ރާއްޖެއަށް ނިޕާ ވައިރަސްގެ ގެއްލުން މިވަގުތު ކުޑަ: އެޗްޕީއޭ
މުޙައްމަދު ފަޟްލޫން - 28 ޖެނުއަރީ 2026 - 11:16
އިންޑިއާގެ ވެސްޓް ބެންގާލުން ނިޕާ ވައިރަސްގެ ކޭސްތަކެއް ފެނިފައިވި ނަމަވެސް މިވަގުތު ރާއްޖެއަށް މި ބަލީގެ ނުރައްކާ އޮތް މިންވަރު ކުޑަ ކަމަށް އެޗްޕީއޭ އިން ބުނެފިއެވެ.
އިންޑިއާގެ ހާލަތު އެޗްޕީއޭ އިން ވަރަށް ގާތުން މޮނިޓަރ ކުރަމުންދާކަމަށް އެ އޭޖެންސީ އިން ނެރުނު ބަޔާނެއްގައި ވަނީ ބުނެފައެވެ.
ވެސްޓް ބެންގޯލަށް ދަތުރުކުރާ ފަރާތްތަކުން ނިޕާ ވައިރަސް އަށް ސަމާލުކަން ދިނުމަށް އެޗްޕީއޭގެ ބަޔާނުގައި ބުނެފައިވެއެވެ.
ނިޕާ ވައިރަސް އަކީ ޓެރޯޕަސް އާއިލާގެ ވާލުންނާއި އޫރުން އިންސާނުންނަށް ފެތުރޭ ބައްޔެއްކަމަށް އެޗްޕީއޭ އިން ވަނީ ބުނެފައެވެ.
ވެސްޓް ބެންގަލޯ އިން ބައްޔަށް ޕޮޒިޓިވްވި މީހުންނާއި ގުޅިގެން 180 އަށް ވުރެ ގިނަ މީހުން ކޮންޓެކްޓުންގެ ގޮތުގައި މިހާރު ވަނީ ކަރަންޓީނުކޮށްފައެވެ. ނަމަވެސް އިންޑިއާގެ އެހެން އެއްވެސް ސަރަހައްދަކުން ނުވަތަ އެހެން ގައުމަކުން ވެސް މި ބަލި ފެނިފައިވާ ކަމުގެ ރިޕޯޓެއް މިހާތަނަށް ލިބިފައިނުވާ ކަމަށް އެޗްޕީއޭ އިން ވަނީ ބުނެފައެވެ. އަދި ރާއްޖެއިން ވެސް މި ބަލީގެ އެއްވެސް ކޭސްއެއް ނުވަތަ ކޮންޓެކްޓެއް ރިޕޯޓްކޮށްފައިނުވާ ކަމަށް އެޗްޕީއޭ އިން ވަނީ ބުނެފައެވެ.
ނިޕާ ވައިރަސް ޖެހުމުން ފެންނަ ބައެއް އަލާމާތްތަކުގެ ތެރޭގައި ކެއްސުމާއި ކަރުގައި ރިހުމާއި ނޭވާއަށް އުނދަގޫވުން ހިމެނެއެވެ.
މިބަލި ޖެހުމުން އެއްވެސް އަލާމާތެއް ނުފެނި ދިއުމަކީ ވެސް އެކަށީގެންވާ ކަމެކެވެ.
އެޗްޕީއޭ އިން ބުނީ މި ބައްޔަށް ވަކި ހާއްސަ ފަރުވާއެއް މިހާތަނަށް ހޯދިފައިނުވި ނަމަވެސް ބަލީގެ އަލާމާތްތަކަށް ފަރުވާ ކުރެވޭނެ ކަމަށެވެ.
އެޗްޕީއޭ އިން ވަނީ ރައްކާތެރިކަމުގެ ފިޔަވަޅުތަކަށް ސަމާލުވުމަށް އިލްތިމާސްކޮށްފައެވެ.
ގުޅުން ހުރި ޙަބަރުތައް
