ރައީސް ޔާމީންގެ ހުކުމް އަދިވެސް ނުލިބޭ ކަމަށް ވަކީލުން ބުނެފި

ވ.އާރަށު މައްސަލާގައި ރައީސް ޔާމީންގެ މައްޗަށް އުފުލާފައިވާ ދެ ދަޢުވާއާއި ގުޅިގެން އިއްޔެ ކްރިމިނަލް ކޯޓުން އިއްވި ޙުކުމާއި ގުޅޭ ރިޕޯޓް އަދިވެސް ނުލިބޭ ކަމަށް ރައީސް ޔާމީންގެ ވަކީލުން ވިދާޅުވެއްޖެ އެވެ.

ރައީސް ޔާމީން ވަކީލުން ޓީމްގައި އިސްކޮށް މަސައްކަތް ކުރައްވާ ކުރީގެ ނައިބުރައީސް ޑރ. މުހައްމަދު ޖަމީލް އަހްމަދު މިއަދު ކުރެއްވި ޓްވީޓެއްގައި ވިދާޅުވި ގޮތުގައި، ސްޕްރީމް ކޯޓްގެ ޕްރެކްޓިސް ޑައިރެކްޝަނާއި ހިލާފަށް ރިޕޯޓް ދޫނުކޮށް ހިފަހައްޓަނީ ކީއްވެތޯ ސުވާލު ކުރައްވާފައި ވެއެވެ. ރިޕޯޓް ދޫނުކޮށް ހިފަހައްޓާފައިވާތީ އިސްތިއުނާފުގެ މަސައްކަތް ނުފެށި ތިބެންޖެހިފައިވާ ވާހަކަ ފާހަގަކޮށް މިކަމާއި ގުޅިގެން އިސްގާޒީ ޝަކީލް ޒިންމާކުރުވާނެ ފަރާތެއް ނެތްތޯވެސް ވަނީ ސުވާލު އުފައްދާފައެވެ.

ކްރިމިނަލް ކޯޓުން މިވަރުގެ ބޮޑު 11 އަހަރުދުވަހުގެ ޖަލު ޙުކުމް އިއްޔެ ކުރީގެ ރައީސެއްގެ މައްޗަށް އިއްވިއިރު އަދިވެސް ރިޕޯޓް ނުލިބޭ. ކޯޓަށް ހާޒިރުވީ 9 ޖެހިއިރު. ޝަރީޢަތް ފެށީ 12 ޖަހަން ކައިރި ވެފައި ހުއްޓާ. ޙުކުމް މިއިއްވީ ރިޕޯޓް ތައްޔާރުނުކޮށް ތިބެބާ؟ މިއީ އިންސާފު؟" ޖަމީލް ވިދާޅުވިއެވެ

ރައީސް ޔާމީންގެ މައްޗަށް ކުރި 11 އަހަރުގެ ޖަލު ޙުކުމް ތަންފީޒު ކުރުމަށްޓަކައި ރޭ ވަނީ ޖަލަށް ގެންގޮސްފައެވެ.

ރައީސް ޔާމީންގެ މައްޗަށް ކްރިމިނަލް ކޯޓުން އިއްވި ހުކުމުގައި ވަނީ، ރައީސް ޔާމީންގެ މައްޗަށް ރިޝްވަތު ހިފިކަން ސާބިތުވާ ކަމަށާއި، އަދި މަނީލޯންޑަރިންގެ ކުށް ސާބިތުވާ ކަމަށެވެ. އަދި އަދަބު ކަނޑައެޅުމުގައި ލުއިތަކެއް ޝަރީޢަތުން ދިނުމުގެ އިޚްތިޔާރު އޮތް ނަމަވެސް، މި ދެ މައްސަލައިގާ އަދަބު ލުއިކުރާނެ ތަނެއް ނެތް ކަމަށެވެ.

ކްރިމިނަލް ކޯޓުގެ ގާޒީ ޝަކީލް އިއްވެވި ހުކުމުގައި ވަނީ، ރިޝްވަތު ހިފިކަން ސާބިތުވާތީ، ރައީސް ޔާމީން 4 އަހަރު ދުވަހަށް ޖަލަށްލާން ހުކުމްކުރާ ކަމަށާއި، އަދި މަނީލޯންޑަރިންގެ ކުށުގައި 7 އަހަރަށް ޖަލަށްލުމާއެކު، 5 މިލިއަން އެމެރިކާ ޑޮލަރުން ޖޫރިމަނާކުރާ ކަމަށެވެ.

މީގެ އިތުރުން، ރައީސް ޔާމީން އަށް ރިޝްވަތު ދިންކަމުގެ ތުހުމަތުގައި މި މައްސަލައިގާ ރައީސް ޔާމީން އާއެކު ދައުވާ އުފުލާފައިވާ ފެލިދޫ ދާއިރާގެ ކުރީގެ މެމްބަރު ޔޫސުފް ނައީމުގެ މައްޗަށްވެސް ވަނީ ރިޝްވަތު ދިންކަމަށް ސާބިތުވެ، 3 އަހަރާއި 2 މަހާއި 12 ދުވަހަށް ޖަލަށްލުމަށް ހުކުމްކޮށްފައެވެ.