ދިވެހި ސަރުކާރުގެ ގެޒެޓުގައި ޝާއިޢުކުރުމަށް ފޮނުއްވާ ޤާނޫނީ ލިޔުންތައް (ގަވާއިދުތަކާއި، އުސޫލުތައް) ފޮނުއްވުމަށް ހަމަޖެހިފައިވާ ގޮތަށް ބަދަލު ގެންނަވައިވާ ކަމަށް ރައީސުލްޖުމްހޫރިއްޔާގެ އޮފީހުން ބުނެފިއެވެ.
މި ބަދަލު ގެންނަވާފައިވާކަން ހާމަކުރެއްވީ މިއަދު ރައީސުލްޖުމްހޫރިއްޔާގެ އޮފީހުން ނެރުއްވި ދެންނެވުމުގައެވެ.
ރައީސުލްޖުމްހޫރިއްޔާގެ އޮފީހުން ނެރުއްވި ބަޔާނުގައި ވަނީ ދިވެހި ސަރުކާރުގެ ގެޒެޓުގައި ޝާއިޢުކޮށްދިނުމަށް އެދި، ދައުލަތުގެ އެންމެހައި ވުޒާރާތަކާއި މުއައްސަސާތަކާއި އިދާރާތަކުން ފޮނުއްވާ ޤާނޫނީ ލިޔުންތައް އޮފީހަށް ފޮނުއްވުމުގައި ޢަމަލުކުރަމުން ގެންދA ގޮތަށް މިއަދުން ފެށިގެން ބަދަލު ގެންނެވުމަށް ނިންމަވައިފި ކަމަށެވެ.
އެގޮތުން، ދައުލަތުގެ އެންމެހައި ވުޒާރާތަކާއި މުއައްސަސާތަކާއި އިދާރާތަކުން، ދިވެހި ސަރުކާރުގެ ގެޒެޓުގައި ޝާއިޢުކޮށްދިނުމަށް އެދި، ޤާނޫނީ ލިޔުންތައް ފޮނުއްވާނީ، [email protected] އީމޭލަށް ކަމުގައިވެސް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެފައިވާ ކަމަށް ރައީސް އޮފީހުން ބުނެއެވެ،
ރައީސް އޮފީހުން ބުނީ ، ގެޒެޓުގައި ޝާއިޢުކުރުމަށް ފޮނުއްވާ ލިޔުމެއްގައި އިޞްލާޙުކުރަންޖެހޭ ކަންކަން ހުރި ނަމަ، އެ ކަންކަން އިޞްލާޙު ކުރުމަށްފަހު، ދިވެހި ސަރުކާރުގެ ގެޒެޓުގައި ޝާއިޢުކޮށް އެންމެ ފަހުގެ ދެލިކޮޕީ ފޮނުއްވާއިރު، ދައުލަތުގެ އެކި ވުޒާރާތަކާއި އެ ވުޒާރާތަކުގެ ދަށުން ހިންގަމުންދާ މުއައްސަސާތަކާއި އިދާރާތަކުން ފޮނުއްވާނީ، ރައީސުލްޖުމްހޫރިއްޔާ އޮފީހުގެ ނަންބަރު 4/2015 (ރަސްމީ ލިޔުންތަކުގައި ސޮއިކުރެއްވުމާއި ސިޓީ އެޑްރެސްކުރެއްވުން) ދެންނެވުމުގައި، ރައީސުލްޖުމްހޫރިއްޔާގެ އޮފީހަށް ފޮނުއްވާ ލިޔުންތަކުގައި ސޮއިކުރެއްވުމާ ގުޅޭގޮތުން ބަޔާންކޮށްފައިވާ ގޮތަށް، އެ ވުޒާރާގެ ވަޒީރު ނުވަތަ އެ ވަގުތަކު އެ ވުޒާރާ ހިންގެވުމާ ހަވާލުވެވަޑައިގެން ހުންނެވި ބޭފުޅަކު ސޮއިކުރައްވައިފައިވާ ލިޔުމަކާއެކުގައި ކަމަށް ރައީސް އޮފީހުން ބުނެއެވެ.
