މި ސަރުކާރުން ވެރިކަމާއި ހަވާލުވިއިރު 124 ބިލިއަން ދަރަނި އޮތް ކަމަށް މާލީ ވަޒިރު މޫސާ ޒަމީރު ވިދާޅުވެއްޖެއެވެ.
ވަޒީރު މިފަދައިން ވިދާޅުވީ މިއަދު ރައްޔިތުންގެ މަޖިލީހުގައި މެމްބަރުންގެ ސުވާލަށް ޖަވާބުދެއްވަމުންނެވެ.
ރައްޔިތުންގެ މަޖިލީހުގެ ފޭދޫ ދެކުނު ދާއިރާގެ މެމްބަރު އިބްރާހީމް ދީދީ ވަނީ ރައީސް ޑރ މުހައްމަދު މުއިއްޒު ވެރިކަމާއި ހަވާލުވެވަޑައިގަތްއިރު، ކިހާ ވަރެއްގެ ދަރަންޏެއް ދަރާފައިވޭތޯ އަދި މި ސަރުކާރުން ދަރަނި ދެއްކުމަށްޓަކައި 2025 އަދި 2026 ގައި ކިހާ ދަރަންޏެއް ދައްކަން ޖެހޭތޯ މާލީ ވަޒިރާ ސުވާލުކުރައްވާފައެވެ.
މެމްބަރުގެ ސުވާލަށް ޖަވާބުދެއްވަމުން ވަޒީރު ވިދާޅުވީ 124 ބިލިއަންގެ ތެރެއިން ދެބައިކުޅަ އެއްބަޔަކީ ވޭތުވެދިޔަ ފަސް އަހަރު، އެމްޑީޕީ ސަރުކާރުގެ ފަސްއަހަރުގެ ދަރަނި ކަމަށެވެ. ވަޒީރު ވިދާޅުވީ ޖުމްލަ ރެވެނިއުގެ 24 އިންސައްތަ ދަރަންޏަށް ހަރަދުކުރަންޖެހޭ ކަމަށެވެ.
ވަޒީރު ވިދާޅުވީ ރައީސުލް ޖުމްހޫރިއްޔާ ޑރ މުހައްމަދު މުއިއްޒު މިހާރު މަސައްކަތް ކުރައްވައިގެން، ރައްޔިތުންނަށް ބޭނުންވާ ހިދުމަތްތައް ފޯރުކޮށްދެވޭނެ ގޮތަށް، ބަޖެޓް ފޯމިއުލޭޓްކޮށް އަދި ޑިއުވާ ދަރަނި އަދާ ކުރަން މަސައްކަތްކުރައްވަމުން ގެންދަވާ ކަމަށެވެ.
"ރައްޔިތުންނަށް ހިދުމަތްދޭން މަސައްކަތްކޮށްފި ނަމަ އައިއެމްއެފް ރިޕޯޓްގައި އޮތް ގޮތަށް ގައުމު ބަގުރޫޓުވާނެ. އެކަމަކު މިހާރު ރައީސް އެ ސިނާރިއޯއިން ރާއްޖެ ނެރެ، ރެވެނިއު ސްޓްރީމްތައް ރަނގަޅުކޮށް، އިތުތު ހަރަދުތައް ރޭޝަނަލައިޒްކޮށް، ދައްކަންޖެހޭ ދަރަނިތަކުގެ މުއްދަތު އިތުރުކޮށް، އަވައްޓެރި ގައުމުތަކާއެކީގައި މަސައްކަތްކުރައްވައިގެން ދަރަނިތަކުން ސަލާމަތްވުމަށްޓަކައި ރައީސް ހުރީ ޕްލޭންތަކެއް ކުރައްވައިގެން މެނިފެސްޓޯ ގެންނެވިއިރުގައިވެސް." ވަޒީރު ވިދާޅުވިއެވެ.
ވަޒިރު ވިދާޅުވީ ވޭތުވެދިޔަ އެއް އަހަރު ތެރޭގައި ކާމިޔާބު މަސައްކަތްތަކެއް ކުރައްވައިގެން، ބަނގުރޫޓުވުމުން ރާއްޖެ ސަލާމަތް ކުރެވިފައިވާ ކަމަށާއި، ގައުމު ބަނގުރޫޓުވާނެ ކަމަށް އިދިކޮޅުން ދެއްކަމުން އައި ވާހަކަތައް ހުއްޓިއްޖެ ކަމަށެވެ.
މީގެއިތުރުން ވަޒިރު ވިދާޅުވީ ވޭތުވެދިޔަ ސަރުކާރުން ގިނަ ޕްރޮޖެކްޓްތައް އިންތިހާބަށް ފަށާފައި އޭގެ ތެރެއިން ގިނަ ޕްރޮޖެކްޓްތަކެއް ނުނިމި ހުރި ކަމަށެވެ.ހަރުދަނާ ކަމެއްނެތް ޕްރޮޖެކްޓްތަކެއް ކަން ފާހަގަކޮށް ވަޒީރު ވިދާޅުވީ ސަރުކާރު ހިންގަން ދަތިވެގެން މިއުޅެނީ އެ ސަބަބާއި ހުރެގެން ކަމަށެވެ.
