ވެލިދޫގައި ސީ އެމްބިއުލާންސްގެ ޚިދުމަތް ފަށައިފި

ނ. ވެލިދޫގައި ސީ އެމްބިއުލާންސްގެ ޚިދުމަތް ރަސްމީކޮށް ފަށައިފިއެވެ.

މިއީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެ ރަށުގެ ރައްޔިތުންނަށް ވެވަޑައިގެންނެވި ވަޢުދުފުޅާ އެއްގޮތަށް، އަތޮޅުގެ ސިއްޙީ ޚިދުމަތް ހަރުދަނާކުރުމަށް އެޅުނު މުހިއްމު ފިޔަވަޅެކެވެ.

މީގެ ކުރިން ނ. އަތޮޅުގައި ސީ އެމްބިއުލާންސްގެ ޚިދުމަތް ދެމުންދިޔައީ ހަމައެކަނި މަނަދޫގައި އޮންނަ އުޅަނދުން ކަމަށްވާތީ، ވެލިދޫގައި މި ޚިދުމަތް ފެށުމުން ބަލިމީހުން އުފުލުމުގައި ކުރިމަތިވި ދަތިތަކަށް ބޮޑު ހައްލެއް ލިބިގެންދާނެއެވެ.

އަދި މިއީ ފަތުރުވެރިކަން ކުރިއަރާފައިވާ އެ ސަރަހައްދުގެ އިޤްތިޞާދީ އަދި އިޖުތިމާޢީ ތަރައްޤީއަށް ލިބުނު ބޮޑު ފަސޭހައެކެވެ.

ސީއެމްބިއުލާންސް ހިދުމަތް ފެށުމަށް ބޭއްވި ރަސްމިއްޔާތުގައި ބައިވެރިވެ ދިފާއީ ވަޒީރުގެ ނައިބު މިޒްނާ އަލީ ވިދާޅުވީ ވެލިދޫގައި ސީ އެމްބިއުލާންސްގެ ޚިދުމަތް ފެށުމަކީ ރައީސުލްޖުމްހޫރިއްޔާގެ ވަޢުދުފުޅެއް ފުއްދުން ކަމަށެވެ.

ފަތުރުވެރިކަން ކުރިއަރާފައިވާ އެ ރަށުގައި މި ޚިދުމަތް ގާއިމުވުމުން ސިއްޙީ ދާއިރާގެ އިތުރުން އިޤްތިޞާދަށް ކުރިއެރުން ލިބި، އިންވެސްޓަރުންގެ އިތުބާރު ބޮޑުވެ، ރައްޔިތުންނަށް އަވަސް ފަރުވާގެ ރައްކާތެރިކަން ކަށަވަރުވެގެންދާނެ ކަމަށް މިޒްނާގެ ވާހަކަފުޅުގައި ފާހަގަކުރެއްވިއެވެ.

ދިފާޢީ ވުޒާރާއިން ބުނީ ، މިއަހަރުގެ ތެރޭގައި ދިވެހި ދަޢުލަތުން ޚަރަދު ކުރައްވައިގެން މުޅިން އައު 9 ސީއެމްއެމްބިއުލާންސް ހޯއްދަވާ އަތޮޅުތެރޭގެ 9 ރަށެއްގައި މުޅިން އަލަށް ސީއެމްބިއުލާންސްގެ ޚިދުމަތް ޤާއިމްކުރުމަށް ހަމަޖެހިފައިވާ ކަމަށެވެ.

މިހާރު ސީ އެމްބިއުލާންސްގެ ހިދުމަތް މެދުކެނޑިފައިވާ 3 ރަށެއްގައި އަލުން ސީއެމްބިއުލާންސްގެ ހިދުމަށް ފަށާނެ ކަމަށްވެސް ދިފާއީ ވުޒާރާއިން ވަނީ ބުނެފައެވެ.