"ސެކަންޑް-ކްލާސް ފަސިންޖަރު" މި ލަފްޒް ބޭނުކުރުން ހުއްޓާލުމަށް އިންޑިޔާގެ ސްޕްރީމް ކޯޓުން ހުކުމްކޮށްފި!

އިންޑިއާގެ ރޭލްވޭގެ މެނުއަލްތަކާއި ރަސްމީ ލިޔެކިޔުންތަކުގައި "ސެކަންޑް-ކްލާސް ފަސިންޖަރު" (ދެވަނަ ދަރަޖައިގެ ފަސިންޖަރު) މި ލަފްޒު ބޭނުންކުރުން ހުއްޓާލުމަށް ސުޕްރީމް ކޯޓުން ލަފާދީފިއެވެ.

"އިންޑިޔާ ޓްޑޭ" ނޫހުގައި ރިޕޯރޓް ކޮށްފައިވާ ގޮތުގައި މި ޙުކުމުން އެނގިގެންދަނީ، މުޖުތަމަޢުގައި މީހުންގެ މެދުގައި ހުންނަ ތަފާތުކުރުންތައް ބަސްމަގުގެ ތެރެއިން ނޭނގި ނަމަވެސް އިތުރުވެގެންދާ ގޮތް ކަމަށެވެ.

"ސެކަންޑް-ކްލާސް" (ދެވަނަ ދަރަޖަ) މި ލަފްޒު، ދަތުރުކުރާ މީހާއަށް ނިސްބަތްކުރުމުގެ ބަދަލުގައި، އޭނާ ދަތުރުކުރާ ބޯގީއަށް (ކޯޗަށް) ނިސްބަތްކުރުމަށް ބަދަލުކުރުމުން، ސުޕްރީމް ކޯޓުން އެ މަސައްކަތްކުރަނީ އިދާރީ ބަސްމަގުގެ ސަބަބުން އިންސާނީ ކަރާމާތަށް ލިބޭ އުނިކަން ނައްތާލުމަށް ކަމަށް ވެސް އެ ނޫހުގައި ވެ އެވެ.

ތާރީޚަށް ބަލާއިރު، މީހަކަށް "ސެކަންޑް-ކްލާސް ފަސިންޖަރެއް" (ދެވަނަ ދަރަޖައިގެ ފަސިންޖަރެއް) ކިޔުމަކީ "ދެވަނަ ދަރަޖައިގެ ރައްޔިތެއް" ފަދަ ނޭދެވޭ މާނައެއް ދޭހަކޮށްދޭ ކަމެކެވެ. ކޯޓުގެ ވިސްނުމަކީ ވަރަށް ސާދާ ވިސްނުމެކެވެ؛ އަގުހެޔޮ ޓިކެޓެއް ގަތުމުން މަދުވާންޖެހޭނީ ހަމައެކަނި ލިބޭ ޚިދުމަތްތަކާއި ފަސޭހަތަކެވެ، އިންސާނެއްގެ ހައިސިއްޔަތުން އެމީހެއްގެ ހުރި ގަދަރާއި ދަރަޖައެއް ނޫން ކަމަށެވެ.

ޤާނޫނުއަސާސީން ކަށަވަރުކޮށްދޭ ހަމަހަމަކަމާއި ކަރާމާތުގެ އުސޫލުތަކާ އެއްގޮތްވާ ގޮތުގެ މަތިން، ދަރަޖަކުރުން ނިސްބަތްކުރަންވާނީ ދަތުރުވެރިޔާއަށް ނޫންކަމަށާއި އެއީ ރޭލުގެ ބޯގީއަށް (ކޯޗަށް) ނިސްބަތްކުރަންޖެހޭ އެއްޗެއްކަމަށް ފާހަގަކޮށް، އިންޑިއާގެ ރޭލްވޭގެ މެނުއަލްތަކާއި ރަސްމީ ލިޔެކިޔުންތަކުގައި "ސެކަންޑް-ކްލާސް ފަސިންޖަރު" (ދެވަނަ ދަރަޖައިގެ ފަސިންޖަރު) މި ލަފްޒު ބޭނުންކުރުން ހުއްޓާލުމަށް ސުޕްރީމް ކޯޓުން ވަނީ ލަފާދީފަ އެވެ.

މި ފާހަގަކުރުން ކޯޓުން ކޮށްފައިވަނީ، 2015 ވަނަ އަހަރު ރޭލަކުން ވެއްޓި މަރުވި ފަސިންޖަރެއްގެ ބަދަލުގެ މައްސަލައެއް ނިންމަވަމުން، ފަނޑިޔާރު ސަންޖޭ ކަރޯލް އަދި ފަނޑިޔާރު ނޮންގްމެއިކަޕަމް ކޯޓީސްވަރް ސިންގް ހިމެނިވަޑައިގަންނަވާ ބެންޗަކުންނެވެ.

ކޯޓުގެ ޙުކުމުގައި ބުނެފައިވަނީ "ސެކަންޑް-ކްލާސް" (ދެވަނަ ދަރަޖަ) މި އިބާރާތް ބޭނުންކުރަންވާނީ ބޯގީގެ ގިންތި ބަޔާންކުރުމަށް ކަމަށާއި، އޭގައި ދަތުރުކުރާ ވަކިވަކި ފަރުދުންނަށް ނިސްބަތްކޮށް ނޫން ކަމަށެވެ.