އުތީމުގައި ގުރްއާނާ ބެހޭ މަރުކަޒުގެ އައުޓްރީޗް ސެންޓަރެއް ހުޅުވައިފި

ހއ އުތީމުގައި ގުރްއާނާ ބެހޭ މަރުކަޒުގެ އައުޓްރީޗް ސެންޓަރެއް ހުޅުވައިފިއެވެ.

އުތީމުގައި މި ސެންޓަރު ހުޅުވުމަށް ބޭއްވި ހާއްސަ ރަސްމިއްޔާތު ޝަރަފުވެރިކޮށްދެއްވައި، ސެންޓަރު ހުޅުވައިދެއްވީ އިސްލާމިކް މިނިސްޓްރީގެ ޑެޕިއުޓީ މިނިސްޓަރ އަލްފާޟިލް އަބްދުލް ގަފޫރު އަހްމަދު އެވެ.

ކީރިތި ގުރުއާނާ ބެހޭ މަރުކަޒުން މަޢުލޫމާތު ދެއްވި ގޮތުގައި، އަލަށް ހުޅުވުނު އުތީމު އައުޓްރީޗު ސެންޓަރުގައި އެ މަރުކަޒުގެ ހުރިހާ ތަޢުލީމީ ޕްރޮގްރާމްތަކެއް ކުރިއަށް ގެންދިއުމަށް ވަނީ ރޭވިފައެވެ.

މިގޮތުން އެންމެ އިސްކަމެއް ދީގެން ކުރިއަށްގެންދާ ހާއްސަ ޕްރޮގްރާމަކީ ކީރިތި ގުުރުއާން ހިތުދަސްކުރުމުގެ ކްލާސްތަކެވެ.

7 އަހަރުން މަތީގެ ކޮންމެ ފަރާތަކަށްވެސް ބައިވެރިވުމުގެ ފުރުސަތު ހުޅުވާލެވިފައިވާ މި ކްލާސްތަކުގެ އިތުރުން، ގާރީ ކޯހުގެ ސެޓްފިކެޓް ލެވެލް 1 އަކުން ފެށިގެން ލެވެލް 4 އާ ހަމައަށް އެ ސެންޓަރުގައި ކިޔަވައިދެވޭނެއެވެ.

މި ސެންޓަރުގެ ޙިފްޒު ކްލާސްތަކަށް ދަރިވަރުން އިތުރުކުރުމަށް މިހާރު ވަނީ އިއުލާނުކޮށްފައެވެ.

އެޕްރީލް މަހުގެ 12 ވަނަ ދުވަހުގެ ނިޔަލަށް މަރުކަޒުގެ އޮންލައިން ޕޯޓަލް މެދުވެރިކޮށް ކޯސްތަކަށް އެދި ހުށަހެޅުމުގެ ފުރުސަތު ވަނީ ހުޅުވާލެވިފައެވެ.

ކޯހަށް ކުރިމަތިލާ ފަރާތްތަކާ އިންޓަވިއުކޮށް، ޤުރްއާން ކިޔެވުމުގެ ފެންވަރު ވަޒަންކުރުމަށްފަހު، އެންމެ އެކަށީގެންވާ ދަރިވަރުންނަށް ކްލާސްތަކުން ޖާގަ ދެވޭނެ ކަމަށްވެސް އެ މަރުކަޒުން ވަނީ ބުނެފައެވެ.