ތެޔޮ ހޯދަން އުޅެގެން މައި ދެ ސިނާއަތް ހަލާކުވެދާނެ: ޝައުނާ

ސްޕެޝަލް އިކޮނޮމިކް ޒޯން (އެސްއީޒެޑް) ތަކުގައި އިންވެސްޓް ކުރެވޭ ދާއިރާތަކުގެ ތެރޭގައި ކަނޑުއަޑިން ތެލާއި މިނެރަލް ހޯދުމުގެ މަސައްކަތް ހިމެނުމާ ގުޅިގެން، ކުރީގެ އެންވަޔަރަމަންޓް މިނިސްޓަރު އާމިނަތު ޝައުނާ ކަންބޮޑުވުން ފާޅުކުރައްވައިފިއެވެ.

ޝައުނާ އެކްސްގައި ވިދާޅުވީ މިފަދަ ނިންމުމެއްގެ ސަބަބުން ރާއްޖޭގެ އިގުތިސާދުގެ މައި ދެ ތަނބު ކަމަށްވާ ފަތުރުވެރިކަމަށާއި މަސްވެރިކަމަށް އިއާދަނުކުރެވޭނެ ފަދަ ބޮޑެތި ގެއްލުންތަކެއް ލިބިދާނެ ކަމަށެވެ.

ޝައުނާ ފާހަގަކުރެއްވި ގޮތުގައި، ރާއްޖޭގެ ކަނޑުއަޑިން ތެޔޮ ހޯދުމަށާއި މައިނިންގް މަސައްކަތްތަކަށް ގާނޫނީ ހުއްދަ ދިނުމަކީ ކަނޑުގެ ދިރުންތަކަށް އޮތް ބޮޑު ނުރައްކަލެކެވެ. އަދި މިކަމުގެ ސަބަބުން ރާއްޖޭގެ މަސްކަނޑުތައް ހަލާކުވެ، ގައުމުގެ ގުދުރަތީ ރީތިކަމަށް ބަރޯސާވާ ފަތުރުވެރިކަމުގެ ސިނާއަތަށް ނޭދެވޭ އަސަރުތަކެއް ކުރާނެ ކަމަށްވެސް އޭނާ ވިދާޅުވިއެވެ.

މަދުވެގެން 100 މިލިއަން ޑޮލަރު އިންވެސްޓްކުރަންޖެހޭ އިގުތިސާދީ ދާއިރާތަކުގެ ތެރޭގައި ތެލާއި، ގޭހާއި އަދި މިނެރަލް ހޯދުމުގެ މަސައްކަތް ހިމަނުއްވައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ އިއްޔެ ގަރާރެއް ނެރުއްވާފައެވެ.

ޝައުނާ ސިފަކުރެއްވި ގޮތުގައި، މިއީ ދުރުވިސްނުމެއް ނެތި ނިންމާފައިވާ ނިންމުމެއް ކަމަށާއި، މީގެ ސަބަބުން ރާއްޖޭގެ ތިމާވެއްޓަށް ލިބޭނެ ގެއްލުންތަކަކީ އަލުން އިއާދަނުކުރެވޭނެ ފަދަ ނުރައްކާތެރި ކަންތައްތަކެކެވެ.