ޒުވާނުން މަސްވެރި ދާއިރާއަށް ނެރުމަށް މަސްވެރިންގެ ދަފްތަރު ނިންމާ ފުރުސަތު ފަހިކޮށްދިނުން މުހިންމު ކަމަށް މަސްވެރިކަމާއި ކަނޑުގެ ވަސީލަތްތަކާ ބެހޭ ވުޒާރާއިން ވަނީ ބުނެފައެވެ.
މަސްވެރިކަމާއި ކަނޑުގެ ވަސީލަތްތަކާ ބެހޭ ވުޒާރާއިން މަސްވެރިންގެ ދަފްތަރެއް އެކުލަވާލުމުގެ މަސައްކަތް ކުރަމުންދާއިރު، މި ދަފްތަރުގެ ސަބަބުން މަސްވެރިންނަށް އަމާޒުކޮށްގެން ޚާއްސަ ޕްރޮގްރާމްތައް ހިންގުމަށް މަގުފަހިވެގެންދާނެ ކަމަށް އެ ވުޒާރާގެ އިސް ބޭފުޅުން ވިދާޅުވެއެވެ.
މިހާރު ވުޒާރާއިން ބަލަހައްޓާ މަޢުލޫމާތުން ސީދާ މަސްވެރިޔާއަކީ ކާކުކަން އަދި މަސްވެރިކަން ކުރަނީ ކޮންތާކު، ކޮން ދޯންޏަކުންކަން ނޭނގޭއެވެ. ނަމަވެސް މަސްވެރިންގެ ދަފްތަރު ނިމުމުން މަހަށްދާ މަސްވެރިޔާ، ދާ ދޯނި އަދި މަސްވެރިކަން ކުރާ ސަރަހައްދު އެނގިގެންދާނެ ކަމަށާއި، އެއާއެކު މަސްވެރިންނަށް ހިންގާ ޚާއްސަ ޕްރޮގްރާމްތަކަށް ވަރަށް ބޮޑު ކުރިއެރުމެއް ލިބިގެންދާނެ ކަމަށް ވުޒާރާއިން މައުލޫމާތުދެއެވެ.
މަސްވެރިންގެ ދަފްތަރު އެކުލަވާލާ ބެލެހެއްޓުން މަސްވެރިކަމުގެ ޤާނޫނުގެ ދަށުން މަސްވެރި ވުޒާރާއަށް ލާޒިމު ކޮށްފައިވިޔަސް މިހާތަނަށް އެކަން ކޮށްފައި ނުވެއެވެ. އަދި އަދުގެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަރަށް އިސްކަމެއް ދެއްވައިގެން މަސްވެރިންނަކީ ދައުލަތް ބަލައިގަންނަ ބަޔަކަށް ހެއްދެވުމަށް ނިންމަވާފައިވާ ކަމަށާއި، މަސްވެރިންނަކީ ހައިސިއްޔަތެއް އޮތް ބަޔަކަށް ހެދުމަށް ސަރުކާރުން ބޭނުންވާ ކަމަށް ވުޒާރާއިން ބުނެއެވެ.
ދިވެހިރާއްޖޭގައި އެންމެ ދޮށީ ސިނާއަތުގައި މަސްވެރިންނަކީ ކޮން ބައެއްކަން އެގޭނެ ދަފްތަރެއް ނެތުމަކީ މި ސިނާއަތަށް އޮތް ވަރަށް ބޮޑު ފަގީރުކަމެއް ކަމަށާއި މިވަގުތު ވުޒާރާގެ ސިޔާސީ މުވައްޒަފުންނާއި ޓެކްނިކަލް ބޭފުޅުން އެންމެ ބޮޑު އިސްކަމެއް ދޭ އެއް ކަމަކީ މަސްވެރިންގެ ދަފްތަރުގައި ރާއްޖޭގެ ހުރިހާ މަސްވެރިން ރަޖިސްޓްރީ ކުރުން ކަމަށްވެސް ވުޒާރާއިން މައުލޫމާތުދެއެވެ.
ޒުވާނުން މަސްވެރި ސިނާޢަތާ ދުރަށްދާ ދިއުމަށްވެސް މިކަމުގެ ސަބަބުން ހައްލު ލިބޭނެކަމަށް މަސްވެރިކަމާ ބެހޭ ވުޒާރާއިން އުއްމީދުކުރެއެވެ.
މި ސަރުކާރުން މަސްވެރިކަމުގެ ސިނާއަތް ކުރިއަރުވަން ހާއްސަ އިސްކަމެއްދެމުން އަންނައިރު ވެރިކަމާ ހަވާލުވެ 2023 ވަަ އަހަރުގެ ޑިސެމްބަރުމަހުގެ ތެރޭގައި ބޭއްވި މަސްވެރިންގެ ގުންޒަރުގައިވެސް ރައީސް ވަނީ މަސްވެރިންގެ ޝުޢޫރުތައް އަޑުއައްސަވައި، މަސްވެރީންގެ ސުވާލުތަކަށް ޖަވާބު ދެއްވައިފައެވެ.
މި ގުންޒަރުގައި ރައީސް ދެއްކެވި ވާހަކަފުޅުގައި އެމަނިކުފާނުގެ ވިސްނުންފުޅު ހުރީ މަސްވެރިކަން ވަރަށް ކުރިއަށް ގެންދެވުމަށް ކަމުގައި ވިދާޅުވިއެވެ. އެގޮތުން ރާއްޖޭގެ ޚާއްޞަ އިޤްތިޞާދީ ސަރަޙައްދުގެ ތެރެއިން ޖާގަ ލިބޭ އެންމެ ބޮޑު ސަރަޙައްދަކަށް މަސްވެރިކަން ފުޅާކުރެއްވުމާ މަސްވެރިކަމުގެ ނަފާ އިތުރުކުރުމަށް ރައީސުލްޖުމްހޫރިއްޔާ ވަޢުދުވެވަޑައިގެންފައިވާ ގޮތަށް ފެކްޓްރީތަކާއި ކޯލްޑް ސްޓޯރޭޖް ފަދަ ވަޞީލަތްތައް ގިނަ ކުރެއްވުމާ، މަހުގެ އުފެއްދުންތައް އިތުރުކުރެއްވުމަށް ސަރުކާރުން އިސްކަން ދެއްވާނެކަމުގައި އެމަނިކުފާނު ވިދާޅުވިއެވެ.
ރައީސްވަނީ ރިޔާސީ އިންތިބުގެ ތެރޭގައި މަސްވެރިންނަށް އެމަނިކުފާނު ވެވަޑައިގެންނެވި ހުރިހާ ވައުދެއް ރަނުން ރަނަށް ފުއްދަވާނެކަމުގެ ޔަގީންކަން ދެއްވާފައެވެ.
