ފަލަސްތީނުގައި ހިންގާ ނަސްލުނައްތާލުމުގެ ޖަރީމާގައި އިސްރާއީލަށް އެމެރިކާއިން ވާގިވެރިވާތީ ރާއްޖޭގެ ކުރީގެ ރައީސް މައުމޫން އަބްދުލްޤައްޔޫމް ފާޑުވިދާޅުވެއްޖެއެވެ.
ރައީސް މައުމޫން ކުރެއްވި ޕޯސްޓެއްގައި ވިދާޅުވީ، އެމެރިކާއިން ބުނާ ގޮތުގައި އެ ގައުމުން މަސައްކަތް ކުރަނީ މެދުއިރު މަތީގައި ހަނގުރާމައެއް ފެށުނަ ނުދޭން ވެގެންނެވެ. އެހެން ނަމަވެސް، އިއްޔެވެސް އިސްރާއީލަށް 20 ބިލިޔަން ޑޮލަރުގެ ހަތިޔާރު ވިއްކަން އެމެރިކާ ސަރުކާރުން އެއްބަސް ވެއްެޖެ ކަމަށް ވިދާވެ ރައީސް މައުމޫން ވަނީ އެމެރިކާއަށް ފާޑުވިދާޅުވެފައެވެ.
ފަލަސްތީނުގެ މުސްލިމުންނާ ދެކޮޅަށް އިސްރާއީލުން ހިންގަމުންދާ ލާއިންސާނީ ޢުދުވާންތަކަށް ބޭނުންވާ އަސްކަރީ އެހީތެރިކަން ފޯރުކޮށްދިނުމުގެ ގޮތުން 20 ބިލިޔަން އެމެރިކާ ޑޮލަރުގެ އަސްކަރީ އެހީގެ ޕެކޭޖެއް ފޮނުވަން އެމެރިކާއިން ވަނީ ފާސްކޮށްފައެވެ. އެމެރިކާގެ ޚާރިޖީ ވަޒީރު އެންތަނީ ބްލިންކަން ފާސް ކުރައްވާފައިވާ އެހީގެ ޕެކޭޖުގައި އެފް-15 މަރުކާގެ އަސްކަރީ މަތިންދާ ބޯޓުތައް ވެސް ހިމެނެއެވެ. އެ މަތިންދާބޯޓުތަކުގެ އަގު 19 ބިލިޔަން އެމެރިކާ ޑޮލަރަށް އަރައެވެ.
ޕެންޓެގަނުން ބުނީ އިސްރާއީލަށް ފޯރުކޮށްދޭން ފާސް ކޮށްފައިވާ އެހީގެ ޕެކޭޖުގައި އަސްކަރީ ޓޭންކުފަހަރަށް ބޭނުންވާ 774 މިލިޔަން ޑޮލަރުގެ ބޮމާއި, 60 މިލިިޔަން އެމެރިކާ ޑޮލަރުގެ މޯޓަރު ބޮމާއި, 583 މިލިޔަން ޑޮލަރުގެ އަސްކަރީ އުޅަނދުފަހަރު ހިމެނޭ ކަމަށެވެ.
ފަލަސްތީނުގައި ހިންގާ ލޭއޮހޮރުވުންތަކަށް އިސްރާއީލަށް އެންމެ ބޮޑަށް އެހީތެރިވާ ގައުމަކީ އެމެރިކާއެވެ.
ފަލަސްތީނުގެ ލީޑަރު އިސްމާއިލް ހަނިއްޔާ އީރާނުގައި ހުންނަވަނިކޮށް، ޝަހީދުކޮށްލި ހާދިސާއާ ގުޅިގެން ބަދަލުހިފުމުގެ ގޮތުން އީރާނުން އިސްރާއީލަށް ހަމަލާދިނުމަށް ތައްޔާރުވަމުންދާކަން އިއުލާންކުރީންސުރެ އެންމެ ބޮޑަށް މޭކަރައިގެން ވެސް އުޅެނީ އެމެރިކާއެވެ.
އެމެރިކާއިން ބުނީ އީރާނުން މި ހަފްތާގައި އިސްރާއީލަށް ހަމަލާދީފާނެ ކަމަށާއި، އެކަމަށް އެމެރިކާ ފުރިހަމައަށް ތައްޔާރުވެފައިވާ ކަމަށެވެ.
ވައިޓް ހައުސްގެ ގައުމީ ސަލާމަތާބެހޭ ތަރުޖަމާނު ޖޯން ކާރބީ ނޫސްވެރިންގާތު ވިދާޅުވީ، އީރާނާއި، އީރާނުގެ ބައިވެރިންގެ ފަރާތުން ވަރަށް ވަރުގަދަ ހަމަލާތަކެއް ދީފާނެ ކަމަށް ބެލެވިފައިވާ ކަމަށާއި އަދި މި ހަފްތާ ތެރޭގައި އެފަދަ ހަމަލާއެއް އަތުވެދާނެ ކަމަށް ވަރަށް ބޮޑަށް ބެލެވޭ ކަމަށެވެ.
ކާރބީ ވިދާޅުވީ، މެދުއިރުމަތީގައި އޮންނަ އެމެރިކާގެ އަސްކަރީ ފައުޖުތައް އިތުރުކޮށް، އިތުރު ހަތިޔާރުވެސް މިހާރު ޖަމާކޮށްފައިވާ ކަމަށެވެ.
ހަމާސްގެ ލީޑަރު އިސްމާއިލް ހަނިއްޔާ ތެހެރާނުގައި ހުންނަވަނިކޮށް އަވަހާރަކޮށްލުމާއި، ހިޒްބުﷲގެ ކޮމާންޑަރު ފުއާދު ޝުކުރް އަވަރާހަކޮށްލުމުން، އީރާނާއި ހިޒްބުﷲ އަދި ސަރަހައްދުގެ ގްރޫޕްތަކުން އިސްރާއީލަށް ހަމަލާ ދީފާނެކަމުގެ ކަންބޮޑުވުން އިސްރާއީލުން އެމެރިކާއާ ހިއްސާކޮށްފައިވާ ކަމަށް ކާރބީ ވިދާޅުވިއެވެ.
އެމެރިކާގެ ދިފާއީ ވަޒީރު ލޮއިޑް އޮސްޓިން ހޯމަދުވަހު އިސްރާއީލުގެ ބޮޑުވަޒީރު ނަތަންޔާހޫއަށް ފޯނުން ގުޅައި، މެދުއިރުމަތީގެ އެކި ގައުމުތަކުގައި ތިބި އެމެރިކާގެ ފައުޖުތަކާއި، މެޑިޓަރޭނިއަން ކަނޑުގައި އޮންނަ އެމެރިކާގެ ކަނޑުގެ ގާފިލާތައް ރުކުރުވާލައި، ގާބިލްކަން އިތުރުކޮށްފައިވާ ކަމަށް ނަތަންޔާހޫ ގާތުގައި ބުނެފައި ވެއެވެ.
