ކުރު އުމްރާ ގެ ނަމުގައި ހާއްސަ ޕެކޭޖެއް އިފްތިތާހުކޮށްފި

އަހަރުގެ ހުރިހާ ދުވަސްވަރެއްގައިވެސް ދިވެހި ރައްޔިތުންނަށް އުމްރާގެ މަތިވެރި އަޅުކަން އަދާކުރުމުގެ މަގު ފަހިކޮށްދިނުމަށްޓަކައި، މޯލްޑިވްސް ހައްޖު ކޯޕަރޭޝަނުން ކުރު އުމްރާ ގެ ނަމުގައި ހާއްސަ ޕެކޭޖެއް އިފްތިތާހުކޮށްފިއެވެ.

މި ޕެކޭޖަކީ ހައްޖު މޫސުން ފިޔަވައި އަހަރުގެ ކޮންމެ ވަގުތެއްގައިވެސް އުމްރާގެ އަޅުކަން އަދާކުރެވޭ ގޮތަށް ފަރުމާކޮށްފައިވާ ޕެކޭޖެކެވެ.

މިއީ ވަގުތުގެ ދަތިކަން ހުންނަ ފަރާތްތަކަށާއި، ކުރު ޗުއްޓީއެއްގެ ތެރޭގައި އާއިލާ ނުވަތަ އެކުވެރިންނާއެކު އަމިއްލައަށް އިންތިޒާމުތައް ރާވައިގެން އުމްރާގެ ދަތުރު ކުރިއަށް ގެންދަން ބޭނުންވާ ފަރާތްތަކަށް ލިބިގެންދާނެ ވަރަށް ބޮޑު ލުޔެކެވެ.

މި ޕެކޭޖުގެ އެންމެ ފާހަގަކޮށްލެވޭ ޚާއްޞަ ސިފައަކީ، އުމްރާވެރިޔާ ބޭނުންވާ ފަދަ ގޮތަކަށް ހުރިހާ އިންތިޒާމުތަކެއް ހަމަޖެއްސުމުގެ ފުރިހަމަ އިޚްތިޔާރު ލިބިގެންދިއުމެވެ. އެގޮތުން، އުމްރާއަށް ފުރާނެ އަދި އެނބުރި އަންނާނެ ތާރީޚާއި، ދަތުރުކުރާނެ އެއާލައިނާއި، ހުންނާނެ ހޮޓަލުގެ އިތުރުން ސައުދީ އަރަބިއްޔާގައި ބޭނުންކުރާނެ ދަތުރުފަތުރުގެ ވަސީލަތްތައް އަމިއްލައަށް ކަނޑައެޅުމުގެ ފުރުސަތު މި ޕެކޭޖުގެ ދަށުން ފަހިވެގެންދާނެއެވެ.

ވިޔަފާރި ދަތުރުތަކަށްފަހު އުމްރާގެ އަޅުކަން އަދާކުރަން ބޭނުންވާ ފަރާތްތަކަށް ޚާއްޞަ އިންތިޒާމުތަކެއް ވަނީ ފަރުމާކުރެވިފައެވެ.

މީގެ ތެރޭގައި އުމްރާގެ އަޅުކަމަށްފަހު، ވިޔަފާރީގެ ބޭނުމަށް ދުބާއީ ފަދަ ޤައުމުތަކަށް ދަތުރުކުރުމަށް ބޭނުންވާ ވިސާގެ ކަންކަން ފަސޭހަކަމާއެކު ހަމަޖައްސައިދިނުން ހިމެނެއެވެ.

ދަތުރުކުރާނެ އެއާލައިނާއި، ފްލައިޓް ކްލާހުގެ އިތުރުން، ސައުދީ އަރަބިއްޔާގައި މަޑުކުރާނެ ހޮޓަލުގެ ފެންވަރާއި ހޮޓާ ހުންނަ ސަރަހައްދު އަމިއްލައަށް ކަނޑައެޅުމުގެ ފުރުސަތު ލިބިގެންދާނެއެވެ.

ކޮންމެ ބޭފުޅެއްގެވެސް ބަޖެޓާ އެކަށީގެންވާ ފެންވަރުގެ އުޅަނދުތަކުގައި، ސައުދީ އަރަބިއްޔާގެ އެތެރޭގެ ދަތުރުފަތުރުގެ އެންމެހައި އިންތިޒާމުތައް ހަމަޖައްސައިދެވޭނެއެވެ.

ވަކި ގްރޫޕަކާ ނުގުޅި، އަމިއްލައަށް ބޭނުންވާ ތަންތަނަށް ޒިޔާރަތްކުރުމާއި، ތިމާއަށް އެންމެ ފަސޭހަ ވަގުތުތަކުގައި އަޅުކަންތައް ކުރިއަށް ގެންދިއުމުގެ ފުރިހަމަ މިނިވަންކަން ލިބިގެންދާނެއެވެ. މި ޕެކޭޖަކީ އެކަނި އުމްރާ ކުރަން ބޭނުންވާ ފަރާތްތަކަށާއި، އާއިލާ ނުވަތަ ރަހުމަތްތެރިންގެ ވަކި ގްރޫޕެއްގެ ގޮތުގައި ދަތުރުކުރަން ބޭނުންވާ ފަރާތްތަކަށްވެސް އެންމެ އެކަށޭނަ ގޮތަށް ތައްޔާރުކުރެވިފައިވާ ޚިދުމަތެކެވެ.

ހައްޖު ކޯޕަރޭޝަނުން ހާމަކުރި ގޮތުގައި، މި ޕެކޭޖުގެ ދަށުން އުމްރާވެރިޔާ އިޚުތިޔާރުކުރާ ޚިދުމަތްތަކަށް ފައިސާ ދެއްކުމުގެ ފުރުސަތު އޮންނާނެއެވެ. މީގެ އިތުރުން، އުމްރާގެ ދަތުރަށް ތައްޔާރުވާން ފަށާ ހިސާބުން ފެށިގެން ދަތުރު ނިމުމާ ހަމައަށް ބޭނުންވާނެ އެންމެހައި ފަންނީ އެހީތެރިކަމާއި، އިރުޝާދާއި ލަފާ އެ ކޯޕަރޭޝަނުން ފޯރުކޮށްދޭނެއެވެ.