އެނބުރޭ ވަހުތާނެއްގެ ފުރިހަމަ މިސާލު! ރައްޔިތުންގެ ލޯ ކުރިމަތިން

2019 ވަނަ އަހަރުގެ މެއި މަހުގެ 28 ވަނަ ދުވަހު ވަނަ ދުވަހު އައި 19 ވަނަ ރައްޔިތުންގެ މަޖިލިސް ނިންމާލީ 178 ބިލުގެ މަސައްކަތާއެކު މިހާތަނަށް އެންމެ ގިނަ މަސައްކަތް ކުރި މަޖިލީހުގެ ޝަރަފު ހޯދާފައެވެ. ނަމަވެސް އެމްޑީޕީގެ ސުޕަ މެޖޯރިޓީ އޮތް އެ މަޖިލީހަކީ ރައްޔިތުންނަށް ބަލައިގަންނަން އުނދަގޫވި މަޖިލީހެކެވެ.

ކަންތައްތައް ކުރަމުންދިޔަ ގޮތާ ނިންމަމުން ދިޔަ ބޮޑެތި ނިންމުންތަކުން ރައްޔިތުން ތިބީ ބޮޑު ހާސްކަމެއްގެ ތެރޭގައެވެ. ނުތަނަވަސްކަމެއްގެ ތެރޭގައެވެ. ވެރިކަމުގައި ވެސް އެމްޑީޕީ ސަރުކާރެކެވެ. މަޖިލީސް މެޖޯރިޓީ ވެސް އެމްޑީޕީއަށެވެ. 2018 ވަނަ އަހަރުން ފެށިގެން ފާއިތުވި 2023 ވަނަ އަހަރާ ހަމައަށް މި ގައުމުގައި ހިނގަމުން ދިޔައީ ހަމަ އެ އެމްޑީޕީގެ ބާރެވެ.

އެންމެ ފުރަތަމަވެސް ވެރިކަން ލިބި އަދި މަޖިލިސް މެޖޯރިޓީވެސް ލިބި ބާރުތައް މުށުތެރެއަށް ލެވުމާއެކު ކުރާންފެށި ކަމަކީ ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީއަށް ފުލުފުލުގައި އިސްލާހުތައް ގެންނަން ފެށުމެވެ. އެގޮތުން ކައުންސިލްތަކުގެ އުމުރު ފަސް އަހަރަށް އިތުރު ކުރުމާއި، ކައުންސިލްތަކުގެ ރައީސުންނާއި ނައިބު ރައީސުންނަކީ ސީދާ ރައްޔިތުންގެ ސިއްރު ވޯޓަކުން އިންތިހާބުކުރެވޭ ބައެއްކަމުގައި ހަމަޖެއްސުމަށްޓަކައި ގާނޫނު އަސާސީއަށް އިސްލާހު ހުށަހެޅިއެވެ.

ލޯކަލް ކައުންސިލްތަކުގެ އިންތިހާބު ވަކި ތާރީހެއް ނެތްގޮތަށް ފަސްކުރަންޖެހި، އަދި ލޯކަލް ކައުންސިލްތަކަށް ދިމާވާނެ ގާނޫނީ ހުސްކަމަށް ހައްލެއް ހޯދުމަށްޓަކައި ގާނޫނުއަސާސީއަށް އިސްލާހު ގެންނަން ވެސް ހުށަހެޅިއެވެ. އެންމެ ބޮޑު އެއްކަމެއްގެ ގޮތުގައި ފާހަގަކޮށްލެވުނީ އެމްޑީޕީ އަދި ދަ ޑިމޮކްރެޓްސް ގުޅިގެން އެންޓި-ޑިފެކްޝަން ބިލެއް ވެސް ވަނީ ހުށަހަޅާފައެވެ.

19 ވަނަ މަޖިލީހުން ގާނޫނު އަސާސީއަށް ޖުމްލަ ނުވަ އިސްލާހު ހުށަހެޅިއިރު މިއިން އެއްވެސް އިސްލާހަކަށް ފުޅާ ދާއިރާއެއްގައި މަޝްވަރާކޮށްފައެއް ނުވެއެވެ. އެއިސްލާހުތައް ގެނައުމުގައި ހަމައެކަނި މެޖޯރިޓީ ޕާޓީ އެދޭގޮތަށް ގެންދިޔުމުގެ ބަދަލުގައި ހުރިހާ ޕާޓީތަކަށް އެއްބަސްވެވޭ ގޮތަށް އެކަން ކުރިޔަށް ގެންދިޔުމަކީ ބުއްދިވެރިކަމެއް ކަމަށް އޭރު މަޖިލީހުގައި ތިއްބެވި މެންބަރުން ވިދާޅުވި ނަމަވެސް މެޖޯރިޓީ އޮތް އެމްޑީޕީން އެކަމަށް ވެސް ދިނީ ބީރު ކަންފަތެކެވެ. ބޭނުން ބިލެއް ބޭނުން ގޮތަކަށް ފާސްކުރަމުންދިޔައީ އިދިކޮޅަށް އެއްޗެއް ބުނާނެ ފުރުސަތެއް ވެސް ދިނުމެއްނެތިއެވެ.

