"ސިކުނޑިއަށް ކާނާދީ، ޢިލްމާއި ބުއްދިވެރިކަން ގެނެސްދޭން އަޅުގަނޑުމެން މަސައްކަތްކުރާ ބީދައިން، ދުޅަހެޔޮ އާބާދީއެއް ބިނާކުރަންވެސް އިސްކަން ދޭންޖެހޭ. އަޅުގަނޑުމެން ސަރުކާރާ ހަވާލުވިއިރު، ރާއްޖޭގެ ޞިއްޙީ ޚިދުމަތް އޮތީ ކަންބޮޑުވާ ފަދަ ހާލަތެއްގައި." 2024 ވަނަ އަހަރުގެ ރިޔާސީ ބަޔާން އިއްވަވަމުން ދިވެހިރާއްޖޭގެ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވިއެވެ.
އެމަނިކުފާނު ވެރިކަމާ ހަވާލުވެވަޑައިގަތްތާ މިއަދަށް 365 ދުވަސް ފުރުނު އިރު ރާއްޖޭގެ ސިއްހީ ދާއިރާއަށް ފާއިތުވި އެއް އަހަރު ތެރޭ ސަރުކާރުން ވަނީ އިންގިލާބީ ހެޔޮ ބަދަލެއް ގެނަސްދީފައެވެ. މިއީ މިއަދު ދިވެހި ހުރިހާ ރައްޔިތުންވެސް ގަބޫލުކުރާ ހަގީގަތެކެވެ. އެގޮތުން ފާހަގަކޮށްލެވޭ ބައެއް މުހިއްމު ކާމިޔާބީތަކަށް އަވަސް ނަޒަރެއް ދޭނަމެވެ.
ސަރުކާރު ބަދަލުވިތާ މާގިނަ ދުވަހެއް ނުވެ ކުއްލި ޙާލަތްތަކުގައި ބަލިމީހުންނަށް ފަރުވާދިނުމަށްޓަކައި މާލެއާއި ވިލިމާލެއާ ދެމެދު ސީ އެންމެބިއުލާންސްގެ ޚިދުމަތް ފެށިގެންދިޔައެވެ. ޖެނުއަރީ މަހު ފެށުނު އެންބިއުލާންސްގެ ޚިދުމަތް ފޯރުކޮށްދޭއިރުވެސް، އަދި ހޮސްޕިޓަލްގެ ޚިދުމަތް ފޯރުކޮށްދޭއިރުވެސް ބޭނުންވާ ޚިދުމަތްތަކާއި ދިމާވާ ދަތިތައް ހިއްސާކުރުން މުހިންމު ކަން މިނިސްޓްރީން ފާހަގަކުރެއެވެ. އަދި ވިލިމާލެ ހޮސްޕިޓަލްގެ ޚިދުމަތް ފުޅާކުރުމަށްޓަކައި 100 އެނދުގެ އައު ހޮސްޕިޓަލް އަޅަން ޑިޒައިން ކުރުމުގެ މަސައްކަތް ކުރަމުން އަންނަކަން ހާމަކޮށްފައިވެއެވެ.
އިސްރަށްވެހިންނަށް ޚާއްސަ ކްލިނިކަކާއި އެފަރާތްތަކުން ހޮސްޕިޓަލަށް އައުމުގެ ބަދަލުގައި ގޭގައި ތިބެގެން މެމޯ ހެއްދުމުގެ ޚިދުމަތް ރަސްމީކޮށް ތައާރަފު ކުރީ ވެސް މިއަހަރުގެ ޖެނުއަރީ މަހުގެތެރޭގައެވެ. އައިޖީއެމްއެޗުގައި ފެށި މިކްލިނިކްގެ ޚިދުމަތް، ރާއްޖޭގެ ހުރިހާ އަތޮޅަކަށް ފުޅާކުރެއްވުމަކީ ރައީސުލްޖުމްހޫރިއްޔާގެ މުހިންމު ވަޢުދުފުޅެކެވެ. އިސްރަށްވެހީންނަށް ޚާއްޞަ ޞިއްޙީ ފަރުވާ ލިބޭނެ އިންތިޒާމުތައް ފުޅާކުރުމުގެ މަސައްކަތް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ހަފްތާ-14 މަގުޗާޓުގައިވެސް ވަނީ ހިމަނުއްވާފައެވެ.
