75000 މެމްބަރުން ހަމަވުމުގެ އުފަލުގައި ރައްޔިތުންނަށް ޝުކުރު އަދާކުރުމުގެ ގޮތުން ޖަލްސާއެއް ބާއްވާނެ ކަމަށް ރައްޔިތުންގެ މަޖިލިސް ގެ ރައީސް އަދި ޕީއެންސީގެ ޗެއަރމެން އަބްދުއްރަހީމް ވިދާޅުވެއްޖެއެވެ.
11 ނޮވެމްބަރުގައި ބޭއްވުނު ޕީއެންސީ މެމްބަރޝިޕް ޑްރައިވް ނިންމުމުގެ ގޮތުން ޕާޓީގެ ހަރުގޭގައި ބޭއްވި ހަރަކާތުގައި ވާހަކަދައްކަވަމުން އަބްދުއްރަހީމް ވިދާޅުވީ މި ޖަލްސާ ބޭއްވުމަށް ވަކި ދުވަހެއް އަދި ކަނޑައެޅިފައި ނުވާ ކަމަށެވެ.
"ރައީސުލްޖުމްހޫރިއްޔާގެ ދޫފުޅުން އެ މަނިކުފާނަށްޓަކައި ރައްޔިތުން މި ވާ ގުރުބާނީގެ އަގު ދޭން އަސްލު ރައްޔިތުން ބޭނުންވާނީ. އެހެންމަ އިރާދަކުރެއްވިއްޔާ އެކަން އަޅުގަނޑުމެން ކުރާނަން." އަބްދުއްރަހީމް ވިދާޅުވިއެވެ.
އަބްދުއްރަހީމް ވިދާޅުވީ ރައްޔިތުންނަށް ހިދުމަތް ކުރުން ފިޔަވާ ދެވަނަ ނިޔަތެއް ސަރުކާރުގެ ނެތް ކަމަށާއި ދިވެހީންގެ ރާއްޖެއަކަށް ދިޔުމަށް ފެށި ދަތުރުގަ ހުރިހާ ރައްޔިތުންގެ އެއްބާރުލުން ބޭނުންވާނެ ކަމަށެވެ.
ފާހަގަކޮށްލެވޭ ގޮތުގައި ވެރިކަމަށް އައި އިރު ޕްރޮގްރެސިވް ނޭޝަނަލް ކޮންގްރެސްއަކީ 3،000 މެމްބަރުން ހަމަނުވާ ޕާޓީއެއް ކަމަށާއި، ނަމަވެސް ވެރިކަމަށް އަހަރު ނުވަނިސް، މިއަދު އިލެކްޝަންސް ކޮމިޝަންގެ ދަފްތަރުގައި 64،000 ވަރަކަށް މެމްބަރުން އެބަތިބި ކަމަށް ޕީއެންސީ ޕާލިމެންޓްރީ ގްރޫޕްގެ ޑެޕިއުޓީ ލީޑަރ އަދި ރައްޔިތުންގެ މަޖިލީހުގެ ވިލިމާލޭ ދާއިރާގެ މެމްބަރު މުޙައްމަދު އިސްމާއިލް ވަނީ ވިދާޅުވެފައެވެ.
ރައީސް ޑރ. މުޙައްމަދު މުޢިއްޒުއާއި، ޕީއެންސީގެ އަމާޒަކީ ޕާޓީއަށް 75،000 މެމްބަރުން ހަމަކުރުމަށް ކަމަށާއި، ނަމަވެސް ޕާޓީގެ އާންމު މެމްބަރުންނާއި، ސަޕޯޓަރުންގެ އަމާޒަކީ ޕީއެންސީގެ ދަފްތަރު 90،000 އަށް ގެންދިއުމަށް ކަމަށްވެސް މުޙައްމަދު އިސްމާއިލް ވަނީ ވިދާޅުވެފައެވެ.
