ދެ ގައުމު ދެމެދުގައި އޮތް ގުޅުމުގެ ހަބަކަށް ނިއުދިއްލީ ހެދުމަކީ އަމާޒެއް: ރައީސް

ދިވެހި ރާއްޖެއާއި އިންޑިއާއާއި ދެމެދު އެކި ދާއިރާތަކުން ގާއިމުކޮށްފައިވާ ގުޅުންތަކުގެ 'ހަބަކަށް' ނިއު ދިއްލީ ހަދަން ބޭނުންފުޅުވާ ކަމަށް ރައިސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.

އިންޑިއާގެ ރައީސްގެ ދައުވަތަކަށް ރައީސް ޑރ. މުއިއްޒު ހުންނެވީ މިހާރު އިންޑިއާގެ ވެރިރަށް، ނިއު ދިއްލީގަ އެވެ. ނިއު ދިއްލީއަށް ވަޑައިގެން ރައީސް ވަނީ އެ ސަރަހައްދުގައި ދިރިއުޅޭ ދިވެހިންނާއި މިއަދު ބައްދަލުކުރައްވާފަ އެވެ.

އެ ބައްދަލުވުމުގައި ވާހަކަފުޅު ދައްކަވަމުން ރައީސް ވިދާޅުވީ، ދިވެއްސަކު ކޮންމެ ގައުމެއްގައި ހުއްޓަސް، ދިވެހި ދައުލަތުގެ އެހީ ލިބޭ ގޮތަށް އިންތިޒާމްތައް ހަމަޖެހިފައި އޮތުމަކީ އެމަނިކުފާނުގެ ސިޔާސަތެއް ކަމަށެވެ. އެހެންކަމުން ގައުމުތަކުގައި ހުންނަ ހައި ކޮމިޝަންތަކާއި އެމްބަސީތަކުން ފޯރުކޮށްދޭ ކޮންސިއުލާ އެހީތެރިކަމާއި އެނޫންވެސް ހިދުމަތްތައް މިހާރަށް ވުރެ ހަރުދަނާ ކުރުމަށް ކުރެވޭނެ ކަންކަން ދެނެގަނެ އެކަންކަން ކުރުމަށް އެމަނިކުފާނު ގޮވާލެއްވި އެވެ.

ދެ ގައުމުގެ މެދުގައި އޮތް ގުޅުން ބަދަހިކުރުމުގެ މައްޗަށް ވާހަކަދައްކަވަމުން ރައީސް ވިދާޅުވީ ދެ ގައުމުގެ މެދުގައި އޮތް ވިޔަފާރީގެ ގުޅުން އިތުރަށް ވަރުގަދަ ކުރުން މުހިއްމު ކަމަށެވެ. ހާއްސަކޮށް ނިއު ދިއްލީއަކީ ރާއްޖެއާއި އިންޑިއާއާއި ދެމެދު ހިންގާ ވިޔަފާރީގެ މުއާމާތްތަކާއި އެހެނިހެން ދާއިރާތަކާއި ގުޅުން ހުރި މުއާމަލާތްތައް ވެސް ކުރެވޭ ހަބަކަށް ހަދަން ބޭނުންފުޅުވާ ކަމަށެވެ.

" ޓޫރިޒަމްގެ ދާއިރާއިން ވިޔަސް، ދަތުރުފަތުރުކުރުމުގެ ގޮތުން ވިޔަސް ހުރިހާ ގޮތަކުން މިއީ އިންޑިއާގެ ނިއު ދިއްލީއަކީ މި ދެންނެވި ގޮތަށް ދާއިރާތަކުން ރާއްޖެއާއި ދެ ގައުމުގެ ދެމެދުގައި ގުޅުން ބަދަހިކުރުމުގައި މުހިއްމު ތަނަކަށް ހެދުން. އެހެންވީމަ މިކަން މިގޮތަށް ކުރިއަށް ގެންދިއުމަކީ އަޅުގަނޑުމެންގެ ވިސްނުން. " ރައީސް ވިދާޅުވި އެވެ.

ރައީސް ވިދާޅުވީ މި ތިން ދުވަހުގެ ދަތުރުފުޅުގެ ތެރެއިން ދިވެހި ރައްޔިތުންނަށް ފައިދާ ހުރި ކަންތައްތަކެއް ފަހި ވެގެންދާނެ ކަމަށެވެ.