ނަފްސާނީ އިޖުތިމާޢީ އެހީތެރިކަމުގެ ޤައުމީ ހެލްޕް ލައިން އިފްތިތާހު ކުރުމަކީވެސް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ހަފްތާ 14ގެ މަގުޗާޓުގައި ހިމަނުއްވާފައިވާކަމެކެވެ. އެގޮތުން ނަފްސާނީ ބަލި ތަޙައްމަލު ކުރަމުންދާ މީހުންނަށް ފުރަތަމަ އެހީ ފޯރުކޮށްދިނުމުގެ ގޮތުން ޤައުމީ ހެލްޕް ލައިން އިފްތިތާހު ކުރީ މިއަހަރުގެ ފެބްރުއަރީ މަހުގެތެރޭގައެވެ. ނަފްސާނީ ޞިއްޙަތުގެ ހެލްޕް ލައިންގެ އަމާޒަކީ ނަފްސާނީ ހާލަތެއް ނުވަތަ އުނދަގޫތައް ތަޙައްމަލުކުރަމުންދާ އެކި އުމުރުފުރައިގެ މީހުންނަށް ކޮންމެ ގަޑިއެއްގައިވެސް ގުޅާ އެޚިދުމަތް ފޯރުކޮށްދިނުމެވެ. 1677 އަކީ 24 ގަޑިއިރު ޚިދުމަތް ދޭ ހެލްޕް ލައިނެކެވެ.
އޭގެ އިތުރުން ފާއިތުވި 365 ދުވަހުގެ ތެރޭގައި ރާއްޖެއަކީ ހެޕަޓައިޓިސް ބީ ކޮންޓްރޯލް ކުރެވިފައިވާ ޤައުމެއް ކަމުގައި ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ކަނޑައަޅާފައިވާއިރު ރާއްޖެއަށް ބޭސް އެތެރެކުރުމުގައި ހުރި ދަތިތައް ހައްލުކުރުމަށް މާލީ ވުޒާރާއިން ޔުނައިޓެޑް ނޭޝަންސް ޑިވެލޮޕްމަންޓް ޕްރޮގްރާމް (ޔޫއެންޑީޕީ) އާއެކު އެއްބަސްވުމެއްގައި ވެސް ސޮއި ކޮށްފައިވެއެވެ.
އެންމެ ބޮޑު އަދި އެންމެ މުހިއްމު ކަމެއްގެ ގޮތުގައި ފާހަގަކޮށްލެވިގެންދިޔައީ ރައީސްގެ ރިޔާސީ ވައުދުފުޅެއް ކަމުގައިވާ އެއަރ އެމްބިއުލާންސްގެ ޚިދުމަތް ފެށިގެން ދިޔުމެވެ. އެގޮތުން ކުއްލި ހާލަތުގައި ރާއްޖޭގެ އެކި ކަންކޮޅުތަކުން ވައިގެމަގުން މާލެ ގެންނަންޖެހޭ ބަލި މީހުންނާ، ރާއްޖެއިން ބޭރަށް ގެންދަން ޖެހޭ ފަރާތްތައް އުފުލުމަށް އެ ޚިދުމަތް ތައާރަފު ކުރެވުނީ މިއަހަރުގެ މާޗު މަހުގެ އެއް ވަނަ ދުވަހުގައެވެ. އެއަށްފަހު ޖެހިގެން އައި އޭޕްރީލް މަހު ވަނީ ރާއްޖޭގައި މީހުން އާބާދުވެފައިވާ ކޮންމެ ރަށެއްގައި ސިއްހީ ފަރުވާއަށް ބޭނުންވާ ލެބޯޓްރީގެ ޚިދުމަށް ފުޅާކުރުމުގެ މަޝްރޫއު ތަންފީޒުކުރަން ފަށާފައެވެ.
