މިދިޔަ ހަފްތާގެ ބުރާސްފަތި ދުވަހު ސްރީލަންކާގައި ބޭއްވި އާންމު އިންތިޚާބު ކާމިޔާބުކުރި ޕީޕަލްސް ނޭޝަން ޕަވަރ ޕާޓީގެ ސަރުކާރުގެ ކެބިނެޓް މިއަދު ހުވާކޮށްފިއެވެ.
އައު ކެބިނެޓް ހުވާ ކުރެއްވުމުގެ ރަސްމިއްޔާތު ބާއްވާފައިވަނީ މިއަދު ހެނދުނު ސްރީލަންކާގެ ވެރިރަށް ކޮޅުނބުގައި ހުންނަ ޕްރެޒިޑެންޝަން ސެކްރެޓޭރިއެޓުގައެވެ. ކެބިނެޓް މެމްބަރުން މަގާމުގެ ހުވާ ކުރެއްވީ ރައީސް އަނުރަ ކުމާރަ ޑިސަޔަނަކަގެ ކުރިފުޅުމަތީގައެވެ.
ކެބިނެޓުގައި 22 މިނިސްޓަރުން ހިމެނިވަޑައި ގަންނަވާއިރު، މިނިސްޓަރ އޮފް ޑިފެންސާއި، މިނިސްޓަރ އޮފް ފިނޭންސް، މިނިސްޓަރ އޮފް ޕްލޭނިންގ އެންޑް ޑިޖިޓަލް އިކޮނޮމީއާ ހަވާލުވެވަޑައިގެންނެވީ ރައީސް އަނުރަ ކުމާރަ ޑިސަޔަނަކައެވެ.
ސަރުކާރުގެ ބޮޑުވަޒީރުކަމުގެ މަގާމަށް އައްޔަން ކުރައްވާފައިވަނީ ވަގުތީ ބޮޑުވަޒީރަކަށް ހުންނެވި ޑރ. ހަރިނީ އަމަރަސޫރިޔައެވެ. އެކަމަނާ ވެވަޑައިގެންނެވީ ސްރީލަންކާގެ 16 ވަނަ ބޮޑުވަޒީރަށެވެ.
ޑރ. ހަރިނީ އަމަރަސޫރިޔަ:
ކެބިނެޓުގައި ހިމެނޭ އެޑިއުކޭޝަން، ހަޔަރ އެޑިއުކޭޝަން އަދި ވޮކޭޝަނަލް އެޑިއުކޭޝަން މިނިސްޓްރީގެ ޒިންމާތައް ހަވާލުކުރައްވާފައިވަނީ ބޮޑުވަޒީރު ހަރިނީއާއެވެ.
އައު ސަރުކާރުގެ ފޮރިން މިނިސްޓަރުގެ މަގާމަށް އައްޔަން ކުރައްވާފައިވަނީ ވިޖިތާ ހީރަތުއެވެ. ފޮރިން އެމްޕްލޯއިމަންޓް އެންޑް ޓުއަރިޒަމް މިނިސްޓްރީވެސް ބަލަހައްޓަވާނީވެސް އޭނާއެވެ.
އައު ކެބިނެޓުގައި ވަރަށް ގިނަ ޢިލްމީ ބޭފުޅުން ހިމެނިވަޑައިގަންނަވައެވެ.
ސްރީލަންކާގެ ރައީސް އަނުރަ ކުމާރަ ޑިސަޔަނަކަ، ބޮޑުވަޒީރާއި އަދި ކެބިނެޓް މި އައްޔަން ކުރެއްވީ، މިދިޔަ ބުރާސްފަތި ދުވަހު ބޭއްވި އާންމު އިންތިޚާބު ބޮޑު ތަފާތަކުން ކާމިޔާބު ކުރެއްވުމަށް ފަހުގައެވެ.
ސްރީލަންކާގެ ޕާލަމެންޓުގައި 225 ގޮނޑި ހިމެނޭއިރު، ރައީސް އަނުރަ ކުމާރަ ޑިސަނަޔަކަގެ ނޭޝަނަލް ޕީޕަލްސް ޕަވަރ ކޯލިޝަނުން ވަނީ 159 ގޮނޑި ނަގާފައެވެ. މިއީ، ޕާލަމެންޓުގެ ތިންބައިކުޅަ ދެބަޔަކަށް ވުރެންވެސް ގިނަ ގޮނޑިއެވެ.
މަގާމުގެ ހުވާ ކުރެއްވި ކެބިނެޓް މިނިސްޓާރުންނާ މުޚާތަބު ކުރައްވައި ރައީސް އަނުރަ ކުރާމަ ޑިސަނަޔަކަ ވިދާޅުވީ، ހުރިހާ މިނިސޓަރުންނަށްވެސް އެބޭފުޅުންނަށް ލިބިވަޑައިގެންފައިވާ ބާރުތަކުގެ ހައްދު އެނގިވަޑައިގަންނަވާ ކަމަށް އުްމީދު ކުރައްވާ ކަމަށާއި، އަދި ޖަވާބުދާރީވާންޖެހޭކަން އެނގިވަޑައިގެން އަމަލު ކުރައްވާނެ ކަމަށެވެ.
ރައީސް އަނުރަގެ ވާހަކަފުޅުގައި، ކެބިނެޓުގައި ހިމެނިވަޑައިގަންނަވާ ގިނަ މިނިސްޓަރުންނަކީ، މިނިސްޓަރުކަމުގެ އިތުރުން ޕާލަމެންޓަށްވެސް މުޅި އައު ބޭފުޅުންކަން ފާހަގަ ކުރެއްވިއެވެ.
އެހެން ނަމަވެސް، ރައީސް ވިދާޅުވީ، އޭނާ އައްޔަން ކުރެއްވި ކެބިނެޓް ހުރިހާ މިނިސްޓަރުންނަކީވެސް އިޚްލާސްތެރި، ކޮރަޕްޝަނުން އެއްކިބާވެފައިވާ، ރައްޔިތުންގެ އުންމީދުތައް ފުރިހަމަކޮށްދިނުމުގެ ގާބިލްކަން ލިބިވަޑައިގެންފައިވާ ބޭފުޅުންކަމުގެ ފުރިހަމަ ޔަގީންކަން އެބައޮތް ކަމަށެވެ.