ދައުލަތުގެ އެކިއެކި ވުޒާރާތަކާއި އެ ވުޒާރާތަކުގެ ދަށުން ހިންގަމުންދާ މުއައްސަސާތައް ފިޔަވައި ދައުލަތުގެ އެހެން އިދާރާތަކާއި މުއައްސަސާތަކުން ދިވެހި ސަރުކާރުގެ ގެޒެޓުގައި ޝާއިޢުކޮށް ދިނުމަށް އެންމެ ފަހުގެ ދެލިކޮޕީ ފޮނުއްވާނީ ވެސް ރައީސުލްޖުމްހޫރިއްޔާގެ އޮފީހަށް ފޮނުއްވާ ލިޔުންތަކުގައި ސޮއިކުރެއްވުމާ ގުޅޭގޮތުން ހަވާލާދީފައިވާ ދެންނެވުމުގައި ބަޔާންކޮށްފައިވާ ގޮތަށް، އެ ތަނެއްގެ އެންމެ އިސްވެރިޔާ ނުވަތަ އެ ތަނެއް އެ ވަގުތަކު ހިންގެވުމާ ހަވާލުވެވަޑައިގެން ހުންނެވި ބޭފުޅަކު ސޮއިކުރުމަށް ފަހުގައި ކަމަށް ރައީސް އޮފީހުން ބުނެއެެވެ.
ރައީސް އޮފިހުން ބުނީ ގެޒެޓުގައި ޝާއިޢުކުރުމަށް، ޤާނޫނީ ލިޔުންތައް ފޮނުއްވާއިރު، ބަންޑާރަ ނައިބުގެ ޤާނޫނީ ލަފާފުޅު ހޯއްދަވަންޖެހޭ ދައުލަތުގެ އިދާރާތަކުން އެ ލަފާފުޅު ހޯއްދަވައި، އެ ލަފާފުޅާ އެއްގޮތަށް ޤާނޫނީ ލިޔުންތައް ތައްޔާރުކުރައްވައި، ބަންޑާރަ ނައިބުގެ ޤާނޫނީ ލަފާފުޅާއެކު ފޮނުއްވުމަށެވެ.
އަދި، އެ ލިޔުމަކާ ގުޅޭގޮތުން ރައީސުމްޖުމްހޫރިއްޔާގެ އޮފީހުގެ ފަރާތުން އެ ވުޒާރާއަކާ ނުވަތަ އެ މުއައްސަސާއަކާ ނުވަތަ އެ އިދާރާއަކާ މުޢާމަލާތުކުރާނެ ބޭފުޅެއްގެ ނަމާއި މަގާމާއި ގުޅޭނެ ފޯނު ނަންބަރު އެނގޭ ގޮތަށް ފޮނުއްވަމުން ގެންދެވުމަށާއި، ޤާނޫނީ ލިޔުންތައް ފޮނުއްވާއިރު ބަހުގެ ހަމަތަކަށާއި ޤާނޫނީ ހަމަތަކަށް ރަނގަޅަށް ބައްލަވައި ކުށް ފިލުއްވުމަށްފަހު، ދިވެހި ސަރުކާރުގެ ގެޒެޓުގައި ޝާއިޢުކުރާ ޤާނޫނީ ލިޔުންތައް ތައްޔާރުކުރާ ފޯމެޓުގައި ފޮނުއްވުމަށް ރައީސުލްޖުމްހޫރިއްޔާ ދަންނަވާފައިވާ ކަމަށެވެ.
ދިވެހި ސަރުކާރުގެ ގެޒެޓުގައި ޝާއިޢުކޮށްދިނުމަށް އެދިވަޑައިގެން، ދައުލަތުގެ އެންމެހައި މުއައްސަސާތަކާއި އިދާރާތަކުން ފޮނުއްވާ ޤާނޫނީ ލިޔުންތައް ރައީސުލްޖުމްހޫރިއްޔާގެ އޮފީހަށް ފޮނުއްވުމުގައި ޢަމަލުކުރައްވަމުން ގެންދަވާ ގޮތަށް ބަދަލު ގެންނެވި ކަމުގައި ވިޔަސް، ރައީސުލްޖުމްހޫރިއްޔާގެ އޮފީހުގެ ނަންބަރު 11/2010 (ސަރުކާރުގެ އޮފީސްތަކުންނާއި ދައުލަތުގެ އެކިއެކި މުއައްސަސާތަކުން ގަވާއިދު ހެދުން) ދެންނެވުމާއި، ރައީސުލްޖުމްހޫރިއްޔާގެ އޮފީހުގެ ނަންބަރު 25/2010 (ސަރުކާރުގެ އޮފީސްތަކުން ގެޒެޓްކުރުމަށް ގަވާއިދު ފޮނުއްވާއިރު، އެޓަރނީ ޖެނެރަލްގެ އޮފީހުގެ ލަފަޔާއެކު ފޮނުއްވުން) ދެންނެވުމަށް ބަދަލެއް ގެންނަވައިފައެއްނުވާ ކަމަށް ވެސް ރައީސް އޮފީހުން ބުނެއެވެ.
