"ސުލްހަވެރި ލޯބިން ފުރިގެންވާ ހުވަފެނީ ރަށްތައް"

ނަސްލީ ގޮތުންނާއި ޖިއޮގްރަފިކަލް ގޮތުން އެކަހެރިކޮށް އިންޑިޔާ ކަނޑުގައި އޮތް ސުލްހަވެރި ލޯބިން ފުރިގެންވާ ހުވަފެނީ ރަށްތައް......،"

މިއީ ރާއްޖޭގެ ރިތިކަން ދެކިލުމަށް މީގެ 52 އަހަރު ކުރިން ރާއްޖެ ވަޑައިގަތް ޖޯޖް ކޯބިން، ރާއްޖެ އާ ބެހޭ ގޮތުން ލިޔުއްވާފައިވާ "މޯލްޑިވް - ޑުއެމިލަ އައިސޮލް ފެލިސީ" (މޯލްޑިވްސް - ހާއްސަ ދެހާސް ރަށް) ފޮތް ފަށާފައިވާ ފުރިހަމަ އިބާރާތްކޮޅެވެ.

"އިންޑިއާގެ ކަޑުގެ މި ސުވަރުގޭގެ ރީތިކަން ސަރުކާރުގެ ޒިންމާދާރު ފަރާތްތަކުން ދަމަހައްޓާނެ ކަމަށް އުންމީދު ކުރަން، މި ފޮތް މި ހުށަހަޅަނީ އެ ރީތިކަން ފޮޓޯ ތަކެއްގެ ގޮތުގައި ރައްކާކުރުމަށް،"

ރާއްޖެ އަށް ޓޫރިޒަމް ތައާރަފު ކުރެއްވި އިޓަލީގެ ކޯބިން އާއި އޭނާގެ އެކުވެރިޔާ ފްރެންސެސްކޯ ބަނިނީ، އިނގިރޭސި ބަހުންނާއި އިޓަލީ ބަހުން 1973 އަހަރު ނެރުނު މި ފޮތުގައި ވެއެވެ.

މަސްވެރި ގައުމެކެވެ. ބައެއް ރަށްރަށުގައި ދަނޑުވެރިކަން ވެސް ކުރެއެވެ. އެކަމަކު ގައުމުގެ އުފެއްދުންތެރިކަން ބިނާވެފައި އޮތީ އޭރުގެ ސިލޯން މިހާރުގެ ސްރީ ލަންކާއަށް ބޭރުކުރާ ހިކިމަހަށެވެ. ދިވެހިންނަކީ އޭރު ނިކަމެތި ބައެކެވެ. ދުނިޔެއަށް ލޯ ނުހުޅުވެއެވެ. ދުނިޔެއާ ގުޅުމެއް ވެސް ނެތެވެ. ރަށްރަށުގެ އަމާންކަމުގައި ލިބޭ އެއްޗަކުން ފުއްދާލައިގެން ޝަކުވާއެއް ނެތި ދިރިއުޅެމުން ދިޔައެވެ.

ދިވެހިރާއްޖޭގައި ފޮރުވިފައި ވަރަށް ބޮޑު މުއްސަނދިކަމެއް އޮތެވެ. ގުދުރަތީ ރީތިކަމެވެ. ދޮންވެލި ގޮނޑުދޮށްތަކާއި ތުނޑިތަކެވެ. ތިލަ، ސާފު، މޫދާއި ދިރުންތަކުން ފުރިފައި އޮތް ކަނޑު އަޑީގެ ހިތްގައިމުކަމެވެ. އަދި ދިވެހިންގެ ހިތްހެޔޮކަމާއި ފުރިހަމަ މެހެމާންދާރީއެވެ. ދިވެހި ތާރީޚުން ވެސް އެކަން އެނގެއެވެ. ބޭރުގެ ތާރީޚީ އިލްމުވެރިންނާއި މަޝްހޫރު ބައެއް ދަތުރުވެރިންގެ ލިއުންތަކުގައި ދިވެހިންގެ މެހެމާންދާރީ އާއި ރީތިކަން އޮތީ ފާހަގަކޮށްފައެވެ. އެރީތިކަމުން މާލީ ފައިދާއެއް ނެރެވޭނެ ވިސްނުމެއް ނެތެވެ. އެ ޚިޔާލު އައީ، 1971ގައި އިނގިރޭސި ރައްޔިތެއް ކަމަށް ވާ އުމުރުން އެންމެ 27 އަހަރުގެ ޖޯޖް ކޯބިންއަށެވެ.

ކޮންމެވެސް ގޮތަކުން ރާއްޖެއާ ބެހޭ ގޮތުން ލިބުނު ކުޑަކުޑަ މަޢުލޫމާތުކޮޅަކާ އެކު އޭނާ ރާއްޖެއަށް ދަތުރެއް ކުރަން ނިންމިއެވެ. ރާއްޖެއަށް ޔޫރަޕުން ދަތުރުކުރާ ބޭރުގެ ފްލައިޓެއް ނެތެވެ. ކޯބިން ވަޑައިގަތީ ސްރީ ލަންކާއަށެވެ. އޭނާއާ އެކު އިޓަލީގެ ފޮޓޯގްރާފަރެއް ކަމަށްވާ ފްރެންޗެސްކޯ ބެނީނީ ވެސް ދަތުރުގައި ބައިވެރިކުރިއެވެ. ސްރީ ލަންކާގެ ވެރިރަށް ކޮލަމްބޯ، އެދުވަސްވަރު ކިޔާ ގޮތުން ނަމަ ކޮޅުނބުގައި ހުރި ރާއްޖޭގެ އެމްބަސީއަށް ކޯބިން ވަޑައިގަތެވެ.

