ވެރިކަމަށް އަންނަ ކޮންމެ މީހަކަށް ގައުމު ފެންނަނީ އެމީހެއްގެ ބައްޕަގެ ތަރިކަ މުދާގަނޑެއްހެން: އަލީ ރަމީޒް

ދިވެހިރާއްޖެއަށް ޖެހިފައިވާ އެންމެ ބޮޑު އެއް މުސީބާތަކީ ވެރިކަމަށް އަންނަ ކޮންމެ މީހަކަށް މި ގައުމަކީ އެމީހެއްގެ ބައްޕަގެ ތަރިކަ މުދާގަނޑެއްގެ ގޮތުގައި ގަބޫލުކުރެވުން ކަމަށް ދީނީ އިލްމުވެރިޔާ އަދި އިޖުތިމާއީ ކަންކަމުގައި އަޑުއުފުއްލަވާ އަލީ ރަމީޒް ވިދާޅުވެއްޖެއެވެ.

އަލީ ރަމީޒް މިހެން ވިދާޅުވީ މިއަދު އޭނާގެ ރަސްމީ 'އެކްސް' އެކައުންޓުން ކުރެއްވި ޕޯސްޓެއްގައެވެ.

އޭނާ ހިއްސާކުރެއްވި މެސެޖުގައި ވިދާޅުވެފައިވަނީ މި ގައުމަށް މިއަދު ދިމާވެފައިވާ އެންމެ ހިތާމަވެރި އަދި އެންމެ ބޮޑު މުސީބާތަކީ، ވެރިކަމުގެ ބާރު ލިބޭ ކޮންމެ ފަރާތަކުން ވެސް މި ގައުމަކީ އެމީހެއްގެ އަމިއްލަ މިލްކިއްޔާތެއްގެ ގޮތުގައި ދެކި، ބައްޕަގެ ތަރިކަ މުދާގަނޑެއް ބަހާ އުސޫލުން ކަންކަން ނިންމަމުން ދިއުން ކަމަށެވެ. އަދި މިއީ ގައުމުގެ ހަމަޖެހުމަށާއި ކުރިމަގަށް އޮތް ބޮޑު މުސީބާތެއް ކަމުގައިވެސް އޭނާ ފާހަގަކުރެއްވިއެވެ.

ރާއްޖޭގެ ސިޔާސީ މަސްރަހު ފަހަކަށް އައިސް ހަލަބޮލިވެ، ވެރިކަންކުރާ ފަރާތްތަކުން ދައުލަތުގެ ވަސީލަތްތަކާއި މަގާމުތަކުގެ ބޭނުން އަމިއްލަ އެދުމަށްޓަކައި ހިފަމުންދާ ކަމަށް ބުނެ ގިނަ ބައެއްގެ ފާޑުކިޔުންތައް ދަނީ އަމާޒުވަމުންނެވެ. ވެރިކަމަށް އަންނަ ކޮންމެ ބަޔަކުވެސް ގައުމީ މަސްލަހަތަށްވުރެ ބޮޑަށް، އަމިއްލަ ފައިދާއާއި ސިޔާސީ ބާރު ދެމެހެއްޓުމަށް މަސައްކަތްކުރާ ކަމުގެ ޝަކުވާ ރައްޔިތުންގެ މެދުގައި އަބަދުވެސް ބޮޑެވެ.

އަލީ ރަމީޒްގެ މި ވާހަކަކޮޅަށް ސޯޝަލް މީޑިއާގައި ގިނަ ބައެއްގެ ސަމާލުކަން ލިބިފައިވާއިރު، އާންމުންގެ ގިނަ ބަޔަކު އަންނަނީ އޭނާގެ މި ވިސްނުމަށް ތާއީދުކޮށް ޚިޔާލު ފާޅުކުރަމުންނެވެ. އެގޮތުން، ވެރިކަމަކީ ރައްޔިތުން މަތިކުރާ ބޮޑު އަމާނާތެއް ކަމަށާއި، އެއީ އަމިއްލަ ތަރިކައެއް ނޫންކަން ހަނދާންކޮށްދީ ގިނަ ބަޔަކު ވަނީ ޝުއޫރު ފާޅުކޮށްފައެވެ.