އިސްރާއީލަކީ ދައުލަތެއް ކަމަށް ގަބޫލުކުރުމުގެ ވިސްނުމެއް މެލޭޝިޔާއިން ނުގެންގުޅޭ ކަމަށް، މެލޭޝިޔާގެ ބޮޑުވަޒީރު އަންވަރު އިބްރާހިމް ތަކުރާރު ކުރައްވައިފިއެވެ.
އަންވަރު އިބްރާހިމް މިކަން ތަކުރާރު ކުރެއްވީ، ޕޭރޫގައި ކުރިއަށްދާ އޭޝިޔާ ޕެސިފިކް އިކޮނޮމިކް ކޯޕަރޭޝަން – އޭޕެކް ސަމިޓުގެ ތެރެއިން އިއްޔެ ބޭއްވި ޕްރެސް ކޮންފަރެންސެއްގައި ވާހަކަފުޅު ދައްކަވަމުންނެވެ.
އިސްރާއީލާމެދު މެލޭޝިޔާއިން ގެންގުޅޭ މަގާމު ބަދަލުކުރުމުގެ ވިސްނުންތަކެއް ސަރުކާރުން ގެންގުޅޭކަމަށް ދެކެވޭ ވާހަކަތަކަށް ރައްދުދެއްވައި މެލޭޝިޔާގެ ބޮޑުވަޒީރު އަންވަރު އިބްރާހިމް ވިދާޅުވީ، އިސްރާއީލަކީ ދައުލަތެއް ކަމަށް މެލޭޝިޔާއިން ގަބޫލު ނުކުރާނޭ ކަމަށާއި، ހަމަ އެއާއެކު، ފަލަސްތީނު ރައްޔިތުންނަށް އިންސާފު ހޯދައިދިނުމަށް ކުރެވޭ މަސައްކަތްތަކުގައި މެލޭޝިޔާއިން ތާއީދު ދޭނީ ފަލަސްތީނަށް ކަމަށެވެ.
އަންވަރު އިބްރާހިމް ވިދާޅުވީ، އިސްރާއީލުގެ މައްސަލާގައި މެލޭޝިޔާގެ މަގާމު ބަދަލުކުރުމުގެ ވިސްނުންފުޅެއް އޭނާ ނުގެންގުޅުއްވާ ކަމަށެވެ.
އަންވަރު އިބްރާހިމް ވިދާޅުވީ، އދގެ ނިޒާމުގެ ތެރެއިން އިސްރާއީލަކީ އދގެ މެމްބަރު ގައުމެއްގެގޮތުގައި ކަނޑައަޅާފައި އޮތް ނަމަވެސް، އިސްރާއީލަކީ ގައުމެއްގެގޮތުގައި ބަލައިގަންނަން މެލޭޝިޔާ ދެކޮޅު ކަމަށެވެ.
މެލޭޝިޔާގެ ބޮޑުވަޒީރު ވަނީ، އިސްރާއީލުން ހިންގަމުންގެންދާ އުދުވާނުތަކުގެ މައްސަލަ، އޭޕެކް ސަމިޓުގައިވެސް އުފުލާފައެވެ.
ގައުމެއްގެ ހައްގުތައް ނިގުޅައިގަންނަމުންދާ ބަޔަކާއެކު އިގްތިސާދާއި މިނިވަން ވިޔަފާރީގެ ވާހަކަ ދައްކާނީ ކިހިނެއްތޯ، އަންވަރު އިބްރާހިމް ސުވާލު ކުރެއްވިއެވެ.
އިސްރާއީލުން ހިންގަމުންގެންދާ އުދުވާނުތަކަށް އިޝާރާތް ކުރައްވައި އަންވަރު ވިދާޅުވީ، ތަހުޒީބު ގައުމުތަކުގެ މުޖުތަމައަށް އިސްރާއީލު ނިސްބަތްނުވާ ކަމަށެވެ.
އަނިޔާވެރިކަމާ ދެކޮޅަށް ފިޔަވަޅު އަޅަންޖެހޭ ކަމަށާއި، އިސްރާއީލަށް ދަތިކޮށް، ސަސްޕެންޑްކޮށް އަދި އިސްރާއީލު އދއިންވެސް ބޭރުކޮށްލަންޖެހޭ ކަމަށް މެލޭޝިޔާގެ ބޮޑުވަޒީރު ވިދާޅުވިއެވެ.
ފަލަސްތީނުގެ މައްސަލައަކީ އިންސާފު ހޯދުމުގެ މައްސަލައެއް ކަމަށާއި، ފަލަސްތީނު ރައްޔިތުންގެ ހައްގުގައި އަޑުއުފުލަންޖެހުނު ކޮންމެތާކު މެލޭޝިޔާއިން އެކަން ކުރާނޭކަމަށް ބޮޑުވަޒީރު އަންވަރު އިބްރާހިމް ވިދާޅުވިއެވެ.