ރާއްޖެ އުފެދިފައިވާ ގޮތާއި، ރާއްޖޭގައި މާ ގިނަ ވަސީލަތްތައް ނެތުމުގެ ސަބަބުން ފަތުރުވެރިކަމަކީ ރާއްޖޭގައި ފުޅާކުރެވިދާނެ ކަމެއް ކަމުގައި ގިނަ ބަޔަކު އޭރު ގަބޫލެއް ނުކުރެއެވެ. އެހެން ނަމަވެސް ކޯބިން އެނބުރި ގައުމަށް ވަޑައިގެން، ރާއްޖެއަށް ފަތުރުވެރިކަން ތައާރަފުކޮށްދެއްވި ބާނީއެއް ކަމަށްވާ މުހައްމަދު އުމަރު މަނިކުއާއި، ހުސައިން އަފީފްގެ އިތުރުން ކުރީގެ ހެލްތު މިނިސްޓަރ ނަސީމްގެ ބެލުމުގެ ދަށުން އެންމެ ފުރަތަމަ ފަތުރުވެރިންގެ ގްރޫޕެއް ރާއްޖެ އައީ 16 ފެބްރުއަރީ 1972 ގައެވެ.

ރާއްޖޭގެ އެންމެ ފުރަތަމަ ރިސޯޓް ހުޅުވުނީ އޮކްޓޯބަރ މަހުގެ 3 ވަނަ ދުވަހުއެވެ. އެއީ މާލެ އަތޮޅުގެ ވިހަމަނާފުށީގައި ހުޅުވި ކުރުނބާ ވިލެޖް ނުވަތަ މިހާރުގެ ނަމުންނަމަ ކުރުނބާ މޯލްޑިވްސްއެވެ. މިތަން ހަދާފައިވަނީ ވަރަށް އާދައިގެ ގޮތަކަށް އުވަޖަހައިގެންނެވެ. ކުރިމަތިވި އެކި ގޮންޖެހުތަކާއެކު ވެސް އެ ސިނާއަތް ކުރިއެރުވުމަށް އަތުކުރި އޮޅާލި މީހުންނާ ސަރުކާރުތަކުން ރާއްޖޭގެ ފަތުރުވެރިކަން ސިންދަފާތުކުރުމަށް ކުރި ބޮޑެތި މަސައްކަތްތަކުގެ ނަތީޖާ ވަރަށް ވެސް ފޮންޏެވެ.

މިއަދު ރާއްޖޭގައި ފަތުރުވެރިންނަށް ޚިދުމަތް ދިނުމަށް 175 ރިސޯޓާއި، 901 ހޮޓެލް އަދި ގެސްޓްހައުސްގެ އިތުރުން 152 ސަފާރީ އުޅަނދު ދަނީ ރަޖިސްޓްރީކޮށްގެން ޙިދުމަތް ދެމުންނެވެ. މިއީ މުޅި ޖުމްލަ 62،908 އެނދެވެ. ރާއްޖެއިން ވަނީ ދުނިޔޭގެ ފަތުރުވެރިކަމުގެ އެންމެ ޝަރަފްވެރި އެވޯޑް ވިދިވިދިގެން 4 އަހަރު ހޯދާފައެވެ. އަދި މިއަހަރުވެސް ރާއްޖެއިން ދަނީ މި އެވޯޑަށް ވާދަކުރަމުންނެވެ.

ބަހުރުހިންދުގެ މެދުން ހަވާދު މަގުގައި ގަތާލެވިފައިވާ ހާރެއްފަދަ ދިވެހި ރާއްޖޭގެ ރީތިކަމުގެ ވާހަކައަކީ އެތައް ބަޔަކު ދައްކަމުން އަންނަ ވާހަކައެކެވެ. ދުނިޔެ މަތީގެ ސުވަރުގޭގެ ނަމުން މަޝްހޫރުވެފައިވާ ދިވެހިރާއްޖޭގެ ޖާދުވީ މާހައުލާއި ކަނޑުފަޅުތަކުގެ މުއްސަނދިކަމަކީ މީހުންގެ ހިތްތައް އަތުލާފައިވާ ކަންކަމެވެ. ރާއްޖޭގެ ގައުމީ ފަތުރުވެރިކަމުގެ ދުވަސް މިއަދު ފާހަގަކޮށް، ރާއްޖޭގެ ފަތުރުވެރިކަމަށް 52 އަހަރު ފުރުން ފާހަގަކުރާއިރު މި ޖާދުވީ މާހައުލު މިގޮތުގައި ދެމި އޮންނާނެ ކަމާމެދު މިއަދު ތިމާވެއްޓާއި ބެހޭ މާހިރުންނާ ސައިންސްވެރިން ދަނީ ސުވާލު އުފައްދަމުންނެވެ.