ސިއްހީ ނިޒާމު ހަރުދަނާކޮށް، ދުޅަހެޔޮ ސިއްހަތެއްގެވެރި މުޖުތަމައުއަކަށް މިގައުމު ހެދުމަށްޓަކައި މި ސަރުކާރުން ފެށި މަސައްކަތުގެ ދަށުން ރާއްޖޭގެ ކޮންމެ މީހަކަށް އަހަރަކު 2 ފަހަރު ހިލޭ އާސަންދައިގެ ދަށުން މެޑިކަލް ޗެކަޕް ހެދޭނެ އިންތިޒާމު މިވަނީ ހުޅިވިފައެވެ. ސަރުކާރުގެ ޞިއްޙީ ފަރުވާ ދޭ ކޮންމެ ހޮސްޕިޓަލަކުންވެސް މެޑިކަލް ޗެކަޕް ހެދޭނެއެވެ. މި އިންތިޒާމުގެ ތެރެއިން އުމުރުން 40 އަހަރުން މަތީގެ ކޮންމެ މީހަކަށްވެސް ކެންސަރ ސްކްރީންކުރެވޭނެ އިންތިޒާމްވަނީ ހަމަޖައްސާފައެވެ. އަދި ކާބޯތަކެތީގެ ރައްކާތެރިކަން ކަށަވަރުކުރުމަށް ޤާނޫނީ އިމުގެ ތެރެއިން މަސައްކަތްކުރުމުގެ ބާރުވެރިކަން މޯލްޑިވްސް ފުޑް އެންޑް ޑްރަގް އޮތޯރިޓީއަށް ލިބިދޭ "ކާބޯތަކެތި ރައްކާތެރިކުރުމުގެ ޤާނޫނު" ތަންފީޒުކުރަން ވެސް ވަނީ ފަށާފައެވެ.
މީގެއިތުރުން، ތެލެސީމިއާ ކުދިންނަށް ފަރުވާދޭނެ ޚާއްސަ ހޮސްޕިޓަލެއް މިދައުރުގެ ތެރޭގައި ހުޅުމާލޭގައި ބިނާކުރުމަށް ރައީސުލްޖުމްހޫރިއްޔާ ވެވަޑައިގެންނެވި ވަޢުދުފުޅާއެއްގޮތަށް ތަރައްޤީކުރާ ހޮސްޕިޓަލު ތަރައްޤީކުރުމަށް ފަހުމުނާމާގައި މެލޭޝިޔާގެ ކުންފުންޏާކާއެކު މިދިޔަ އޮކްޓޫބަރު މަހު ވަނީ ސޮއި ކޮށްފައެވެ. ސިއްހީ ގޮތުން ގިނަ ކާމިޔާބީތަކެއް ހޯދި އެ މަހު ދުނިޔޭގެ ޞިއްޙަތު ޖަމްޢިއްޔާއާއި ދިވެހިރާއްޖެއާއި ގުޅިގެން މަސައްކަތްކުރުމުގެ ސްޓްރެޓީޖިކް ޕްލޭނެއް ވެސް އިފްތިތާހު ކޮށްފައިވެއެވެ. މި ސްޓްރެޓީޖިކް ޕްލޭން އެކުލަވާލާފައިވަނީ 2024 ވަނަ އަހަރުން ފެށިގެން 2029 ވަނަ އަހަރާ ދެމެދު ގުޅިގެންކުރާނެ މަސައްކަތްތަކުގެ މައްޗަށެވެ.
ހަމަ އެ މަހު ކުރިއަށް އޮތް 4 އަހަރުގެ ތެރޭގައި ދުންފަތް ކޮންޓްރޯލްކުރުމަށް މަސައްކަތްކުރުމަށް ޚާއްސަ މާސްޓަރ ޕްލޭނެއް އެކުލަވާލުމުގެ މަސައްކަތްކުރެއްވުމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ނިންމެވިއެވެ. ހަމައެހެންމެ ރައީސުލްޖުމްހޫރިއްޔާގެ ވަޢުދުފުޅާ އެއްގޮތަށް ސަރުކާރުން ބޭހުގެ އަގު ކޮންޓްރޯލް ކުރުމަށް ވެސް ވަނީ ނިންމާފައެވެ. އެގޮތުން ނޭޝަނަލް ސޯޝަލް ޕްރޮޓެކްޝަން އޭޖެންސީ، އެންސްޕާއިން ބުނީ ފުރަތަމަ މަރުޙަލާގެ ދަށުން 250 ބޭހެއްގެ އަގު މިހާރު ވަނީ ކޮންޓްރޯލް ކޮށްފައެވެ.
