއާއި ކާށިދޫ ވެސް މުބާރާތުގެ ފައިނަލްގައި ވާދަކުރި ފުރަތަމަ ފަހަރެވެ