އައްޑޫގައި ސަރުކާރުގެ އައިނު ފިހާރަ ހުޅުވަން ތައްޔާރުވާން ފަށައިފި

އައްޑޫ ސިޓީގައި ސަރުކާރުގެ އައިނު ފިހާރައެއް ހުޅުވުމުގެ ތައްޔާރީތައްވާން ފަށައިފިއެވެ.

މި ފިހާރަ ގާއިމުކުރުމަށް ހަމަޖެހިފައިވަނީ އައްޑޫ އިކުއެޓޯރިއަލް ހޮސްޕިޓަލް (އޭއީއެޗް) ގައެވެ. ހޮސްޕިޓަލުގެ ބޭރުން އާންމުންނަށް ފަސޭހައިން ވަދެވޭ ގޮތަށް ފަރުމާކުރެވޭ މި ފިހާރަ ހަދާ އިމާރާތުގެ މަސައްކަތްތައް މިހާރު ދަނީ ކުރިއަށެވެ.

ސަރުކާރުގެ އައިނު ފިހާރައަކީ މާލެ ސިޓީ ގްރޫޕް އޮފް ހޮސްޕިޓަލްސްގެ ބެލުމުގެ ދަށުން ހިންގާ ވިޔަފާރިއެކެވެ.

މި ސިލްސިލާގެ ފުރަތަމަ ފިހާރަ އައިޖީއެމްއެޗްގައި ހުޅުވާފައިވަނީ މިދިޔަ އަހަރުގެ ޖުލައި މަހުގެ 27 ވަނަ ދުވަހުއެވެ. އަދި ދެވަނަ ފިހާރަ ހުޅުމާލޭ ހޮސްޕިޓަލުގައި ހުޅުވާފައިވަނީ އެ އަހަރުގެ އޮގަސްޓް މަހުގެ 27 ގައެވެ.

އައްޑޫގައި ހުޅުވޭ މި ފިހާރަ ވެގެންދާނީ މާލެ ސިޓީ ގްރޫޕް އޮފް ހޮސްޕިޓަލްސް އިން މާލެއިން ބޭރުގައި ހުޅުވާ ފުރަތަމަ އައުޓްލެޓަށެވެ.

މިއީ ރާއްޖޭގެ ފަސް ރީޖަނަލް ހޮސްޕިޓަލެއްގައި އައިނު ހެއްދުމުގެ ހިދުމަތް ފޯރުކޮށްދިނުމަށް ސަރުކާރުން ގެންގުޅުއްވާ ސިޔާސަތުގެ ދަށުން ކުރިއަށްދާ މަސައްކަތެކެވެ.

ސަރުކާރުގެ މި ހިދުމަތް އައްޑޫއަށް ތައާރަފުކުރާއިރު، އަމިއްލަ ކުންފުންޏެއް ކަމަށްވާ އައި ކެއަރ އިން ވެސް ދަނީ ހިތަދޫގައި އައިނުގެ ހިދުމަތް ފުޅާދާއިރާއެއްގައި ދެމުންނެވެ.