ވިހި ހާހަށްވުރެ ގިނަ މެމްބަރުންގެ ތާޢީދާއި އެކު ރައީސް ސޯލިހު ފޯމް ހުށަހަޅުއްވައިފި

އަންނަ މަހު 28 ގައި ބޭއްވުމަށް ހަމަޖެހިފައިވާ އެމްޑީޕީގެ ރިޔާސީ ޕްރައިމަރީގައި ވާދަކުރެއްވުމަށް ރައީސް ސޯލިހު ފޯމު ހުށަހަޅުއްވައިފިއެވެ.

ވިހިހާހަށް ވުރެ ގިނަ އެމްޑީޕީގެ މެމްބަރުންގެ ތާޢީދާއި އެކު ރައީސްގެ ފަރާތުން ފޯމް ހުށަހެޅުއްވީ، ރައީސް ސޯލިހުގެ ކެމްޕެއިން މެނޭޖަރ މަޖިލީހުގެ ކިނބިދޫ ދާއިރާގެ މެންބަރު މުހައްމަދު ނާޝިޒް އެވެ.

މިކަމާއި ގުޅިގެން މުހައްމަދު ނާޝިޒް ކުރެއްވި ޓްވީޓެއްގައި ވިދާޅުވީ 2023 ގެ ރިޔާސީ އިންތިހާބުގައި ވާދަކުރާނެ އެމްޑީޕީގެ ކެނޑިޑޭޓެއް ހޮވަން ބާއްވާ ޕްރައިމަރީގައި ވާދަ ކުރެއްވުމަށް 20،000 އަަށް ވުރެ ގިނަ މެމްބަރުންގެ ތާއީދާއި އެކު ރައީސް ސޯލިހުގެ ކެންޑިޑަސީ ފޯމު ޕާޓީގެ އޮފީހަށް ހުށައަޅުއްވާފައިވާ ކަމަށެވެ.

2023ގެ ރިޔާސީ އިންތިޚާބުގައި ވާދަކުރާނެ އެމް.ޑީ.ޕީގެ ކެނޑިޑޭޓެއް ހޮވުމަށް ބާއްވާ ޕްރައިމަރީގައި ވާދަ ކުރެއްވުމަށް،20k އަަށް ވުރެގިނަ މެމްބަރުންގެ ތާއީދާއި އެކު، ރައީސް @ibusolih ގެ ކެންޑިޑަސީ ފޯމު ހުށައަޅުއްވައިފި.
މާތް الله މަނިކުފާނަށް ކާމިޔާބު މިންވަރު ކުރައްވާށި. އާމީން pic.twitter.com/MDoPIlfKwX

— Mohamed Nashiz (@Mnashiz) December 24, 2022

ރިޔާސީ ޕްރައިމަރީގައި ރައީސް ސޯލިހާއި ވާދަކުރައްވަނީ ރައީސް ނަޝީދެވެ. ނަޝީދު ވަނީ ޑިސެމްބަރު ދެވަނަ ދުވަހު ޕްރައިމަރީގައި ވާދަކުރައްވަން ފޯމް ހުށަހަޅައިފައެވެ.

ރިޔާސީ ޕްރައިމަރީގައި ރައީސް ސޯލިހާއި ނަޝީދު ވާދަކުރަން ނިންމުމުން މިއީ އެމްޑީޕީގެ ތާރީޚްގައި އެޕާޓީން ބާއްވާ އެންމެ ވާދަވެރި އިންތިހާބަށް ވާނެ ކަމަށް ވަނީ ބެލެވިފައެވެ. މީގެ ކުރިން އެމްޑީޕީން ބޭއްވި އެންމެ ވާދަވެރި އެއް އިންތިހާބަކީ 2008 ވަނަ އަހަރުގެ ރިޔާސީ ޕްރައިމަރީ އެވެ.

ރިޔާސީ ޕްރައިމަރީއާއި ގުޅިގެން ރައީސް ނަޝީދު ވިދާޅުވެފައިވަނީ ޕްރައިމަރީގެ ވޯޓު ގަޑުބަޑުވާނެ ކަމަށާއި، ސަބަބަކީ އެމްޑީޕީގެ ދަފުތަރުން ގިނަ ބަޔަކު އުނިކޮށްފައި އޮތުމުން ކަމަށެވެ.

ރައީސް ނަޝީދުގެ މި ތުހުމަތާއި ގުޅިގެން އެންޑީޕީގެ ޑެޕިއުޓީ ޗެއަރޕާސަން އިބްރާހިމް ވަހީދު (އިބްރޭ) ކުރެއްވި ޓްވީޓެއްގައި ވިދާޅުވީ، 29 މޭ 2022 ގެ ޤައުމީ މަޖިލިސް އަށް މެންބަރޝިޕް ސާފުކުރުމުގެ ގަރާރު ހުށައެލުމުގެ ކުރިން ޤައުމީ މަޖިލިސް މެންބަރުންނަށް ލިޔުމެއް އެބޭފުޅާ ހިއްސާކުރެއްވި ކަމަށާއި، މެންބަރޝިޕް ސައްހަ ކުރުމަށް 3 މަސް ދެވުނު ކަމަށެވެ. އަދި އޭރު ދަފުތަރުގައި ތިބި 39،000 މީހުންގެ ތެރޭގައި އީސީގައި އެހެންޕާޓިތަކުގެ ރަޖިސްޓަރީގައި އޮތް 17،156 މީހުން ތިބި ކަމަށްވެސް އިބްރޭ ވިދާޅުވިއެވެ.