ލުބުނާނަށް ދެމުންގެންދާ އުދުވާނީ ހަމަލާތައް ހުއްޓާލަން އެއްބަސްވާން އިސްރާއީލުން އުޅެނީ އެމެރިކާއިން "ބިރުދެއްކުމުން" ކަމަށް ރިޕޯޓްތައް ބުނަން ފަށައިފިއެވެ.
އެމެރިކާއިން ހުށަހެޅި ހަމަލާތައް ހުއްޓާލުމުގެ ހުށަހެޅުމަށް އިސްރާއީލު އެއްބަސްވެ، އެއަށް އަމަލުކުރުމާމެދު ނަތަންޔާހޫގެ ކެބިނެޓް މިއަދުގެ ވަގުތެއްގައި ބައްދަލުކޮށް ގޮތެއް ނިންމާނެ ކަމަށް ޚަބަރުތައް ބުނެއެވެ.
އިސްރާއީލުގެ ދުވަހު ނޫހެއް ކަމަށްވާ "ޓައިމްސް އޮފް އިޒްރޭލް" އިން ބުނެފައިވަނީ، އެމެރިކާގެ ހުށަހެޅުމަށް އެއްބަސްވާން އިސްރާއީލުން ނިންމަންއުޅޭ މައިގަނޑު އެއް ސަބަބަކީ އެމެރިކާގެ މިހާރު ރައީސް ބައިޑެންގެ ސަރުކާރުގެ "ބިރުދެއްކުންތައް" ކަމަށެވެ.
އދގެ ސަލާމަތީ މަޖިލީހުގައި އިސްރާއީލާ ދެކޮޅަށް ހުށަހެޅިފައިވާ ގަރާރަށް އެމެރިކާއިން ވޯޓު ދީފާނެތީ ނަތަންޔާހޫ ބިރުން އުޅޭ ކަމަށް، އިސްރާއީލުގެ އެތެރޭގެ ނަން ހާމަނުކުރާ މަސްދަރުތަކާ ހަވާލާދީ ނޫހުން ބުނެފައި ވެއެވެ.
އަދި އެމެރިކާއިން އިސްރާއީލަށް ބައެއް ކަހަލަ އިކުއިޕްމަންޓް ނުދޭން މިމަހުގެ ކުރީކޮޅު ނިންމާފައިވާތީ، އެކަން އިތުރަށް ދަމަހައްޓަފާނެތީވެސް ނަތަންޔާހޫ ކަންބޮޑުވާ ކަމަށް ވެއެވެ.
އެފަދަ އިކުއިޕްމަންޓްތަކުގެ ތެރޭގައި، ފަލަސްތީނުގެ ރަށްތަކަށް ވަދެގަނެ ގެދޮރު ސުންނާފަތިކުރަން ބޭނުންކުރާ ބުލްޑޯޒަރާއި، އެނޫންވެސް އެޒާތުގެ ތަކެތި ހިމެނެއެވެ.
އިސްރާއީލުން އެމެރިކާއަށް ކަނޑައަޅާފައި ހުންނަ އެމްބަސެޑަރ މައިކަލް ހާރޒޮގްވެސް ބުނީ، އެމެރިކާއިން ހުށަހަޅާފައިވާ ހުށަހެޅުމަށް އިސްރާއީލު އެއްބަސްވެއްޖެނަމަ އެމެރިކާގެ ހަތިޔާރު އިސްރާއީލަށް ފޯރުކޮށް ދިނުމުގައި މިހާރު ހުރި ހުރަސްތައް ނެތިގެންދާނެ ކަމަށެވެ.
ލުބުނާނަށް ދެމުންގެންދާ ހަމަލާތައް ހުއްޓާލަން އިސްރާއީލު އެއްބަސްވި ނަމަވެސް، މިއީ ހިޒްބުﷲއާ ދެކޮޅަށް ކުރާ ހަނގުރާމައަށް ނިމުމެއް އައުން ނޫންކަމަށް ރިޕޯޓްތައް ބުނެއެވެ.
އިސްރާއީލުގެ ބައެއް ވެރިން ބުނަމުންގެންދަނީ، ހިޒްބުﷲ ނައްތާލާފައިނޫނީ އިސްރާއީލު ހުއްޓާނުލާނެ ކަމަށެވެ.
އެމެރިކާއިން ހުށަހަޅާފައިވާ ހުށަހެޅުމުގައިވަނީ، ލުބުނާނުގެ ދެކުނަށް އަރާފައިވާ އިސްރާއީލު ސިފައިން ދެކުނުން ފޭބުމާއި، ލުބުނާނުގެ ދެކުނު ފަޅީގެ ސަލާމަތީ ކަންކަން ލުބުނާނުގެ ސިފައިން ބެލެހެއްޓުން ހިމެނެއެވެ.
އަދި އދގެ 1701 ގަރާރު ތަންފީޒުކުރަންވެސް އެމެރިކާގެ ހުށަހެޅުމުގައި ވެއެވެ. އިސްރާއީލާއި ހިޒްބުﷲއާ ދެމެދު 2006 ވަނަ އަހަރުކުރި ހަނގުރާމައަށްފަހު އެކަށައެޅި އެ ގަރާރުގައި އިސްރާއީލާއި ހިޒްބުﷲ އެއްބަސްވެފައިވަނީ، ލުބުނާނުގެ ދެކުނުގެ އިސްރާއީލު ބޯޑަރާ 30 ކިލޯމީޓަރު ފަހަތަށް، ލިޓާނީ ކޯރުގެ ފަހަތަށް ހިޒްބުﷲ ޖެހުމެވެ.
