އިސްތިއުމާރީ އިސްރާއީލުގެ ޓެރަރިސްޓުން ޣައްޒާގެ އުތުރު އެއްކޮށް ބަންދުކޮށް ކުޑަކުދިންނާއި، އަންހެނުންނާއި، އެނޫންވެސް އާންމުން ޝަހީދުކޮށް، ގެދޮރާއި އިމާރާތްކަށް ބޮންއަޅައި ލާއިންސާނީ ބޮޑެތި ޖަރީމާތައް ހިންގަމުންގެންދާތާ 45 ދުވަސް ވެއްޖެއެވެ.
ޣައްޒާގެ އުތުރަށް އިންސާނީ އެއްވެސް އެހީއެއް އެތެރެކުރިޔަނުދީ، ހުރިހާ ގޮތަކުން ބަންދުކޮށް، ބުލްޑޯޒަރާއި ބަރު ހަތިޔާރާއެކު އެއްގަމުމަގުން އަރައި، ފުރާނަ ސަލާމަތްކުރަން އާންމުން ވަދެތިބި ހުރިހާ ތަނަކަށް ގެންދަނީ ހަމަލާދީ އެތައްބަޔަކު ޝަހީދުކުރަމުންނެވެ.
އާންމުން ހިމާޔަތް ހޯދައިގެން ތިބި ތަންތަނުން ނެރެ، އެ ތަންތަނުގައި ހުޅުޖަހައި ގެންދަނީ އަންދަމުންނެވެ.
ޣައްޒާގެ އުތުރުގައި ހުރި ހުރިހާ ހޮސްޕިޓަލަކާއި، ސްކޫލް އިމާރާތްތަކުގެ އިތުރުން، މިސްކިތްތަކަށްވެސް ހަމަލާދީ ހަލާކުކޮށްލާފައި ވެއެވެ.
ނުވިތާކަށް، ވައިގެމަގުން ގެންދަނީ އެކި ހިސާބުތަކަށް ބޮންއަޅަމުންނެވެ.
އިސްރާއީލުގެ ޓެރަރިސްޓު ސިފައިން މިހާރުވަނީ، ޣައްޒާގެ މުޅި އުތުރު "ހަނަފަސް ސަހަރާއަކަށް" ހަދާލާފައެވެ.
އިސްރާއީލުގެ އުދުވާނުތަކާހެދި ޣައްޒާގެ އުތުރުގައި މިހާރު ބާކީ ތިބި 95،000 އެއްހާ އާންމުން ކާނޭ އެއްޗެއް، ބޯނޭ ފެންފޮދެއް ނުލިބި ނުހަނު ހިތްދަތިތަކުގައި ތިބިއިރު، ކުޑަކުދިން މިހާރުވަނީ ބަނޑަށްމަރުވާން ފަށާފައެވެ.
މިހާލަތުގައި ތިއްބައި، ޣައްޒާގެ އުތުރަށް މޫސުން ގޯސްވެ ވަރަށް ބޯކޮށް ވާރޭވެހެން ފެށުމާއެކު، އާންމުންގެ ހާލަތު މިހާރު އިހުނަށްވުރެ ދެރަވެފައިވާ ކަމަށް ފަލަސްތީނު ރެފިއުޖީ އޭޖެންސީން ބުނެއެވެ.
އދގެ ސަލާމަތީ މަޖިލީހުން ރޭގައި ބޭއްވި ބައްދަލުވުމަކަށް މައުލޫމާތު ދެއްވަމުން، އދއިން މެދުއިރުމައްޗަށް ކަނޑައަޅާފައި ހުންނަވާ ސުލްހައިގެ މަންދޫބު ތޯރް ވެނެސްލެންޑް ވިދާޅުވީ، ޣައްޒާގެ އުތުރުގެ މިހާރުގެ ހާލަތަކީ، މި ހަނގުރާމަ ފެށުނުފަހުން ފެނިގެންދާ އެންމެ ގޯސް ހާލަތު ކަމަށާއި، ހާލަތު ރަނގަޅުވާނެ ގޮތެއްވެސް ފެންނާން ނެތް ކަމަށެވެ.
އދއާއި، ބައިނަލްއަގްވާމީ އެއްވެސް ޖަމާއަތެއްގެ މީހަކުވެސް އަދި ނޫސްވެރިންވެސް ޣައްޒާގެ އުތުރަށް ވަނުމަށް އިސްރާއީލުން ހުއްދައެއް ނުދިނެވެ.
ޣައްޒާގެ ހެލްތު މިނިސްޓްރީން މިއަދު ބުނެފައިވަނީ، 2023 ވަނަ އަހަރުގެ އޮކްޓޫބަރުމަހުގެ 7 ވަނަ ދުވަހުން ފެށިގެން އިސްތިއުމާރީ އިސްރާއީލުން ޣައްޒާއަށް ދެމުންގެންދާ ހަމަލާތަކުގައި ޝަހީދުކޮށްލި މީހުންގެ އަދަދު 43،972 އަށް އަރާފައިވާ ކަމަށެވެ.
އެ މުއްދަތުގެ ތެރޭގައި ޒަޚަމްވި މީހުންގެ އަދަދު 104،008 އަށް އަރާފައިވާ ކަމަށްވެސް ބުނެފައި ވެއެވެ.
