ބުރިޖުގެ ތަނބުގައި ޖެހުނު ބޮޑު ދެ ތެޔޮ ބޯޓު ދިޔަވެ އަޑިއަށް ހިނގައްޖެ!

މާލެ ހުޅުމާލެ ބުރިޖުގެ ތަނބުތަކުގައި ޖެހުނު ބޮޑު ދެ ތެޔޮ ބޯޓު އޮޔާދާތީ ސަމާލުވާން އެދިފައިވަނިކޮށް އެ ދެބޯޓު މިރޭ ދިޔަވެ އަޑިޔަށް ގޮސްފި އެވެ.

ގަދަ ވަޔާއެކު ނަގިލި ކަހާލައިގެން ގޮސް މި ދެ ބޯޓު ފުރަތަމަ ވަނީ ސިނަމާލެ ބުރިޖުގެ ބައެއް ތަނބުތަކުގައި ވެސް ޖެހިފަ އެވެ.

ރޭ ގާތްގަނޑަކަށް 22:00 ހާއިރު ހިނގި މިހާދިސާގައި އެއްވެސް މީހަކަށް އަނިޔާ ލިބިފައެއް ނުވެ އެވެ. އަދި ބުރިޖުގެ ތަނބުތަކުގައި ޖެހިގެން ވެސް ގެއްލުމެއް ލިބިފައެއް ނުވެ އެވެ.

މި ދެ ބޯޓު އޮޔާ ދާތީ ކަނޑު ދަތުރު ކުރައްވާ ފަރާތްތަކުން ހާއްސަ ސަަމާލުކަމެއް ދެއްވައިގެން ދަތުރު ކުރެއްވުމަށް އެމްއެންޑީއެފް އިން ރޭ ވަނީ އިލްތިމާސް ވެސް ކޮށްފަ އެވެ.

އެމްއެންޑީއެފް އިން "އަސްލުޓީވީ" އަށް ރޭ ވިދާޅުވީ މި ދެ ބޯޓު އޮޔާދާތީ ސަމާލުވުމަށް އިލްތިމާސް ކޮށްފައިވާ ކަމަށާއި، ބޯޓުގައި ތިބި ފަޅުވެރިން ސަލާމަތް ކުރުމަށް މަސައްކަތް ކުރަމުންދާ ކަމަށެވެ.

މި ދެ ބޯޓުގައި ޖުމްލަ 20 ފަޅުވެރިޔަކު ތިއްބެވެ. އެއީ "ކޭޖީ 1" ގައި ތިބި 9 މީހުންނާއި "އޭއެލް 1" ގައި ތިބި 11 މީހުންނެވެ. އެނގިފައިވާ ގޮތުގައި ބޯޓުގައި ތިބީ ހުސް ބިދޭސީ ފަރާތްތަކެވެ. މި ފަރާތްތައް މިހާރު ވަނީ އިމިގްރޭޝަންގެ ބެލުމުގެދަށަށް ގެންގޮސްފަ އެވެ.

މި ދެ ބޯޓު ވަނީ ދިޔަވެ މާލެ އަތޮޅުގެ އިރުން، ރާއްޖޭގެ ސަރަހައްދުން 30 ނޯޓިކަލްމޭލު ބޭރަށް މިރޭގެ ވަގުތެއްގައި އަޑިއަށް ގޮސްފައި ކަމަށް ވެސް އެމްއެންޑީއެފުން މައުލޫމާތު ދިނެވެ.

އެނގިފައިވާ ގޮތުގައި މި ދެ ބޯޓަކީ ވެސް ގަވައިދާ ޙިލާފަށް ހުއްދަ ނެތި ރާއްޖޭގެ ސަރަހައްދަށް ވަދެ އުޅެނިކޮށް އަތުލައިގެންފައިވާ ދެ ބޯޓެވެ.