ބޮޑު ހަރަކާތަކާއެކު ޕީއެންސީއާ އަލަށް ގުޅުނު 28،000އަށް ވުރެ ގިނަ މެންބަރުންގެ ފޯމު އިލެކްޝަންސް ކޮމިޝަން (އީސީ)އާ ހަވާލު ކުރުމަށް މި މަހުގެ 17 ވަނަ ދުވަހު ދިއުމަށް އެ ޕާޓީން ނިންމާފައިވާ ކަމަށް ރައްޔިތުންގެ މަޖިލީހުގެ ވިލިމާލޭ ދާއިރާގެ މެމްބަރު އަދި ޕީއެންސީގެ ޕާލިމެންޓްރީ ގްރޫޕުގެ ޑެޕިއުޓީ ލީޑަރު މުހައްމަދު އިސްމާއިލް ވިދާޅުވެއްޖެއެވެ.
ޕީއެންސީއަށް މެންބަރުން އިތުރު ކުރުމަށް މާލެ ސަރަހައްދުގައި ބޮޑު ހަރަކާތެެއް ފެށީ މިއަދު ހެނދުނު 10:30ގައެވެ. ޕީއެންސީ ހަރުގެއިން މި ހަރަކާތް ފެށިއިރު، މި ހަރަކާތް މާލޭގެ އެކި ސަރަހައްދުތަކުގައި ކުރިއަށް ދާނެ ކަމަށް އެ ޕާޓީން ބުންޏެެވެ. އެކަމުގެ މައުލޫމާތު ހިއްސާކުރައްވާ މެންބަރު މުހައްމަދު އިސްމާއިލް ވިދާޅުވީ މިއީ ރާއްޖޭގެ ހުރިހާ ސަރަހައްދެއްގައި ކުރިއަށްގެންދާ ހަރަކާތެއް ކަމަށާ ކޮންމެ ހަފްތާ ބަންދެއްގައި ބޮޑެތި ސިޓީތަކުގައި މި ހަރަކާތް ހިންގުމަށް ނިންމާފައިވާ ކަމަށެވެ.
މި ސަރުކާރަށް ދެވަނަ ދައުރެއް ހޯދޭނީ ޕާޓީ ކުރިއަރުވައި، ޕާޓީއަށް މެމްބަރުން އިތުރުކޮށްގެންކަން ރައީސް ޑރ. މުހައްމަދު މުއިއްޒު ގަބޫލުފުޅުކުރައްވާ ކަން ފާހަގަކުރައްވާ މެމްބަރު ވިދާޅުވީ އެމަނިކުފާނުގެ ސިޔާސަތުތަކުގެ ދަށުން ޕާޓީ ކުރިއަރުވައި، މެމްބަރުން އިތުރު ކުރުމުގެ މަސައްކަތް ބާރު ސްޕީޑުގައި ކުރަމުންދާނެ ކަމަށެެވެ.
އެ ޕާޓީއަށް މެމްބަރުން އިތުރު ކުރަމުންދަނީ މަޖުބޫރުންނާއި ސިޔާސީ ނުފޫޒު ފޯރުވައި، މަގާމުގެ ބިރު ދައްކައިގެން ކަމަށް އިދިކޮޅުން ތުހުމަތު ކުރާއިރު އެކަމަށް ރައްދު ދެއްވައި މެމްބަރު ވިދާޅުވީ އެ ދައްކަނީ ވަރަށް ޣައިރު ޒިންމާދާރު ވާހަކައެއް ކަމަށެވެ.
އިދިކޮޅު ފަރާތްތަކުން ބައެއް ސިޔާސީ ބޭފުޅުން ހަގީގަތުގައި ވެސް އަޅުގަނޑުމެންނާ ދިމާލަށް ދެންމެ ފާހަގަކުރެއްވިހެން މަޖުބޫރުކޮށްގެންނޭ، އެކިއެކި ގޮތްގޮތަށް ސަރުކާރުން ނުފޫޒު ފޯރުވައިގެންނޭ ފޯމު ފުރަނީ، އެ ދައްކަނީ ވަރަށް ޣައިރު ޒިންމާދާރު ވާހަކައެއް. އެ ދައްކަނީ ރައްޔިތުންތެރޭ ފިތުނަ އުފައްދަން ދައްކާ ވާހަކައެއް. ރައްޔިތުން ބައިބައިކުރަން ދައްކާ ވާހަކައެއް، - ރައްޔިތުންގެ މަޖިލީހުގެ ވިލިމާލޭ ދާއިރާގެ މެންބަރު އަދި ޕީއެންސީގެ ޕާލިމެންޓްރީ ގްރޫޕުގެ ޑެޕިއުޓީ ލީޑަރު މުހައްމަދު އިސްމާއިލް
މުހައްމަދު އިސްމާއިލް އިތުރަށް ވިދާޅުވީ މި ވެރިކަން މިހާ ހިސާބަށް އައިރު ރައްޔިތުންނަށް ފެނިގެން ގޮސްފައިވާނީ ރައީސް މުއިއްޒު ވެވަޑައިގެން ވައުދުތައް ފުއްދަމުންދާ މަންޒަރު ކަމަށެވެ. އެހެންކަމުން އެ ޕާޓީއާ މެމްބަރުން ގުޅެމުން ދަނީ އެކަން ފެނި، މެމްބަރުން ނުހަނު ބޭނުންވެގެން ކަމަށް ވެސް މެމްބަރު ވިދާޅުވިއެވެ. އަދި މި ސަރުކާރާ މެދު ރައްޔިތުން ކުރަމުންދާ އުއްމީދުވެސް ދުވަހެއް ދުވަހަކަށް ބޮޑު ވަމުންދާ ކަމަށް މުހައްމަދު އިސްމާއިލް ވިދާޅުވިއެވެ.
ރައީސް ޑރ. މުއިއްޒުގެ ލަފާފުޅާއި އިރުޝާދާ އެއްގޮތަށް، ކޮންމެ ހަފުތާއަކު ވެސް ރާއްޖޭގެ ހުރިހާ ސިޓީތަކެއްގައި، މެމްބަރޝިޕް އިތުރުކުރުމުގެ ހަރަކާތްތަކެއް ހިންގަން ރާވާފައިވާ ކަމަށް އެ ޕާޓީން ބުނެއެވެ. އަދި މަދުވެގެން ކޮންމެ ހަފުތާއަކު އެއް ދުވަހު ސިޓީތަކުގައި މި ހަރަކާތް ކުރިއަށް ގެންދާނެކަން ކަމަށް ވެސް ޕީއެންސީން ވަނީ ބުނެފައެވެ.
ނޮވެމްބަރު މަހުގެ ނިޔަލަށް އެ ޕާޓީއަށް 75،000 މެމްބަރުން ހަމަކުރުމަކީ ޕީއެންސީގެ މިހަރަކާތުގެ އަމާޒެކެވެ.
ޕީއެންސީއަކީ ވެރިކަމަށް އައުމުގެ ކުރިން މެމްބަރުން މަދު ކުޑަ ޕާޓީއެއް ނަމަވެސް، މިވަގުތު އެ ޕާޓީއަކީ މެމްބަރުން ގިނަ، ރާއްޖޭގެ އެންމެ ކާމިޔާބު އެއް ސިޔާސީ ޕާޓީއެވެ.
