ގާނޫނާ ޚިލާފުވެއްޖެނަމަ 300،000 ރުފިޔާއާ ހަމައަށް ޖޫރިމަނާ ކުރެވޭ ގޮތަށް ކޮޕީރައިޓްސް އާއި، އެއާގުޅޭ އެހެނިހެން ގާނޫނަށް އިސްލާހު ގެނައުމުގެ ބިލު ރައްޔިތުން މަޖިލީހުގެ އަޣުލަބިއްޔަތުން ފާސްކޮށްފިއެވެ.
މަޖިލީހަށް މިއަދު 58 މެންބަރުން ހާޒިރުވެފައިވާއިރު، ވޯޓުގައި ބައިވެރިވި 57 މެންބަރުންގެ އަޣުލަބިއްޔަތުން ބިލު ވަނީ ފާސްކޮށްފައެވެ.
ކޮޕީރައިޓްސްގެ ގާނޫނުށް އިސްލާހު ގެނައުމުގެ ބިލު ސަރުކާރުގެ ފަރާތުން ހުށަހެޅުއްވީ ނިލަންދޫ ދާއިރާގެ މެންބަރު ފާތިމަތު ސައުދާއެވެ. ކޮމިޓީ މަރުހަލާގައި އެ ބިލު ދިރާސާކޮށް ނިންމި ގޮތުގެ ރިޕޯޓަށް މިއަދުގެ ޖަލްސާގައި ބަހުސްކުރުން ވަނީ ކުރިއަށް ގެންގޮސްފައެވެ.
މިއަދު މަޖިލީހުގައި ފާސްކުރި ބިލުގައި ހުށަހަޅާފައިވާ ކަންކަމުގެ ތެރޭގައި ލިޔުމުގެ އަސްލީ އުފެއްދުންތަކާއި، މިއުޒިކީ އަސްލީ އުފެއްދުންތައް އަދި އަސްލީ ފަންނުވެރި އުފެއްދުންތައް ކަމަށް ގާނޫނުގައިވާ މާއްދާއަށް ނަންބަރެއް އިތުރުކޮށް އޭގައި އޯޑިއޯ ވިޝުއަލް މަސައްކަތްތައް ހިމަނާފައި ވެއެވެ.
އަދި، އޯޑިއޯ ރެކޯޑިންއާއި، ސެޓެލައިޓް، އިންޓަނެޓް، އަދި ކޭބަލް މެދުވެރިކޮށް ކުރެވޭ ބްރޯޑްކާސްޓު ހިމަނާފައި ވެއެވެ.
މީގެއިތުރުން، ގާނޫނުގެ ދަށުން ހިމާޔަތްކޮށްދީފައިވާ ހައްގަކަށް އަރައިގެންފިނަމަ އަދަބުގެ ގޮތުގައި އޭގެ ކުޑަބޮޑު މިނަށް ބަލައި 50،000 ރުފިޔާއާއި 300،000 ރުފިޔާއާ ދެމެދުގެ އަދަދަކުން ޖޫރިމަނާ ކުރުމަށް ބިލުގައި ހިމެނެއެވެ.
މި އިސްލާހުގެ ދަށުން އުފެއްދުމެއް ހިމާޔަތް ކުރެވޭނީ، އެ އުފެއްދުމެއް ހުށަހަޅައިދޭ ގޮތަށް ނުވަތަ އުފެއްދުމެއްގައި ހިމެނޭ އެއްޗެއްގެ ސަބަބުން ނުވަތަ އެ އެއްޗެއްގެ ފެންވަރަށް ނުވަތަ މަގުސަދަށް ބަލައިގެން ނޫންކަމަށް ބިލުގައިވެއެވެ.
ހަމައެއާއެކު ކޮޕީރައިޓުގެ ވެރިފަރާތުން އެހެން ފަރާތަކަށް ހުއްދަދީފައިނުވާ ހިނދެއްގައި އެ އުފެއްދުމެއްގެ އަސްލެއް ނުވަތަ ކޮޕީއެއް އާންމުންނަށް ވިއްކުން ނުވަތަ ކުއްޔަށް ދިނުމަށް ނުވަތަ އާންމުންނަށް ދޫކޮށްގެން ނުވާނެ ކަމަށް ވެސް ބިލުގައި ވެއެވެ.
