ދިއްދޫގައި ސަރުކާރުން މުޅިން އަލަށް ޤާއިމްކުރި އައުޓްޑޯ ވޮލީކޯޓުގެ މަސައްކަތް ނިންމާލައިފި

ހއ. ދިއްދޫގައި ސަރުކާރުން މުޅިން އަލަށް ޤާއިމްކުރި ޒަމާނީ އައުޓްޑޯ ވޮލީކޯޓުގެ މަސައްކަތް އެއްކޮށް ނިންމާލައިފިއެވެ.

މި މަޝްރޫޢަކީ ހަތް މަސްދުވަހުގެ ތެރޭގައި މަސައްކަތް ނިންމައި ފުރިހަމަކޮށްފައިވާ މަޝްރޫޢެކެވެ. ރޭގަނޑުވެސް ފަސޭހަކަމާއެކު ކުޅެވޭނެހެން ލައިޓިންގ ސިސްޓަމް ހަރުކޮށް، އެންމެ ޒަމާނީ ފެންވަރަށް ތަރައްޤީކޮށްފައިވާ މި ވޮލީކޯޓަކީ ދިއްދޫގެ ކުޅިވަރުގެ ކުރިމަގަށް އެޅުނު ވަރަށް މުހިންމު ފިޔަވަޅެކެވެ.

ދިއްދޫ ކައުންސިލްގެ ރައީސް އުސްމާން ރަޝީދު މީޑިއާއަސް ވިދާޅުވީ ދިއްދޫ ސްޕޯޓްސް އެރީނާގެ ގޮތުގައި ތަރައްޤީކުރުމަށް ރާވާފައިވާ ސަރަހައްދުގައި މި ކޯޓު ޤާއިމްކުރެވިގެން ދިއުމަކީ ރަށުގެ ކުޅިވަރުގެ ދާއިރާއަށް ލިބުނު ވަރަށް ބޮޑު ކުރިއެރުމެއް ކަމަށެވެ.

މީގެއިތުރުން ކައުންސިލްގެ ރައީސް ފާހަގަކުރެއްވި ގޮތުގައި، މިއީ އެ ރަށުގެ ވޮލީ އާއިލާއިން ދެކެމުން އައި ދުވަސްވީ އުންމީދެއް ހަޤީޤަތަކަށް ވެގެންދިޔަ ކަމެކެވެ. އަދި މި އައު ކޯޓާއެކު ރަށުން ފެންވަރު ރަނގަޅު، މޮޅެތި ވޮލީ ކުޅުންތެރިންތަކެއް އުފެދިގެންދާނެ ކަމަށް އުންމީދު ކުރައްވާ ކަމަށްވެސް އޭނާ ވިދާޅުވިއެވެ.

އުސްމާން ވިދާޅުވީ، ރަށުގެ ސްޕޯޓްސް އެރީނާ ތަރައްޤީކުރަމުން އަންނަ ސަރަޙައްދުގައި އަލަށް އެޅި ކޯޓަކީ، އެފަދަ ވަސީލަތެއް ޤާއިމުކުރުމަށް އެންމެ އެކަށޭނަ ތަން ކަމަށެވެ. އަދި މި ރަށަކީ ކުޅިވަރުގެ ދާއިރާއިން ފާހަގަކޮށްލެވޭ ފަދަ ކާމިޔާބު ދިގު ތާރީޚެއް އޮތް ރަށަކަށް ވުމާއެކު، މި އައު ކޯޓަކީ ރަށުގެ ވޮލީބޯޅަ ޢާއިލާއަށް ލިބިގެންދިޔަ ނުހަނު ބޮޑު ހިތްހަމަޖެހުމަކާއި އުފަލެއް ކަމުގައި އޭނާ ފާހަގަކުރެއްވިއެވެ.

ޒަމާނީ ވަސީލަތްތަކާއެކު ތަރައްޤީކުރެވުނު މި ވޮލީކޯޓަކީ ޒުވާނުންގެ މެދުގައި ކުޅިވަރުގެ ރޫޙު އާލާކޮށް، ދުޅަހެޔޮ މުޖުތަމަޢެއް ބިނާކުރުމަށް ސަރުކާރުން ކުރަމުންދާ މަސައްކަތްތަކުގެ ތެރެއިން ދިއްދޫގެ ޒުވާނުންނަށް ލިބިގެންދިޔަ މުހިންމު ހަދިޔާއެކެވެ.