ފީއެއް ނުނަގާ އާޓް އެގްޒިބިޝަންތައް ބާއްވައިދޭނަން: މިނިސްޓަރ

އާޓިސްޓުން އަތުން އެއްވެސް ފީއެއް ނުނަގާ، ޒުވާނުންނަށް އާޓް އެގްޒިބިޝަންތައް ބާއްވައިދެއްވާނެ ކަމަށް ޔޫތު މިނިސްޓަރ އިބްރާހިމް ވަހީދު ވިދާޅުވެއްޖެ އެވެ.

މިނިސްޓަރ މިހެން ވިދާޅުވީ މިނިސްޓްރީގެ ދަށުން ހިންގާ ނެޝެނަލް ސެންޓަރ ފޮ އާޓްސް އިން އިންތިޒާމުކޮށްގެން މިއަދު ހުޅުވި އާޓް އެގްޒިބިޝަން ހުޅުވުމުގެ ރަސްމިއްޔާތުގައި ވާހަކަދައްކަވަމުންނެވެ. ޝޭޑްސް އޮފް މައިންޑް ގެ ނަމުގައި ކުރިއަށް ގެންދާ މި އެގްޒިބިޝަނަކީ ނަފްސާނީ ދުޅަހެޔޮކަމާއި ގުޅޭގޮތުން ބާއްވާ އެގްޒިބިޝަނެކެވެ.

މިނިސްޓަރ ވިދާޅުވީ މި އެގްޒިބިޝަންގެ މައިގަނޑު އެއް މަގްސަދަކީ ޒުވާނުންނަށްމިފަދަ ފުރުސަތުތައް ހޯދައިދީ، މިކަމާއި މެދު ޒުވާނުން ދެކޭ ގޮތް އޮޅުންފިލުވުން ކަމަށެވެ. މީގެ ކުރިން ވެސް އާޓް ގެލެރީގައި ވަރަށް ގިނަ އެގްޒިބިޝަންތައް ބާއްވާފައިވާއިރު އޭގެ ތެރެއިން ގިނަ އެގްޒިބިޝަންތަކަކީ ބައިވެރިވާން ބޭނުންވާ ނަމަ ވަކި ފީއެއް ދައްކަން ޖެހޭ އެގްޒިބިޝަންތަކެއްކަން މިނިސްޓަރ ފާހަގަކުރެއްވި އެވެ. އަދި އެއީ ޒުވާނުންނަށް ކުރިމަތިވާ ދައްޗެއް ކަމަށާއި، އަމާޒަކީ އެކަން ހައްލުކޮށްދިނުން ކަމަށް މިނިސްޓަރ ވިދާޅުވި އެވެ.

މިނިސްޓަރ ވިދާޅުވީ މިއީ ފެށުމެއް ކަމަށާއި ކުރިއަށް އޮތް ތަނުގައި މިނިސްޓްރީގެ ފަރާތުން އެންސީއޭއާއި ގުޅިގެން މިފަދަ އާޓް އެގްޒިބިޝަންތައް ޒުވާނުންނަށް ޚާއްސަކޮށްގެން ބާއްވާނެ ކަމަށެވެ. އަދި އެގްޒިބިޝަންތަކުގައި ބައިވެރިވުމަށް އެއްވެސް ފީއެއް ދައްކަން ނުޖެހޭނެ ކަމަށް ވެސް ވިދާޅުވި އެވެ.

މީގެ އިތުރަށް މިނިސްޓަރ ވިދާޅުވީ މި އެގްޒިބިޝަންގައި ބައިވެރިވާން ހުޅުވާލި އިރު، މިވަރުގެ ބޮޑު ތަރުހީބެއް މިކަމަށް ލިބޭނެ ކަމަށް އުންމީދު ނުކުރައްވާ ކަމަށެވެ. އެކަމަކު ހީ ނުކުރާ ވަރުގެ ބޮޑު ތަރުހީބެއް ލިބިފައިވާ ކަމަށާއި، މުޅި ގެލެރީީގެ ފާރުތައް ޒުވާނުންގެ ހުނަރުތަކުން ފުރިފައިވާ ކަމަށް ވެސް ވިދާޅުވި އެވެ.

މި އެގްޒިބިޝަން ކާމިޔާބު ކަމާއި އެކު ފެށިފައިވާތީ މިނިސްޓަރ ވަނީ އެކަމުގައި ބައިވެރިވެ އެހީތެރިވެދެއްވި ހުރިހާ ފަރާތްތަކަށް ވެސް ޝުކުރު އަދާކުރައްވާފަ އެވެ. މިމަހު 17ގެ ނިޔަލަށް ނެޝަނަލް އާޓް ގެލެރީގައި މި އެގްޒިބިޝަން ކުރިއަށް ގެންދިއުމަށް ހަމަޖެހިފައިވާއިރު ފަންނުވެރިންގެ މަސައްކަތްތައް ވިއްކައިގެން އާމްދަނީ އެފަރާތްތަކަށް ލިބިގެންދާނެއެވެ.

އެގްޒިބިޝަންގެ ތާރީހުތަކުގައި އާޓް ގެލެރީއަށް ހިލޭ ވަދެވޭނެއެވެ.

ނަފްސާނީ ސިއްހަތުގެ ދުވަހާ ގުޅިގެން މިނިސްޓްރީގެ ފަރާތުން އާޓް އެގްޒިބިޝަނެއް ހުޅުވާލުމުގެ މައިގަނޑު މަގްސަދަކީ، ފަންނުވެރިކަމުގެ ތެރެއިން ނަފްސާނީ ހޭލުންތެރިކަން އިތުރުކުރުމާއި، ނަފްސާނީ ދުޅަހެޔޮކަމުގެ މުހިއްމުކަން ގެނެސްދިނުމެވެ.