ސަކާގެ ދެ ލަނޑާއެކު މޮޅުވެ, އާސެނަލް އިތުބާރުގައި

ޔުއެފާ ޗެމްޕިއަންސް ލީގުގައި 3-0 ން މޮނާކޯ ބަލިކޮށް, އާސެނަލްއިން މަގާމް ވަރުގަދަކޮށް އިތުބާރު ދަމަހައްޓައިފިއެވެ.

އަމިއްލަ ދަނޑުގައި އާސެނަލްއިން ކުރިހޯދި މެޗުގައި ފުރަތަމަ ދެ ލަނޑު ޖެހީ ބުކަޔޯ ސަކާ އެވެ. 34 ވަނަ މިނިތްގައި ސަކާ ލީޑްނަގައިދިނީ ޖެސުސް ތަނަވަސްކޮސްދިން ފުރުޞަތަކުންނެވެ. އޭނާ ދެވަނަ ލަނޑު ޖެހީ 78 ވަނަ މިނިޓްގައެވެ. އާސެނަލްގެ ތިންވަނަ ލަނޑު މެޗު ނިމެން ތިން މިނިޓަށް ވެފައި ވަނިކޮށް ކައި ހާވާޓްޒް ޖެހީ ސަކާ ތަނަވަސްކޮށްދިން ފުރުޞަތަކުންނެވެ. ކައި ހާވާޓްޒް ކުޅެން ނިކުތީ ބަދަލަކަށެވެ. މެޗު ފަސޭހައިން ކާމިޔާބުކުރިޔަސް އާސެނަލް އަށް ވަނީ ލަނޑު ޖަހަން ލިބުނު ގިނަ ފުރުޞަތުތަކެއް ބޭކާރުވެސް ވެފައެވެ. ސަކާއާއި, އޮޑެގާޑާއި, ޖެސުސް އަށްވެސް އިތުރު ފުރުޞަތުތައް ލިބުނެވެ.

މޮޅާއެކު އާސެނަލް އޮތީ ޗެމްޕިއަންސް ލީގު ތާވަލްގެ 3 ވަނައިގައެވެ. އެއީ 13 ޕޮއިންޓާއެކުއެވެ. ނޮކްއައުޓް ބުރުގެ ސީދާ ޖާގައެއް އާސެނަލްއަށް ލިބުމުގެ ފުރުޞަތު ވަރަށް ބޮޑެވެ. އާސެނަލްއަށްވެސް މިބުރުގައި ބާކީ އޮތީ ދެ މެޗެވެ.

ބާސެލޯނާ މޮޅުކޮށްދިނީ ފެރަން ޓޮރޭޒް: ފޮޓޯ-ބާސެލޯނާ

ސްޕެއިން ލީގުގެ އެއްވަނާގައި އޮތް ބާސެލޯނާ އިން ވަނީ 3-2 ން ޖަރުމަނުގެ ބޮރޫޝިޔާ ޑޯޓްމަންޑް ބަލިކޮށް, ނޮކްއައުޓް ބުރުގެ ސީދާ ޖާގައަކާ ފިޔަވަޅަކަށް ގާތަށް ޖެހިލާފައެވެ. 53 ވަނަ މިނިޓްގައި ބާސެލޯނާއަށް ލީޑް ނަގައިދިނީ ޑެނީ އޮލްމޯ ތަނަވަސްކޮސްދިން ފުރުޞަތަކަކުން ރަފީނިއާ އެވެ. އެކަމަކު އޭގެ ހަތް މިނިތްފަހުން ލިބުނު ޕެނަލްޓީއަކުން ޑޯޓްމަންޑުން ނަތީޖާ ހަމަހަމަ ކުރިއެވެ. ދެވަނަ ފަހަރަށް ބާސާއަށް ލީދް ނަގައިދިނީ ބަދަލަކަށް ނިކުއިން ފެރަން ޓޮރޭޒް އެވެ. މިފަހަރުވެސް ލީޑް ދެމިއޮތީ ދެ މިނިޓެވެ. ސާހޯ ގުއިރޭސީ ލަނޑު ޖަހާ ނަތީޖާ ހަމަހަމަ ކޮށްދިނެވެ. ޑޯޓްމަންޑްގެ ޕެނަލްޓީ ވެސް ކާމިޔާބުކުރީ އޭނާއެވެ. 85 ވަނަ މިނިޓްގައި ބާސާ މޮޅުކޮށްދިނީ ވެސް ފެރަން ޓޮރޭޒް އެވެ. އޭނާ ބާސާ މޮޅުކޮށްދިނީ ޔަމާލް ތަނަވަސްކޮށްދިން ފުރުޞަތަކުންނެވެ. މެޗުގެ މޮޅު ކުޅުންތެރިއަކީ ޔަމާލް އެވެ.

މޮޅާއެކު ބާސެލޯނާ އޮތީ 15 ޕޮއިންޓް ހޯދައިގެން ދެވަނައިގައެވެ. އެއްވަނައިގަ ލިވަޕޫލް އޮތީ 18 ޕޮއިންޓާއެކުއެވެ.