އުރުދުންގެ ވެރިރަށް އައްމާންގައި ހުންނަ އިސްރާއީލު އެމްބަސީ ކައިރީގައި ބަޑިޖެހުމުގެ ހާދިސާއެއް ހިނގައިފިއެވެ.
އައްމާންގައި އިސްރާއީލު އެމްބަސީ ހުންނަނީ ރާބިއާ ނަމަކަށްކިޔާ އަވަށެއްގައެވެ.
އިސްރާއީލު އެމްބަސީ ކައިރީގައި ތިބި ފުލުހުންގެ ގަޔަށް ފުރަތަމަ ބަޑިޖެހީ ހަތިޔާރު ހިފައިގެން ހުރި މީހެކެވެ. އެމީހާ ދިން ބަޑީގެ ހަމަލާގައި ފުލުހުންގެ 3 މީހުން ޒަޚަމްވިއެވެ.
ނަމަވެސް، ފުލުހުންވަނީ ބަޑި ހިފައިގެން ހުރި މީހާގެ ގަޔަށް ބަޑިޖަހައި މަރާލާފައެވެ.
އުރުދުންއަކީ އިސްރާއީލާ ސިޔާސީ ގުޅުން ގާއިމްކޮށްފައި އޮންނަ ގައުމެކެވެ.
އުރުދުންގައި، އިސްރާއީލުގެ އެމްބަސީ ހުންނަ ސަރަހައްދަކީ އުރުދުންގެ އާންމުން އާންމުކޮށް އިސްރާއީލާ ދެކޮޅަށް މުޒާހަރާކުރާ ސަރަހައްދެކެވެ. އެކަމާހެދި އެ ހިސާބު އޮންނަނީވެސް ވަރަށް ނުތަނަވަސްކޮށެވެ.
ފުލުހުންނަށް ދިން ބަޑީގެ ހަމަލާއާ ގުޅިގެން އުރުދުން ސަރުކާރުގެ ތަރުޖަމާނު އަދި ކޮމިއުނިކޭޝަން މިނިސްޓަރ މުހައްމަދު އަލް މުމާނީ ވަނީ، މިއީ ޑިއުޓީ އަދާކުރަން ތިބި އާންމު ސަލާމަތީ ބާރަށް ދެވުނު "ޓެރަރިސްޓު" ހަމަލާއެއް ކަމަށެވެ.
އަދި މިކަންކުރި ބަޔަކާ ދެކޮޅަށް ހަރުކަށި ފިޔަވަޅު އަޅުއްވާނެ ކަމަށްވެސް ވައުދުވެވަޑައިގެންނެވިއެވެ.
އުރުދުންއަކީ، އިސްރާއީލާ ދެވަނައަށް ސިޔާސީ ގުޅުން ގާއިމްކުރި އަރަބި ގައުމެވެ. އެހެންނަމަވެސް، އުރުދުން ސަރުކާރުގެ އެ ނިންމުން އުރުދުންގެ ގިނަ ރައްޔިތުން އަދިވެސް ބަލައެއް ނުގަނެއެވެ.
އުރުދުންގެ އާންމުން ދެކޭގޮތުގައި، ސަރުކާރުން އިސްރާއީލާ ސިޔާސީ ގުޅުން ގާއިމްކޮށް އާދައިގެ ގުޅުމެއް ގާއިމްކުރުމަކީ ފަލަސްތީނު ރައްޔިތުން ޣައްދާރުވުމެވެ.
