އާންމު ޚިދުމަތްތެރިންގެ ޚިދުމަތްތަކަށް ރައީސުލްޖުމްހޫރިއްޔާ، ޝުކުރު ދަންނަވައިފި

ޤައުމީ ތަރައްޤީއަށާއި ރައްޔިތުންގެ ފާގަތިކަމަށްޓަކައި އާންމު ޚިދުމަތްތެރިން ކުރައްވަމުން ގެންދަވާ ބުރަ މަސައްކަތްތަކުގެ އަގު ވަޒަންކުރައްވައި، ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު އެ ބޭފުޅުންނަށް ތަޢުރީފު ކުރައްވައިފިއެވެ.

ބައިނަލްއަޤުވާމީ އާންމު ހިދުމަތުގެ ދުވަހާ ގުޅިގެން ރައީސުލްޖުމްހޫރިއްޔާ ސޯޝަލް މީޑިއާގައި ކުރެއްވި ޕޯސްޓެއްގައި، އާންމު ހިދުމަތްތެރިންގެ އިޚްލާސްތެރި މަސައްކަތްތައް ވަނީ ފާހަގަކުރައްވާފައެވެ.

ރައީސުލްޖުމްހޫރިއްޔާގެ މެސެޖުގައި، މުޖުތަމަޢުގެ ކުރިއެރުމަށާއި ދެމެހެއްޓެނިވި ތަރައްޤީގެ ލަނޑުދަނޑިތައް ހާސިލުކުރުމަށްޓަކައި، އާންމު ޚިދުމަތްތެރިން ވަރުބަލިކަމެއް ނެތި ކުރައްވާ މަތިވެރި މަސައްކަތްތަކަށް ސާބަސް ދެއްވިއެވެ. އަދި އެ ބޭފުޅުންގެ ވަގުތާއި ހަކަތަ ޤައުމީ ޚިދުމަތުގައި ހޭދަކުރައްވާތީ އެކަން ވަނީ ފާހަގަކުރައްވާފައެވެ.

މީގެ އިތުރުން، އާންމު ހިދުމަތްތެރިންނަކީ ނަޒާހަތްތެރިކަމާއި ފަންނީ ހުނަރުވެރިކަމާއެކު މަސައްކަތްކުރާ ބައެއްކަން ފާހަގަކުރައްވަމުން، ދަޢުލަތުގެ މުއައްސަސާތައް ހަރުދަނާކޮށް ޚިދުމަތްތެރިންނަށް އެއްބާރުލުން ދިނުމުގައި ސަރުކާރުން އަބަދުވެސް ދެމިއޮންނާނެކަމުގެ ޔަޤީންކަން ރައީސުލްޖުމްހޫރިއްޔާ ދެއްވިއެވެ.

ދިވެހިރާއްޖޭގެ އެކި ކަންކޮޅުތަކުގައި ޤައުމީ ހިދުމަތުގައި ސާބިތުކަމާއެކު ދެމިތިއްބެވި ހުރިހާ ޚިދުމަތްތެރިންނަށާއި ދަޢުލަތުގެ މުއައްސަސާތަކަށް، އެ ފަރާތްތަކުން ވަމުންދާ ޤުރުބާނީއަށްޓަކައި ރައީސުލްޖުމްހޫރިއްޔާ އިހްލާސްތެރިކަމާއެކު ޝުކުރު އަދާކުރެއްވިއެވެ.