ވެރިކަންކުރާ ޕްރޮގްރެސިވް ނޭޝަނަލް ކޮންގްރެސް ޕާޓީއަށް މެމްބަރުން އިތުރުކުރުމަށް މިހާރު ކުރިއަށްގެންދާ މެމްބަރޝިޕް ޑްރައިވްގައި އާންމުންގެ ފަރާތުން ލިބެމުންދާ ތަރްހީބަށް އެ ޕާޓީން ޝުކުރު އަދާކޮށްފިއެވެ.
ޕާޓީއަށް މެމްބަރުން އިތުރުކުރުމަށް މާލެ ސަރަހައްދުގައި އިއްޔެފެށި 3 ދުވަހުގެ ބޮޑު ހަރަކާތުގެ ތެރެއިން މިއަދުގެ މަސައްކަތްތައް ފެށުމުގެކުރިން ހަރުގޭގައި ހުންނަވައި "އަސްލު ޓީވީ" އަށް ދެއްވި ޚާއްސަ އިންޓަރވިއުއެއްގައި ޕީއެންސީ ޕާލިމެންޓްރީ ގްރޫޕްގެ ޑެޕިއުޓީ ލީޑަރ އަދި ރައްޔިތުންގެ މަޖިލީހުގެ ވިލިމާލޭ ދާއިރާގެ މެމްބަރު މުޙައްމަދު އިސްމާއިލް ވިދާޅުވީ، އިއްޔެ ފެށި ހަރަކާތަކީ 3 ދުވަސްތެރޭ 7،500 ވަރަކަށް ފޯމު ފުރުމަށް ފެށި ހަރަކާތެއް ކަމަށެވެ.
އިއްޔެގެ މަސައްކަތުން އެކަނިވެސް، އަމާޒުކުރި އަދަދަށްވުރެންވެސް ރަނގަޅު ނަތީޖާއެއް ނެރެވޭނޭކަން އެނގިގެން ހިނގައްޖެ ކަމަށެވެ.
އެހެންކަމުން، ޕީއެންސީއަށާއި، ސަރުކާރަށާއި އަދި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއަށް ރައްޔިތުން ދެއްވާ ތަރްހީބަށްޓަކައި މުޙައްމަދު އިސްމާއިލް، ރައްޔިތުންނަށް ޝުކުރު އަދާކުރެއްވިއެވެ.
މުޙައްމަދު އިސްމާއިލް ވިދާޅުވީ، ޕީއެންސީން މެމްބަރޝިޕް ފޯމް ފުރަމުން ގެންދަނީ ވަޒީފާގެ ބިރު ދައްކައި، ފްލެޓުގެ ބިރުދައްކައި އެހެން ކަންކަން ކޮށްގެން ކަމަށް އިދިކޮޅު ފަރާތްތަކުން ކުރަމުންދާ ތުހުމަތުތަކަކީ ކަނޑައެޅިގެން ބުހުތާނު ދޮގުތަކެއް ކަމަށެވެ.
ޕީއެންސީގެ ޓީމުތަކުން ރަށުތެރެއަށް ނުކުމެ މީހުން އެއްވެއުޅޭ ސަރަހައްދުތަކާއި، ގެތަކަށާއި ގޭބިސީތަކަށް ގޮސްގެން ވަރަށް ބުރަކޮށް މަސައްކަތްކޮށް މެމްބަރުން އިތުރު ކުރުމަށް ފޯމުތައް ފުރަމުން ގެންދާއިރު، އާންމު ރައްޔިތުންގެ ތަރްހީބު އިތުރުވަމުންދަނީ ރައީސް ޑރ. މުޢިއްޒުއަކީ މީގެކުރިން ވެރިކަން ކުރެއްވި ބޭފުޅުންނަށްވުރެ މުޅިން ތަފާތު، ރައްޔިތުންނަށް އުންމީދީ ވެރިކަމެއް ކުރައްވާ ރައީސަކަށް ވުމުން ކަމަށް މުޙައްމަދު އިސްމާއިލް ވިދާޅުވިއެވެ.
ވެރިކަމަށް އައި އިރު ޕްރޮގްރެސިވް ނޭޝަނަލް ކޮންގްރެސްއަކީ 3،000 މެމްބަރުން ހަމަނުވާ ޕާޓީއެއް ކަމަށާއި، ނަމަވެސް ވެރިކަމަށް އަހަރު ނުވަނިސް، މިއަދު އިލެކްޝަންސް ކޮމިޝަންގެ ދަފްތަރުގައި 64،000 ވަރަކަށް މެމްބަރުން އެބަތިބި ކަމަށެވެ.
ރައީސް ޑރ. މުޙައްމަދު މުޢިއްޒުއާއި، ޕީއެންސީގެ އަމާޒަކީ ޕާޓީއަށް 75،000 މެމްބަރުން ހަމަކުރުމަށް ކަމަށާއި، ނަމަވެސް ޕާޓީގެ އާންމު މެމްބަރުންނާއި، ސަޕޯޓަރުންގެ އަމާޒަކީ ޕީއެންސީގެ ދަފްތަރު 90،000 އަށް ގެންދިއުމަށް ކަމަށްވެސް މުޙައްމަދު އިސްމާއިލް ވިދާޅުވިއެވެ.
