މިދިޔަ އަހަރު މައިގަނޑު ސިނާއަތްތަކުން ވަޒީފާގެ ފުރުސަތުތައް ވަނީ އިތުރުވެފައި: އެމްއެމްއޭ

ނިމިދިޔަ އަހަރުގެ ފަހު ކުއާޓާގައި ރާއްޖޭގެ އިޤްތިޞާދުގެ މައިގަނޑު ސިނާޢަތްތަކުގައި ވަޒީފާގެ ފުރުޞަތުތައް އިތުރުވެފައިވާކަން މަރުކަޒީ ބޭންކު، މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ހާމަކޮށްފިއެވެ.

އެމްއެމްއޭއިން ނެރުނު ކުއާޓަލީ ބިޒްނަސް ސާވޭ ރިޕޯޓުގައިވާ ގޮތުން، މި ދިރާސާ އަމާޒުކޮށްފައިވަނީ އިގްތިސާދީ މައިގަނޑު ހަތަރު ދާއިރާއެއްގައި ހަރަކާތްތެރިވާ 113 ކުންފުންޏަކަށެވެ. މީގެ ތެރޭގައި ހިމެނެނީ މޯލްޑިވްސް އިންލަންޑް ރެވެނިއު އޮތޯރިޓީ މީރާ އަށް އެންމެ ބޮޑު އާމްދަނީއެއް އުފައްދައިދޭ ވިޔަފާރިތަކެވެ.

ދާއިރާތަކަށް ވަކިވަކިން ބަލާއިރު، ފަތުރުވެރިކަމުގެ ޕީކް ސީޒަނާ ދިމާކޮށް އެ ސިނާޢަތުގެ ވަޒީފާގެ އިންޑެކްސް ވަނީ 56 އިން 57 އަށް އުފުލިފައެވެ.

މި ދާއިރާއިން ލިބުނު އާމްދަނީއާއި މުވައްޒަފުންގެ މުސާރައަށް ކުރި ހަރަދު އިތުރުވެފައިވާއިރު، މިއަހަރުގެ ފުރަތަމަ ކުއާޓާގައިވެސް މި ކުރިއެރުން ދަމަހައްޓާނެ ކަމަށް އެމްއެމްއޭއިން ލަފާކުރެއެވެ.

ހޯލްސޭލް އަދި ރީޓެއިލް ވިޔަފާރީގެ ދާއިރާގައި އާންމު ވިޔަފާރީގެ މިންވަރު ކުޑަކޮށް ދަށްވި ނަމަވެސް، ވަޒީފާގެ އިންޑެކްސް ވަނީ 46 އިން 69 އަށް ބޮޑުތަނުން އިތުރުވެފައެވެ.

އަދި އިމާރާތްކުރުމުގެ ދާއިރާގައި ފެށުނު އައު މަޝްރޫޢުތަކާއެކު އެ ދާއިރާގެ ވަޒީފާގެ އިންޑެކްސް ވަނީ 29 އިން 36 އަށް މަތިވެފައެވެ.

ދަތުރުފަތުރާއި މުވާސަލާތީ ދާއިރާގެ ވަޒީފާގެ އިންޑެކްސް 14 ގައި ހުރި ނަމަވެސް، އެއްވެސް ވިޔަފާރިއަކުން މުވައްޒަފުން މަދުކޮށްފައި ނުވާކަން އެމްއެމްއޭގެ ރިޕޯޓުގައި ފާހަގަކޮށްފައިވެއެވެ.

ޖުމްލަގޮތެއްގައި ހުރިހާ ސިނާޢަތްތަކަކުންވެސް ވިޔަފާރީގެ ކުރިއެރުން ހޯދަމުންދާއިރު، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން އިޤްތިޞާދު ހަރުދަނާކުރެއްވުމަށް ކުރައްވަމުންދާ މަސައްކަތްޕުޅުތަކާއެކު، މިއަހަރުގެ ފުރަތަމަ ކުއާޓާގައި ހުރިހާ ދާއިރާއަކުންވެސް އުންމީދީ ނަތީޖާއެއް ފެންނާނެކަމަށް އެމްއެމްއޭ އިން ލަފާކުރެއެވެ.