ވިސްނުމެކޭ އެނބުރޭ ވަހުތާނެކޭ އެއްފަދައެވެ. 2018 ވަނަ އަހަރު ކުރީގެ ރައީސް ޔާމީންގެ ސަރުކާރުން އެންޓި ޑިފެކްޝަން ޤާނޫނު ފާސްކުރާތީ އެމްޑީޕީން އެކަމާ ދެކޮޅު ހެދިއެވެ. އަޑުގަދަކޮށް މަގުތަކަށް ވެސް ނިކުތެވެ. އަދި 2019 ވަނަ އަހަރު އެމްޑީޕީން ވެރިކަމަށް އައިސް މަޖިލިސް އެންޓި ޑިފެކްޝަން ޤާނޫނު އުވައިލިއެވެ. ނަމަވެސް 2023 ވަނަ އަހަރު އެއްކަލަ ސުޕަމެޖޯރިޓީ ގެއްލިދާނެހެން ހީވުމުން އަލުން އެ ގާނޫނު ހެދިއެވެ. އޭރު ބުނީ އެންޓި ޑިފެކްޝަން ގާނޫނެއް ނެތުމުގެ ސަބަބުން ޕާޓީއަށް ވާ ގެއްލުމަށްވުރެ ގައުމަށްވާ ގެއްލުން ބޮޑުކަމަށެވެ.

އެގޮތުން ރައްޔިތުން އެ މެންބަރަކު ގޮނޑިއަށް އިންތިޚާބުކުރަނީ ވަރަށް ބޮޑު އިތުބާރަކާއެކު ކަމަށާއި، އެހެން ނަމަވެސް މެންބަރުން ގޮނޑި ބަދަލުކުރުމަކީ އެ އިތުބާރު ގެއްލޭނެ ކަމެއް ކަމަށް ވެސް ބުނީ ހަމަ އެމްޑީޕީންނެވެ. އަދި އޭގެ ސަބަބުން ރައްޔިތުން ޑިމޮކްރެސީއާމެދު އޮންނަ އިތުބާރު ގެއްލި ވޯޓުލާން ނުކުންނަ ނިސްބަތް މަދުވާކަމަށާ އެކަމަކީ ޑިމޮކްރެސީ ބަލިކަށިވުމުގެ ނުރައްކަލެއްގެ ގޮތުގައި ޑިމޮކްރަސީގެ ބައްޕަ ކަމަށް ވަކާލާތުކާރާ އެމްޑީޕީން ފާހަގަކުރިއެވެ.

މަންޒަރު ބަދަލުވެ، ވެރިކަމާ މަޖިލީހުގެ މެޖޯރިޓީވެސް އެ ޕާޓީއަށް ގެއްލުމާއެކު ދެން ކަންތައްވީ އަދި މާ އަޖައިބުކުރުވަނިވި ގޮތަކަށެވެ. އެއްކަލަ އެންޓި-ޑިފެކްޝަން ބިލު ގޯސް ވެއްޖެއެވެ. ގާނޫނު އަސާސީއަށް އިސްލާހު ގެނައުން ގޯސް ވެއްޖެއެވެ. އޭރު ޕާޓީ ބަދަލުކޮށްފިނަމަ، އެ މެންބަރަކު އަމިއްލައަށް އިސްތިއުފާ ދޭންޖެހޭނެ ކަމަށް ބުނެ އެންޓި ޑިފެކްޝަންގެ ޤާނޫނަށް ގެނައި އިސްލާޙުގައި ބަޔާންކޮށްފައިވީ ކަންކަން މިއަދު ރައްޔިތުންގެ އަނގަމަތީގައި 'ޓޭޕު އެޅުވުމަށް" ވެ ނިމިއްޖެއެވެ.

ދެފަހަރު ހަމަޔަށް އެކައްޗެއް ނުކިޔާ ބަޔަކަށް ރައްޔިތުން ކުރާނީވެސް ވަކި ކޮން އިތުބާރެއް ހެއްޔެވެ. މިއަދު އެމްޑީޕީ ފެއިލްވެ، އެ ޕާޓީގެ ރޫހު މިވަނީ ގެއްލިފައެވެ. ރައްޔިތުން އެ ޕާޓީއަށް ކުރި އިތުބާރާ ގަދަރާ ލޯބި ނެތިދިޔައީ މި ސަބަބަށްޓަކައި ކަން މިއަދު ގިނަ ބަޔަކު ގަބޫލުކުރާނެ ހަގީގަތެކެވެ. ޚުދު އެ ޕާޓީގެ މެންބަރުން ވެސް ތިބީ ޕާޓީ ދެކެ ފޫހިވެފައެވެ. ތިމާއަށް ހެވެއް ލިބެން ނެތިއްޔާ އަނެކާއަށް ވެސް ހެވެއް ލިބިގެން ނުވާނެ ކަމަށް ދެކިގެން އުޅުމުގެ މިސާލު މިދަނީ ރައްޔިތުންގެ ލޯ ކުރިމަތިން ފެންނަމުންނެވެ.