ޑްރޯން ހަމަލާއާއެކު މިޔަންމާގެ އެއާޕޯޓުގެ އުދުހުންތައް މެދުކަނޑާލައިފި

މިޔަންމާގެ ދެވަނައަށް އެންމެ ބޮޑު ސަހަރަށް ޚިދުމަތްދޭ މޭންޑަލޭ ބައިނަލްއަޤްވާމީ އެއާޕޯޓުގެ އުދުހުންތައް މެދުކަނޑާލައިފި ކަމަށް އެ ޤައުމުގެ މައި އެއާލައިނުން ހާމަކޮށްފިއެވެ.

މި ފިޔަވަޅު އަޅާފައިވަނީ ޤައުމުގެ އަސްކަރިއްޔާއާ ދެކޮޅަށް ދިގުލައިގެން ގޮސްފައިވާ ދާޚިލީ ހަނގުރާމަ ކުރަމުންދާ ހަނގުރާމަވެރިން، މިދިޔަ ބުރާސްފަތި ދުވަހު އެ އެއާޕޯޓަށް އަމާޒުކޮށް ދިން ޑްރޯން ހަމަލާއަކާ ގުޅިގެންނެވެ.

މީޑިޔާ ރިޕޯރޓްތައް ބުނާގޮތުން މޭންޑަލޭގެ ބައިނަލްއަޤްވާމީ އެއާޕޯޓަށް ކުރާ އަދި އެ އެއާޕޯޓުން ފުރާ އެންމެހައި ބައިނަލްއަޤްވާމީ ދަތުރުތައް ވަގުތީގޮތުން މެދުކަނޑާލާފަ އެވެ. އަދި އޮޕަރޭޝަނަލް ސަބަބުތަކަށްޓަކައި ވަކި ގޮތެއް އަންގަންދެން، ދާޚިލީ ދަތުރުތައް ކައިރީގައިވާ އެހެން އެއާޕޯޓަކަށް ބަދަލުކުރެވިފައިވާ ކަމަށްވެސް އެ އެއާލައިނުން ބުނެފައިވެއެވެ.

ބައެއް މީޑިއާތަކުން ރިޕޯޓުކޮށްފައިވާ ގޮތުގައި އިދިކޮޅު ހަނގުރާމަވެރިން މި ހަމަލާގައި ޚާއްޞަކޮށް އަމާޒުކޮށްފައިވަނީ އެއާޕޯޓުގައި ހުރި އަސްކަރިއްޔާގެ ހަނގުރާމަމަތީ މަޔިންދާބޯޓުތަކަށެވެ.

މިކަމާ ގުޅޭގޮތުން މިޔަންމާ އެއާވޭސް އިންޓަނޭޝަނަލްގެ ބެންކޮކް އޮފީހުގެ އޮފިޝަލަކު، ނަން ހާމަނުކުރުމަށް އެދި މިއަދު ވިދާޅުވީ، ސެޕްޓެމްބަރު 11 އަދި 12 ވަނަ ދުވަހު މޭންޑަލޭއަށް ކުރަން ހަމަޖެހިފައިވާ ދަތުރުތައް ކެންސަލްކޮށްފައިވަނީ އެއާޕޯޓު ބަންދުކުރުމާ ގުޅިގެން ކަމަށެވެ.

މި ހަމަލާގެ ސަބަބުން ދާޚިލީ ބައެއް ދަތުރުތަކަށް ވަގުތީގޮތުން ބުރޫއެރި ނަމަވެސް، އެއްވެސް މީހަކަށް އަނިޔާއެއް ނުވަތަ ވެހިކަލްތަކަށާއި އެއާޕޯޓުގެ ރަންވޭއަށް އެއްވެސް ގެއްލުމެއް ލިބިފައިނުވާ ކަމަށް އެ ނޫހުގައި ބަޔާންކޮށްފައިވެއެވެ.