ސަރުކާރުގެ ހެލްތު އިންޝުއަރެންސްކަމަށްވާ އާސަންދައިގެ ދަށުން ބޭހަށް ކުރެވޭ ހޭދަ އަހަރުން އަހަރަށް ދަނީ އިތުރުވަމުންނެވެ. މިމައްސަލައަށް ޙައްލެއް ގެނެސް ކޮލިޓީ ބޭސް ރައްޔިތުންނަށް ލިބޭނެ އިންތިޒާމު ހަމަޖެއްސުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދުފުޅެކެވެ. މިގޮތުން ބޭހުގެ އަގު އަތްނުފޯރާ ފަށުގައި ފައިދާ ލައިގެން ވިއްކަމުންދާ ދިޔުން ހުއްޓުވުމަށް އެޅެންހުރި ފިޔަވަޅުތައް ވީއެންމެ އަވަހަށް އެޅުއްވުމަށް ކަމާ ގުޅުންހުރި ހުރިހާ އިދާރާއަކަށް ރައީސުލްޖުމްހޫރިއްޔާ އެންގެވީ މިދިޔަ ސެޕްޓެމްބަރު މަހުގައެވެ.
އަވަހަށް ބަލި ދެނެގަތުމާއި، ވަށާޖެހޭ ޞިއްޙީ ނިޒާމެއްގެ ތެރެއިން ރައްޔިތުންނަށް ފެންވަރު ރަނގަޅު ޞިއްޙީ ޚިދުމަތް ފޯރުކޮށްދޭންޖެހެއެވެ. އެކަމަށްޓަކައި ޕްރިވެންޓިވް ހެލްތު ކެއަރ ނިޒާމު ފުޅާކޮށް، ހަރުދަނާކުރުމަށް ބޭނުންވާ ޚާއްޞަ ޕުރޮގުރާމުތައް ތަންފީޒުކުރުމަށް މި އަހަރަށް ޚާއްޞަ ބަޖެޓެއް ހަމަޖެއްސިއިރު ސަރުކާރުގެ ފުރަތަމަ 9 ހަފުތާގެ ތެރޭގައި، "އައިވީއެފް ޓްރީޓްމަންޓް" ހިމެނޭހެން ދަރިމައިވުމާ ގުޅޭ ފަރުވާގެ ޚިދުމަތްތަކަށް އަދި އަންހެނުންނަށް ދިމާވާ ޞިއްޙީ ބައެއް ޚާއްޞަ ހާލަތްތަކާ ގުޅޭ ފަރުވާތަކަށްވެސް އާސަންދަ ހަމަޖައްސައިދޭން ވަނީ ފަށާފައެވެ. މީގެ އިތުރުން އަންނަ އަހަރަށް ލަފާކުރާ ބަޖެޓުގައި ވެސް މި ދާއިރާއަށް މުހިއްމު ކަންތައްތަކެއް ކަނޑައަޅާފައިވެއެވެ. އެގޮތުން ބަޖެޓުގައި ފާހަގަކޮށްލެވޭ ސިއްހީ ދާއިރާއަށް ހާއްސަކޮށްފައިވާ މަޝްރޫއުތަކުގެ ތެރޭގައި ކެންސަރުގެ ފަރުވާއަށް ހާއްސަ ހޮސްޕިޓަލަކާއި މެންޓަލް ހެލްތު ހޮސްޕިޓަލެއް ގާއިމުކުރުން ހިމެނެއެވެ. އަދި އެކިރަށްރަށުގައި ހެލްތު ސެންޓަރުތަކާއި ހޮސްޕިޓަލުތަކުން ލިބޭ ހިދުމަތްތައް ފުޅާކުރުމާއެކު އެތަންތަން ތަރައްގީކުރުމަށްވެސް މި ބަޖެޓުގައި އިސްކަންދީފައިވެއެވެ.
މިއީ ހައްތަހާ ވެސް އެއް އަހަރުން ހާސިލް ކޮށްފައިވާ މައިގަނޑު ކާމީޔާބީތަކެވެ. މީގެ އިތުރުން ވެސް މި ދާއިރާ އިތުރު ހަރުފަތަކަށް ގެންދިޔުމުގައި ސަރުކާރުން އިތުރު ކާމިޔާބީތަކެއް ވެސް ހޯދާފައިވާއިރު ސިއްހީ ނިޒާމު ހަރުދަނާ ކުރަން ފާއިރު 365 ދުވަހު ކުރެވުނު މަސައްކަތަކީ އާދައިގެ، އަދި ކުޑަ މަސައްކަތްތަކެއް ނޫންކަން އެއީ މިއަދު ގަބޫލުކުރަން ޖެހޭ ހަގީގަތެކެވެ.
