އަމުރު ތަންފީޒުކުރުމަށް އެއްބާރުލުން ދިނުމަށް، އިންޓަރނޭޝަނަލް ކްރިމިނަލް ކޯޓުގެ ޗީފް ޕްރޮސިކިއުޓަރ ކަރިމް ޚާން، އެ ކޯޓުގެ މެމްބަރު ހުރިހާ ގައުމަކަށް ގޮވާލައްވައިފިއެވެ.
އިސްރާއީލުގެ އަނިޔާވެރި ބޮޑުވަޒީރު ނަތަންޔާހޫއާއި، ކުރިން ޑިފެންސް މިނިސްޓަރަކަށް ހުރި ގަލަންޓް އަދި ހަމާސްގެ ހަމާސްގެ އަސްކަރީ ގޮފީގެ ވެރިޔާ މުޙައްމަދު ދިއާބް އިބްރާހިމް އަލް-މަސްރީ ހައްޔަރުކުރުމަށް ކޯޓުން ނެރުނު އަމުރާ ގުޅިގެން ކަރިމް ޚާން ނެރުއްވި ބަޔާނެއްގައި ވިދާޅުވެފައިވަނީ، ކޯޓު އުފެއްދުމުގެ މުއާހަދާގައި ބައިވެރިވެފައިވާ ހުރިހާ ގައުމަކުން ވެފައިވާ އަހުދުގެމަތީގައި ގާއިމްވެ ތިބެންޖެހޭނޭ ކަމަށެވެ. ކޯޓުގެ އަމުރުތަކަށް އަމަލުކުރަންޖެހޭނޭ ކަމަށެވެ.
އިންޓަރނޭޝަނަލް ކްމިމިނަލް ކޯޓު އުފެއްދުމުގެ މުއާހަދާގައި 125 ގައުމުން ބައިވެރިވެ ސޮއިކޮށްފައި ވެއެވެ.
އެ މުއާހަދާގެދަށުން، ހައްޔަރުކުރަން ކޯޓުން އަމުރުނެރުނު ކޮންމެ މީހަކު މެމްބަރު ގައުމަކަށް ދިޔަޔަސް، ވަގުތުން ހައްޔަރުކޮށް ޝަރީއަތް ހިންގުމަށްޓަކައި ނެދަރލޭންޑްގެ ހޭގްގައި ހުންނަ ކޯޓާ ހަވާލުކުރަން ޖެހެއެވެ.
އިންޓަރނޭޝަނަލް ކްރިމިނަލް ކޯޓުން ނެރުނު އަމުރާ ގުޅިގެން، މެމްބަރު ބައެއް ގައުމުތަކުން އަމުރަށް އިހްތިރާމްކޮށް އަމަލުކުރާނޭކަން ހާމަކުރަމުންވެސް އެބަ ގެންދެއެވެ.
އެގޮތުން، އައިސީސީގެ ކޯޓު ހުންނަ ނެދަރލޭންޑްސްއިން ކޯޓުގެ އަމުރު ތަންފީޒުކުރާނޭކަން ހާމަކޮށްފައި ވާއިރު، ނަތަންޔާހޫ ނުވަތަ ގަލަންޓް އަޔަސް ހައްޔަރުކުރާނޭ ކަމަށް އިޓަލީން ވަނީ ހާމަކޮށްފައެވެ.
އިސްރާއީލުން ހިންގާ ނަސްލުނައްތާލުން ހުއްޓުވަން އައިސީސީގެ އަމުރަކީ މުހިންމު އަމުރެއް ކަމަށް ތުރުކީން ބުނެފައިވާއިރު، އިރާގުންވަނީ "މިނިވަން ހުރިހާ ގައުމަކުން" ކޯޓުގެ އަމުރު ތަންފީޒުކުރަން ގޮވާލާފައެވެ.
އިނގިރޭސިވިލާތުން ބުނެފައިވަނީ، އައިސީސީގެ ނިންމުމަށް އެގައުމުން އިހްތިރާމްކުރާ ކަމަށެވެ. ކެނެޑާއިންވެސް ބުނެފައިވަނީ އައިސީސީގެ އަމުރަށް އިހްތިރާމްކުރާނޭ ކަމަށެވެ.
އައިސީސީގެ އަމުރަށް އަމަލުކޮށް އަދި އިސްރާއީލާއެކު އޮންނަ ވިޔަފާރީގެ ގުޅުންތަކަށް ދަތިކުރުމަށް ބެލްޖިއަމުންވަނީ ޔޫރަޕަށް ގޮވާލާފައެވެ.
ޔޫރަޕިއަން ޔޫނިއަންގެ ޚާރިޖީ ގުޅުންތަކާބެހޭ ވެރިޔާ ޖޯސެފް ބޮރެލް ވިދާޅުވީ، އައިސީސީގެ ހުކުމް ނުވަތަ އަމުރު ތަންފީޒުކުރުމަކީ އީޔޫގައި ހިމެނޭ މެމްބަރު 27 ގައުމުގެ މައްޗަށް ލާޒިމް ކަމެއް ކަމަށެވެ.
އިންޓަރނޭޝަނަލް ކްރިމިނަލް ކޯޓުގެ ގަރާރުގައި ސޮއި ނުކުރާ ގައުމުތަކުގެ ތެރޭގައި އެމެރިކާއާއި އިސްރާއީލު ހިމެނެއެވެ.
އިންޓަރނޭޝަނަލް ކްރިމިނަލް ކޯޓަކީ، އެއްވެސް ފަރާތެއްގެ ނުފޫޒެއް ނުހިނގާގޮތަށް ދުނިޔޭގެ ގައުމުތަކުން ގުޅިގެން ގާއިމްކޮށްފައިވާ މިނިވަން މުސްތަގިއްލު ކޯޓެކެވެ. މިކޯޓުގެ މައިގަނޑު މަގްސަދުތަކުގެ ތެރޭގައި ދުނިޔޭގައި ހިންގާ އިންސާނިއްޔަތާ ޚިލާފް ޖަރީމާތަކާއި، ހަނގުރާމައިގެ ޖަރީމާތައް ހިންގާ ވަކިވަކި މީހުން ހައްޔަރުކޮށް ޝަރީއަތް ހިންގައި އަދަބުދިނުން ހިމެނެއެވެ.
