އޯޓިޒަމް ތަހައްމަލު ކުރާ ފަރާތްތަކުގެ އަގުވަޒަންކޮށް، ޝާމިލުކުރަނިވި މުޖުތަމަޢެއް ބިނާކުރަމާ: އިޖުތިމާއީ ވުޒާރާ

އޯޓިޒަމް ތަހައްމަލު ކުރާ ފަރާތްތަކުގެ ޤާބިލިއްޔަތުކަމާއި ހުނަރުތައް ފާހަގަކޮށް، އޯގާތެރި އަދި ޝާމިލުކުރަނިވި މުޖުތަމަޢެއް ބިނާކުރަމަށް މިނިސްޓްރީ އޮފް ޖެންޑަރ، ފެމިލީ އެންޑް ސޯޝަލް ސަރވިސަސްއިން ބާރުއަޅުއްވައިފިއެވެ.

ކޮންމެ އަަހަރެއްގެ ވެސް އޭޕްރިލް މަހުގެ 2 ވަނަ ދުވަސް ފާހަގަކުރަނީ އޯޓިޒަމް އަށް ހޭލުންތެރިކުރުމުގެ ދުވަހުގެ ގޮތުގައެވެ.

ދުވަހުގެ ތަހުނިޔާ ފޮނުވާ އެ މިނިސްޓްރީން އެކްސްގައި ކުރި ޕޯސްޓެއްގައި ބުނީ އޯޓިޒަމް ހުންނަ ފަރާތްތަކަކީ މުޖުތަމަޢުގައި މުހިންމު ދައުރެއް އަދާކުރާ، އެެއްވެސް ތަފާތުކުރުމެއްނެތި މުޖުތަމަޢުގެ ހުރިހާ ކަމެއްގައިވެސް ބައިވެރިވުމުގެ ފުރުޞަތު ލިބެންޖެހޭ ބައެއް ކަމަށެވެ.

އެ ފަރާތްތަކުގެ ޤާބިލިއްޔަތުކަމާއި ހުނަރުތައް ފާހަގަކޮށް، އޯގާތެރި އަދި ޝާމިލުކުރަނިވި މުޖުތަމަޢެއް ބިނާކުރަމާ: މިނިސްޓްރީ

ބައިނަލްއަޤްވާމީ ފެންވަރުގައި އޯޓިޒަމް ދުވަސް ފާހަގަކުރަނީ އޯޓިޒަމް ހުންނަ ފަރާތްތަކުގެ ޙައްގުތަކާއި އޯޓިޒަމާ ގުޅޭގޮތުން ހޭލުންތެރިކަން އިތުރުކުރުމަށެވެ. އެންމެ ފުރަތަމަ މި ދުވަސް ފާހަގަކުރަން ފެށީ 2 އޭޕްރިލް 2007ގައެވެ.

އޯޓިޒަމާއި ގުޅޭގޮތުން ހޭލުންތެރިކުރުވުމުގެ ދުވަހުގެ މިއަހަރުގެ ޝިޢާރަކީ، "އެޑްވާންސިންގ ނިއުރޯޑައިވަރސިޓީ އެންޑް ދަ ޔޫއެން ސަސްޓެއިނަބަލް ޑިވެލޮޕްމަންޓް ގޯލްސް" މިޝިޢާރެވެ. މިއީ ސިޔާސަތުތައް ކަނޑައެޅުމުގައި އޯޓިޒަމް ހުންނަ ފަރާތްތަކުގެ ބައިވެރިވުން އޮންނާނެހެން ތަރައްޤީގެ މަސައްކަތްތައް ރޭވުމަށް ބާރު އެޅުމަށް އަލިއަޅުވާލާ ޝިޢާރެކެވެ.