ހިދުމަތްތައް ހަރުދަނާކުރަން އިތުރު 100 ފާމަސިސްޓުން ބޭނުންވޭ: ޑރ ޝާހު މާހިރު

ސްޓޭޓް ފާމަސޫޓިކަލް މެދުވެރިކޮށް ރައްޔިތުންނަށް ފޯރުކޮށްދޭ ޚިދުމަތްތައް އިތުރަށް ފުޅާކޮށް ހަރުދަނާކުރުމަށްޓަކައި، އަދިވެސް ގާތްގަނޑަކަށް 100 ފާމަސިސްޓުން ބޭނުންވާކަމަށް އެ ކުންފުނީގެ މެނޭޖިންގ ޑިރެކްޓަރ ޑރ. ޝާހް މާހިރު ވިދާޅުވެއްޖެއެވެ.

މީޑިއާ ޕްރޮގްރާމެއްގައި ވާހަކަދައްކަވަމުން ޑރ. ޝާހް ވިދާޅުވީ، ކުންފުނީގެ ފާމަސީތަކަށް ބޭނުންވާ ފާމަސިސްޓުން ހޯދުމަށް ފަހަކަށް އައިސް ކުރި އިއުލާންތަކަށް އެކަށީގެންވާ ތަރުޙީބެއް ލިބިފައިނުވާ ކަމަށެވެ.

ރާއްޖެއިން ބޭރުން ފާމަސިސްޓުން ގެނައުމުގެ މަސައްކަތް މިހާރު ކުރިއަށްދާ ކަމަށާއި، މިހާރު މަސައްކަތްކުރާ ފާމަސިސްޓުންގެ އަދަދު ނިސްބަތުން މަދުކަން އޭނާ ފާހަގަކުރެއްވިއެވެ.

މި ދާއިރާއަށް ދިވެހިން ތަމްރީނުކުރުމުގެ މުހިންމުކަމަށް އަލިއަޅުއްވާލައްވަމުން ޑރ. ޝާހް ވިދާޅުވީ، ރާއްޖޭގެ ޔުނިވަރސިޓީތަކާއި ކޮލެޖްތަކާ ގުޅިގެން ހާއްސަ ޕްރޮގްރާމްތަކެއް ހިންގުމަށް ރާވަމުންދާ ކަމަށެވެ.

ދިވެހިރާއްޖޭގެ ގައުމީ ޔުނިވަރސިޓީ (އެމް.އެން.ޔޫ) އާއެކު ފަހުމުނާމާއެއް އެކުލަވާލުމުގެ އެންމެ ފަހުގެ ތައްޔާރީތައް ވަމުންދާކަން ހާމަކުރެއްވިއެވެ.

މި މަސައްކަތުގެ މައިގަނޑު މަޤްޞަދަކީ ކޯސް ފުރިހަމަކުރާ ދަރިވަރުންނަށް ވަޒީފާގެ ޔަގީންކަން ފޯރުކޮށްދިނުމާއި، ކިޔެވުމުގެ މަރުޙަލާގައި ޢަމަލީ ތަޖުރިބާ ހޯދައިދިނުން ކަމަށްވެސް ވިދާޅުވިއެވެ.

މީގެއިތުރުން، މި ދާއިރާގައި މިހާރު މަސައްކަތްކުރަމުންދާ މުވައްޒަފުންގެ މުސާރައަށް އެދެވޭ ހެޔޮ ބަދަލުތަކެއް ގެނައުމަށްޓަކައި، މުސާރައިގެ އޮނިގަނޑު މުރާޖަޢާކުރަން ޖެހިފައިވާކަންވެސް އެމަނިކުފާނު ފާހަގަކުރެއްވިއެވެ.