މީޑިއާ ކޮމިޝަންގެ ރައީސް ކަމުން ފަރުޝަތު އިސްތިއުފާ ދެއްވައިފި

މޯލްޑިވްސް މީޑިއާ އެންޑް ބްރޯޑްކާސްޓިންގ ކޮމިޝަނުގެ ރައީސް މުހައްމަދު ފަރުޝަތު، އެ ކޮމިޝަނުގެ ރައީސްކަމުގެ މަގާމުންނާއި މެންބަރުކަމުން އިސްތިއުފާ ދެއްވައިފިއެވެ.

ރައީސުލްޖުމްހޫރިއްޔާ ޑރ މުހައްމަދު މުއިއްޒަށް ފޮނުއްވި އިސްތިއުފާގެ ސިޓީގައި ފަރުޝަތު ވިދާޅުވެފައިވަނީ، ކޮމިޝަނުގެ މަސައްކަތްތައް ފުރިހަމަކަމާއެކު ކުރިއަށްގެންދިއުމަށާއި، ހުރިހާ މީޑިއާތަކަކަށް ހަމަހަމަކަމާއި އިންސާފުވެރިކަމާއެކު ފުރުސަތުތައް ފަހިކޮށްދިނުމުގައި ހައްލުނުކުރެވޭ ފަދަ ބޮޑެތި ގޮންޖެހުންތަކަކާ ކުރިމަތިލައްވަން ޖެހިވަޑައިގެންފައިވާ ކަމަށެވެ. އިންސާފުވެރި ނިޒާމެއްގެ ތެރެއިން އެ މައްސަލަތަކަށް އެދެވޭ ހައްލެއް ހޯދުމަށް ކުރެއްވި މަސައްކަތްތައް ކާމިޔާބުވެފައި ނުވާތީ، މިއަދުން ފެށިގެން މަގާމުން ވަކިވެވަޑައިގަންނަވަން ނިންމެވީ ކަމަށްވެސް އެ ސިޓީގައި ބަޔާންކޮށްފައެވެ.

ފަރުޝަތު މީޑިއާ ކޮމިޝަނުގެ ރައީސްކަމުގެ މަޤާމަށް ޢައްޔަންކުރައްވާފައިވަނީ މިދިޔަ އަހަރުގެ އޮކްޓޫބަރު މަހުގެ 27 ވަނަ ދުވަހުއެވެ.