ރާއްޖެއާ ވިއެޓްނާމްއާ ދެމެދު އޮތް ގުޅުން ބަދަހިކުރުމަށް މަޝްވަރާ ކުރައްވައިފި

ރާއްޖެއާ ވިއެޓްނާމްއާ ދެމެދު އޮތް ގުޅުން ބަދަހިކުރުމަށް މަޝްވަރާ ކުރައްވައިފިއެވެ.

މި މަޝްވަރާތައް ކުރެއްވީ ރަސްމީ ދަތުރުފުޅެއްގައި ފޮރިން މިނިސްޓަރ ޑރ. ހަލީލް ވިއެޓްނާމަށް ވަޑައިގެން އެގައުމުގެ ޑެޕިއުޓީ ޕްރައިމް މިނިސްޓަރު ބުއި ތާން ސޮންއާ ބައްދަލުކުރައްވައެވެ.

މިނިސްޓްރީން އެކްސްގައި ހިއްސާކޮށްފައިވާ ޕޯސްޓެއްގައި ބުނެފައިވަނީ ދެގައުމުގެ ގުޅުން އިތުރަށް ބަދަހިކޮށް، ރައްޔިތުންގެ ފައިދާއަށްޓަކައި ލަނޑުދަނޑިތައް ހާސިލުކުރުމުގައި އެއްބާރުލުން ދިނުމަށް އެއްބަސްވެފައިވާ ކަމަށެވެ.

ފޮރިން މިނިސްޓަރ ޑރ. ހަލީލް ވިއެޓްނާމަށް ވަޑައިގެންނެވީ ސައިބާ ކްރައިމާއި ދެކޮޅަށް ސުނައިޑެޓް ނޭޝަންސްގެ ގައުމުތަކުން އެއްބަސްވުމެއްގައި ސޮއިކުރުމުގެ ރަސްމިއްޔާތެއްގައި ބައިވެރިވެވަޑައިގަތުމަށެވެ.

މީގެ އިތުރުންވެސް ރާއްޖެއިން އިސްކަންދޭ ދާއިރާތަކުން އިތުރަށް ގުޅުންބަދަހިކުރުމާ ގުޅޭގޮތުން ވިއެޓްނާމް ސަރުކާރުގެ ކަމާބެހޭ އިސް ފަރާތްތަކާ ބައްދަލުކޮށް މަޝްވަރާ ކުރެއްވުމަށް ހަމަޖެހިފައިވެއެވެ.