ކުރީގެ ރައީސް އަބްދުﷲ ޔާމީންގެ ޝަރީއަތަށް ސަރުކާރުން އެއްވެސް ނުފޫޒެއް ފޯރުވާފައިނުވާނެކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސް މިފަދައިން ވިދާޅުވީ މާލޭ ސިޓީ ކައުންސިލް ބައްދަލުވުމުގައި ބައިވެރިވެވަޑައިގެންނެވުމަށްފަހު ނޫސްވެރިންނާ ބައްދަލުކުރައްވައި ދެއްކެވި ވާހަކަފުޅުގައެވެ.
ރައީސް ވިދާޅުވީ އެމަނިކުފާނަކީ ދައްކާ ވާހަކައިގައި ސާބިތުވެ ހުންނާނެ ބޭފުޅެއްކަމަށާއި މި ސަރުކާރު ހަވާލުވީންސުރެ ޝަރުއީ ދާއިރާއަށް ސަރުކާރުން ނުފޫޒުފޯރުވާފައިނުވާނެކަމަށެވެ.
"އަޅުގަނޑުގެ ސަރުކާރެއް އުފެދިގެން އަންނަ ހިސާބުން ރައީސް އޮފީހުން އަދި ސަރުކާރުގެ އެއްވެސް ލެވެލްއަކުން ޝަރުއީ ނިޒާމުގެ ތެރެއަކަށް އެއްވެސް ވަރެއްގެ ނުފޫޒެއް ނުފޯރުވާނެ. އެފަދަ ކަމެއް ކުރާ މީހަކު މިވަގުތު ފެނުނަސް އެއީ މަގާމެއްގައި ހުރި މީހެއްވިއްޔާ ވަގުތުން ވަކި ވެސް ކުރާނަން".
ޝަރީއަތަށް ނުފޫޒު ފޯރުވި މީހުންގެ އޯޑިއޯތައް ވަރަށް އަވަހަށް ނިކުންނާނެ ކަމަށް ރައީސް ޔާމީންވަނީ ޕީއެންއެފްގެ ފްރަންޓް އޮފީސް ޖަލްސާގައި ވިދާޅުވެފައެވެ.
ކޯޓުގައި ޝަރީއަތް ކުރިއަށްދިޔައިރު ނުފޫޒު ފޯރުވި މީހުންނާއި ހައިކޯޓުގައި މައްސަލަ ލަސްކުރުވި މީހުންނާއި ހައިކޯޓުގެ ފަނޑިޔާރެއް ފުރުވާލައިގެން އަޔަނުދީ ހިފެހެއްޓި މީހުން ދެނެވަޑައިގަންނަވާކަމަށް ރައީސް ޔާމިން ވިދާޅުވިއެވެ.
މި ފަރާތްތަކުގެ ނަންތައް ހާމަކޮށް މި ވާހަކަ ދެއްކެން އަދި ނެތީ އެމަނިކުފާނުގެ ޝަރީއަތްތައް އަދިވެސް ހިނގަމުންދާތީ ކަމަށް ޔާމީން ވިދާޅުވިއެވެ.
