ފަރުވާއަށް ހޮސްޕިޓަލަށް ގެންދިޔަ ގައިދީއަކު ފިލައިގެން ހޯދަން ފަށައިފި

ބަލިހާލަތާ ގުޅިގެން ފަރުވާ ދިނުމަށް ހޮސްޕިޓަލަށް ގެންދިޔަ ގައިދީއަކު ފިލާފައިވާތީ، އޭނާ ހޯދުމުގެ މަސައްކަތް ކަމާބެހޭ އިދާރާތަކުން ފަށައިފިއެވެ.

މޯލްޑިވްސް ކަރެކްޝަނަލް ސާވިސްއިން ހާމަކުރެއްވި ގޮތުގައި، ހުޅުމާލޭ ހޮސްޕިޓަލަށް ގެންގޮސްފައިވަނިކޮށް ފިލާފައިވަނީ ހުޅުމާލޭ ޖަލުގައި ހުކުމް ތަންފީޒު ކުރަމުންދިޔަ ލ. މާބައިދޫ، ޝަބްނަމް ހައުސް، ހުސެއިން ޝަހުބާންއެވެ. އޭނާ ހޯދުމަށްޓަކައި ފުލުހުންނާ ގުޅިގެން ޚާއްޞަ މަސައްކަތްތަކެއް ކުރަމުންދާ ކަމަށް އެ މުއައްސަސާއިން ވިދާޅުވިއެވެ.

މި މީހާއާ ގުޅޭ އެއްވެސް މައުލޫމާތެއް ލިބިފައިވާ ފަރާތެއްވާނަމަ، ލަސްނުކޮށް ފުލުހުންގެ ނަންބަރު 3322111 އަށް ގުޅުއްވައި އެކަން ހިއްސާކުރުމަށް ކަރެކްޝަނުން ވަނީ އިލްތިމާސްކުރައްވާފައެވެ.

ފަރުވާއަށް ގެންދިޔަ ގައިދީއަކު ފިލި މި މައްސަލަ ފެންމަތިވެފައިވާއިރު، މި މަހުގެ 8 ވަނަ ދުވަހު ގއ. އަތޮޅު ހޮސްޕިޓަލުގައި އެނދުމަތިކޮށްގެން ފަރުވާދެމުންދިޔަ ބަންދު މީހަކުވެސް ވަނީ ފިލާފައެވެ. ނަމަވެސް، ފުލުހުން ކުރި މަސައްކަތުން އެ މީހާ ވަނީ ހަމަ އެ ދުވަހު އަލުން ހައްޔަރުކޮށްފައެވެ.